Yekucala KubaseKhorinte 11:1-34
11 Lingisani mine, njengobe nami ngilingisa Khristu.+
2 Nyalo ngiyanincoma ngobe niyangikhumbula kuto tonkhe tintfo, futsi tonkhe letintfo lenganifundzisa tona niyatenta.
3 Kodvwa ngifuna nati kutsi inhloko yawo onkhe emadvodza nguKhristu;+ inhloko yemfati yindvodza;+ nenhloko yaKhristu nguNkulunkulu.+
4 Nobe nguyiphi indvodza lethantaza nome iphrofethe imbonye enhloko, ihlazisa inhloko yayo;
5 kodvwa nobe ngumuphi umfati lothantaza nome aphrofethe+ angakambonyi enhloko, uhlazisa inhloko yakhe, ngobe kufana nekutsi ungumfati lohhule lumanyu enhloko.
6 Nangabe umfati angambonyi, akahhule; kodvwa nangabe kulihlazo ngemfati kuhhula tinwele takhe tibe timfisha nobe kuhhula lumanyu, akambonye enhloko.
7 Indvodza akukafaneli imbonye enhloko, ngobe ingumfanekiso nenkhatimulo yaNkulunkulu,+ kodvwa umfati yena uyinkhatimulo yendvodza.
8 Ngobe indvodza ayivelanga emfatini, kodvwa umfati wavela endvodzeni.+
9 Ngetulu kwaloko, indvodza ayidalwanga ngenca yemfati, kodvwa umfati wadalwa ngenca yendvodza.+
10 Kungako umfati kufanele abe neluphawu lwenhlonipho enhloko yakhe ngenca yetingilosi.+
11 Kodvwa eNkhosini, umfati bekangeke abe khona ngaphandle kwendvodza, nendvodza beyingeke ibe khona ngaphandle kwemfati.
12 Ngobe njengobe umfati avela endvodzeni,+ nendvodza italwa ngumfati; kodvwa tonkhe tintfo tivela kuNkulunkulu.+
13 Yehlulelani nine: Kuyemukeleka yini kutsi umfati athantaze kuNkulunkulu angakambonyi enhloko?
14 Imvelo ayikanifundzisi yini kutsi kulihlazo ngendvodza kuba netinwele letindze,
15 nekutsi kuludvumo ngemfati kuba netinwele letindze? Ngobe umfati unikwe tinwele esikhundleni sentfo yekumbonya enhloko.
16 Kepha nangabe lotsite afuna kukuphikisa loku asekele lenye inchubo, tsine site lenye, nemabandla aNkulunkulu ete lenye.
17 Kodvwa njengobe ngininika lemiyalo, anginincomi, ngobe anihlangani ngenca yalokuhle kodvwa nihlangana ngenca yalokubi.
18 Kwekucala nje, ngivile kutsi nanihlangana ebandleni kuba khona kwehlukana emkhatsini wenu; futsi ngelizinga lelitsite ngiyakukholwa loko.
19 Ngobe ecinisweni kutawuba khona emahlelo emkhatsini wenu,+ kuze labo labemukelekako batobonakala.
20 Nanihlangana ndzawonye kuze nidle Sidlo seNkhosi Sakusihlwa,+ loko anikwenti ngendlela lefanele.
21 Ngobe nasekufanele nisidle, nguloyo naloyo ufika sekadle sakhe, kangangekutsi lomunye uyalamba kodvwa lomunye adzakwe.
22 Nite yini tindlu tekudlela netekunatsela? Nedzelela libandla laNkulunkulu yini, futsi nenta labo labete lutfo bative banemahloni yini? Ngingatsini nje kini? Kufanele nginincome yini? Cha, ngeke nginincome kuloku.
23 Ngobe ngakwemukela eNkhosini loko lenganifundzisa kona, kutsi ngebusuku iNkhosi Jesu+ lebeyitawutsengiswa ngabo yatsatsa sinkhwa,
24 futsi ngemuva kwekubonga, yasihlephula yatsi: “Loku kumelela umtimba wami+ lotawunikelwa ngenca yenu. Chubekani nikwenta, ningikhumbula.”+
25 Yenta kanjalo nangendzebe,+ ngemuva kwekuba nesidlo sakusihlwa, yatsi: “Lendzebe imelela sivumelwane lesisha+ lesentiwe ngengati yami.+ Chubekani nikwenta loku nobe kunini naniyinatsa, kuze ningikhumbule.”+
26 Ngobe nobe kunini nanidla lesinkhwa futsi ninatsa lendzebe, nichubeka nimemetela kufa kweNkhosi ize ifike.
27 Ngako nobe ngubani lodla lesinkhwa nobe anatse lendzebe yeNkhosi kungakafaneli, utawuba nelicala emtimbeni nasengatini yeNkhosi.
28 Umuntfu akacale atihlolisise yena kuze aciniseke kutsi uyafaneleka yini,+ ngemuva kwaloko-ke sekangasidla sinkhwa futsi anatse kulendzebe.
29 Ngobe loyo lodlako aphindze anatse, usuke adla futsi anatsa kwehlulelwa kwakhe nangabe angakucondzi loko lokushiwo ngumtimba.
30 Kungako labanyenti emkhatsini wenu babutsakatsaka, bagula, futsi labambalwa sebafile.*+
31 Kodvwa kube besingakucondza loko tsine lesingiko, besingeke sehlulelwe.
32 Nanobe kunjalo, nasehlulelwa, sisuke siyalwa nguJehova*+ kuze singalahlwa nelive.+
33 Ngako-ke bazalwane bami, nanihlangana kuze nidle sidlo, nibomelana.
34 Nangabe kukhona lolambile, akadle ekhaya, kuze kutsi nanihlangana ningahlanganeli kwehlulelwa.+ Tinkinga letisele ngitatilungisa nangifika kini.
