Hezekeli 18:1-32
18 Livi laJehova laphindze lefika kimi latsi:
2 “Sisho kutsini lesisho lenisisebentisako eveni laka-Israyeli lesitsi: ‘Bobabe badle emagilebisi lamunyu, kodvwa ngemadvodzana laphatinyelwe ngematinyo’?+
3 “INkhosi Lephakeme Jehova itsi: ‘Ngitifunga mine, ngitsi angeke nichubeke nekusisho lesisho ka-Israyeli.
4 Yonkhe imiphefumulo* ngeyami. Njengobe umphefumulo wababe ungewami kanjalo nemphefumulo wemntfwana ngewami. Umphefumulo* lowonako ngiwo lotawufa.
5 “‘Asesitsi kunemuntfu lolungile futsi lowenta lokulungile.
6 Akayidli imihlatjelo yetithico etintsabeni;+ akalibeki litsemba lakhe etithicweni letenyanyekako* tebantfu baka-Israyeli; akalali nemfati wamakhelwane wakhe+ futsi akalali nemfati losesikhatsini;+
7 akabaphatsi kabi labanye+ futsi uyasibuyisela sibambiso semuntfu lomkweletako;+ akebeli muntfu+ kodvwa umupha kudla kwakhe loyo lolambile,+ embatsise lohamba ngcunu;+
8 akabiti intalo nobe afune kutfola inzuzo nakabolekisa,+ futsi akenti tintfo ngendlela lengakalungi;+ akakhetsi nakehlulela bantfu;+
9 uchubeka ahamba ngetimiso tami futsi ugcina tehlulelo tami kuze etsembeke. Umuntfu lonjalo ulungile, nakanjani utawuchubeka aphila,’+ kusho iNkhosi Lephakeme Jehova.
10 “‘Kodvwa asesitsi lomuntfu utala indvodzana lesigebengu+ nobe lengumbulali*+ nobe leyenta letinye taletintfo
11 (ngisho nome lobabe angakaze atente letintfo), lendvodzana idla imihlatjelo yetithico etintsabeni, ilala nemfati wamakhelwane wayo,
12 iphatsa kabi labeswele nalabahluphekako,+ iyeba, ayisibuyiseli sibambiso, yetsembele etithicweni letenyanyekako,+ yenta imikhuba leyenyanyekako,+
13 ibita intalo futsi ifune kutfola inzuzo nayibolekisa,+ ngako lendvodzana angeke ichubeke iphila. Nakanjani itawubulawa ngenca yato tonkhe letintfo letenyanyekako letentile. Ingati yayo itawuba setikwayo.
14 “‘Asesitsi-ke babe unendvodzana lebona tonkhe tono letentiwa ngubabe wayo, kutsi ngisho itibona kodvwa ingamlingisi.
15 Ayiyidli imihlatjelo yetithico etintsabeni; ayetsembeli etithicweni letenyanyekako tebantfu baka-Israyeli; ayilali nemfati wamakhelwane wayo;
16 kute umuntfu lemphatsa kabi; ayisitsatsi sibambiso; ayebi; imupha kudla kwakhe loyo lolambile iphindze yembatsise lohamba ngcunu;
17 ayibahlukumeti labaphuyile; ayiyikhokhisi intalo nayibolekisa nobe ifune kutfola inzuzo; iyatigcina tehlulelo tami futsi ihamba ngetimiso tami. Umuntfu lonjalo angeke afe ngenca yesono sababe wakhe. Nakanjani utawuchubeka aphila.
18 Kodvwa ngenca yekutsi babe wakhe ukhwabanisile, wagebenga umnakabo, futsi wenta tintfo letimbi kubantfu bakubo, utawufela sono sakhe.
