Galuega a le ʻAuaposetolo 8:1-40
8 Ua ioe foʻi Saulo i le fasiotiga o ia.+
I lea aso, ua oo ai sauāga e tele i le faapotopotoga i Ierusalema; ua faataapeapeina ai foʻi i latou uma i vaipanoa o Iutaia ma Samaria+ seʻi vaganā ai le ʻauaposetolo.
2 Ae ua ave e tagata e matataʻu i le Atua Setefano ma tanu, ma ua matuā faavauvau foʻi ona o ia.
3 Peitaʻi, ua soona sauā Saulo i le faapotopotoga. Ua ia osofaʻi atu i lea fale ma lea fale, fetoso mai tane ma fafine, ma ua ia tuuina atu i latou i le falepuipui.+
4 Ona ō solo ai lea o i latou ua faataapeapeina i le nuu, ma folafola atu le tala lelei o le afioga a le Atua.+
5 Ua alu ifo Filipo i le aai* o Samaria+ ma talaʻi atu le Keriso iā i latou.
6 Ua uaʻi atu le motu o tagata ma le lotogatasi i mea ua fai mai ai Filipo a o latou faalogologo atu, ma vāai i faailoga ua ia faia.
7 Auā e toʻatele i latou ua iai agaga leaga, ma ua alalaga leotetele ma ō mai i fafo mai iā i latou.+ E toʻatele foʻi tagata ua pepē tino ma pipili, ua faamālōlōina.
8 Ona matuā olioli ai lea o tagata o lenā aai.
9 Ua iai i le aai se tagata e igoa iā Simona, o lē na faia muamua faiga faaagaga, ma matuā ofo ai le nuu o Samaria, ma ua ia faapea mai e sili lava o ia.
10 O i latou uma lava, e mai i ē e faatauvaa e oo i ē e sili, e uaʻi atu iā te ia ma faapea atu: “O loo i lenei tagata le mana tele o le Atua.”
11 O le mea lea ua latou uaʻi atu ai iā te ia, ona ua leva ona ia faia faiga faaagaga e ofo ai i latou.
12 Ae ina ua latou talitonu iā Filipo, o lē ua folafola atu le tala lelei o le Malo o le Atua,+ ma le suafa o Iesu Keriso, ona papatisoina lea o tane ma fafine.+
13 Ua talitonu foʻi Simona, ma ina ua uma ona papatisoina o ia, ona ia aufaatasi pea lea ma Filipo;+ ua maofa foʻi o ia ina ua vaai i faailoga ma galuega mamana ua faia.
14 Ina ua faalogo aposetolo i Ierusalema ua talia e tagata Samaria le afioga a le Atua,+ ona latou aauina atu lea o Peteru ma Ioane iā i latou;
15 ua ō ifo i laʻua ma tatalo ina ia maua e i latou le agaga paia.+
16 Auā e leʻi liligi ifo i se tasi o i latou le agaga paia, ae ua na o le suafa o le Alii o Iesu ua papatisoina ai i latou.+
17 Ona faaee atu lea o o la lima iā i latou,+ ma na latou maua ai le agaga paia.
18 Ina ua iloa e Simona e maua le agaga paia e ala i le faaee o lima o aposetolo, ona ia ofo atu lea o tupe iā i laʻua,
19 ua faapea mai: “Ia aumai foʻi iā te aʻu lenā pule, ina ia maua ai e se tasi e faaee i ai oʻu lima le agaga paia.”
20 Ae ua fai atu Peteru iā te ia: “Ia fano au siliva faatasi ma oe, auā ua e manatu e mafai ona e maua le meaalofa foaʻifua a le Atua i tupe.+
21 E leai sau vaega po o sou tofi i lenei mea, auā e lē tonu lou loto i le silafaga a le Atua.
22 O lea la, inā salamō ia i lou leaga, ma ia faatoga atu iā Ieova,* ina ia faamagalo oe pe afai e mafai, ona o manatunatuga leaga o lou loto.
23 Auā ua ou iloa, o oe o le mea oona ma o se pologa i le amiolētonu.”
24 Ua tali mai Simona: “Ia oulua faatoga atu iā Ieova* mo aʻu, ina ia aua neʻi oo mai iā te aʻu se tasi o mea ua oulua fai mai ai.”
25 O lea, ina ua uma ona la molimau māeʻaeʻa ma tautatala atu i le afioga a Ieova,* ona la toe foʻi atu lea i Ierusalema, ma na la folafola atu le tala lelei i le tele o nuu o Samaria.+
26 Peitaʻi, ua taʻu atu e se agelu+ a Ieova* iā Filipo e faapea: “Inā tulaʻi ia ma alu atu i saute i le auala lea e alu ifo mai Ierusalema e oo atu i Kasa.” (O se auala i le toafa.)
27 Ona tulaʻi lea o ia ma alu. Faauta! ua iai le eunuka* Aitiope, o se tagata maualuga i le pulega a Kanake, le tupu tamaʻitaʻi o Aitiope, ma e vaaia e ia ana oloa uma. Sa alu atu o ia i Ierusalema e tapuaʻi,+
28 ae ua toe foʻi mai o ia ma o loo nofo i lana kariota ma faitau leotele le tusi a le perofeta o Isaia.
29 O lea, ua fai mai le agaga iā Filipo: “Ia e faalatalata atu i lenā kariota.”
30 Ua tamoʻe atu Filipo i tafatafa o le kariota, ma faalogo atu o loo ia faitauina leotele le tusi a le perofeta o Isaia, ona ia faapea atu lea: “Po o e malamalama i mea o loo e faitauina?”
31 Ua fai mai o ia: “E faapefea ona ou malamalama pe a lē faasino mai e se tasi iā te aʻu?” Ona ia ʻaiʻoi mai lea iā Filipo, ina ia oso atu i luga e la te nonofo faatasi.
32 O le mau lenei mai i Tusitusiga Paia ua ia faitauina: “Ua taʻitaʻiina o ia e pei o le mamoe o le a fasia, ma e pei o le tamaʻi mamoe e gūgū i luma o ē e sele i ona fulufulu, e lē tautala atu o ia.+
33 Ua aveesea le faamasinogatonu mai iā te ia, i le taimi na faalumaina ai o ia.+ O ai e na te taʻu atu faamatalaga uma e uiga i lona tupuaga? Auā ua aveesea lona ola mai i le lalolagi.”+
34 Ua fai mai le eunuka iā Filipo: “Faamolemole, o ai lea e talanoa i ai le perofeta? Pe e faatatau iā te ia po o se isi tagata?”
35 Ona tautala atu lea o Filipo, ma e amata mai i lenei mau, ua ia folafola atu iā te ia le tala lelei e uiga iā Iesu.
36 A o la ō i le auala, ona la tau atu lea i le vai ma ua faapea mai le eunuka: “Faauta! O le vai; o le ā se mea e taofia ai aʻu mai i le papatisoina?”
37 * ——
38 Ona ia fai atu lea e taofi le kariota, ona ō ifo uma lea o Filipo ma le eunuka i le vai, ma ua ia papatisoina o ia.
39 Ina ua la ō aʻe mai i le vai, ona taʻitaʻi ese loa lea o Filipo e le agaga o Ieova,* ma ua lē toe vaai le eunuka iā te ia, ae ua alu o ia ma le olioli tele.
40 Peitaʻi, ua alu Filipo i Asetota, ma ua alu atu o ia i lenā vaipanoa, ma folafola atu pea le tala lelei i aai uma lava, seʻia oo ina taunuu o ia i Kaisareia.+