19 “‘Kodvwa nitawutsi: “Lendvodzana ayisetfwali ngani sono sababe wayo?” Njengobe lendvodzana yente lokulungile nalokuhle, yagcina tonkhe timiso tami futsi yatilandzela, nakanjani itawuchubeka iphila.+
20 Umphefumulo* lowonako ngiwo lotawufa.+ Indvodzana angeke yetfwale licala lababe wayo futsi nababe angeke etfwale licala lendvodzana yakhe. Lolungile utawehlulelwa kuye ngekulunga kwakhe, nalomubi ehlulelwe kuye ngebubi bakhe.+
21 “‘Nangabe umuntfu lomubi atishiye tonkhe tono takhe, bese ugcina timiso tami, ente lokulungile nalokuhle, nakanjani utawuchubeka aphile. Angeke afe.+
22 Kute ngisho nasinye etonweni takhe latentile lesitawukhunjulwa.+ Utawuchubeka aphila ngobe wenta lokulungile.’+
23 “INkhosi Lephakeme Jehova itsi: ‘Ngiyajabula yini mine ngekufa kwalomubi?+ Angifisi yini kutsi aphendvuke etindleleni takhe letimbi, futsi achubeke aphila?’+
24 “‘Kodvwa nangabe umuntfu lolungile ashiya indlela lelungile bese wenta lokubi,* ente tonkhe tintfo letenyanyekako letentiwa ngulomubi, utawuchubeka yini aphila? Kute ngisho nakunye kulokulungile lakwenta lokuyokhunjulwa.+ Utawufa ngenca yekungetsembeki kwakhe, nangenca yesono lasentile.+
25 “‘Kodvwa nine nitawutsi: “Indlela yaJehova ayikalungi.”+ Awu nine bantfu baka-Israyeli, ngicela nilalele. Yindlela yami yini lengakalungi?+ Akusito yini tindlela tenu letingakalungi?+
26 “‘Nangabe umuntfu lolungile ashiya indlela lelungile ente lokubi, bese uyafa ngenca yaloko, utawufela sono sakhe.
27 “‘Nangabe lomubi ashiya lokubi lakwentile bese wenta lokulungile nalokuhle, utawusindzisa imphilo* yakhe.+
28 Nangabe asanguluka bese uyaphendvuka, atishiye tonkhe tono takhe, nakanjani utawuchubeka aphila. Angeke afe.
29 “‘Kodvwa bantfu baka-Israyeli batawutsi: “Indlela yaJehova ayikalungi.” Awu nine bantfu baka-Israyeli, yindlela yami yini lengakalungi?+ Akusito yini tindlela tenu letingakalungi?’
30 “INkhosi Lephakeme Jehova itsi: ‘Ngako-ke, nguloyo naloyo kini ngitamehlulela kuye ngetindlela takhe.+ Awu nine bantfu baka-Israyeli, phendvukani, nitishiye tonkhe tono tenu kuze tingabi lugibe lolunibangela kutsi none.
31 Tishiyeni tonkhe tono lenitentile,+ bese nishintja* tinhlitiyo tenu nendlela lenicabanga ngayo.+ Ngobe kungani nje kufanele nife+ nine bantfu baka-Israyeli?’
32 “INkhosi Lephakeme Jehova itsi: ‘Angijabuli ngekufa kwemuntfu.+ Ngako phendvukani kuze niphile.’”+
Imibhalo lengentansi
^ Nobe “Umuntfu.” Fundza Tinchazelo Temagama.
^ Nobe “kuphila.” Fundza Tinchazelo Temagama.
^ Leligama lesiHebheru kungenteka lihlobene neligama lelisho “bulongo” futsi lisetjentiswa nakukhulunywa ngendzelelo.
^ NgesiHebheru kutsi, “lecitsa ingati.”
^ Nobe “Umuntfu.”
^ Nobe “lokungakalungi.”
^ Nobe “umphefumulo.” Fundza Tinchazelo Temagama.
^ NgesiHebheru kutsi, “tenteleni tinhlitiyo letinsha.”
