Galuega a le ʻAuaposetolo 11:1-30
11 Ua faalogo aposetolo ma le ʻauuso o loo i Iutaia, ua talia e tagata o nuu ese le afioga a le Atua.
2 O lea, ina ua alu aʻe Peteru i Ierusalema, ona faitio* atu lea iā te ia o ē lagolagoina le peritome+
3 e faapea: “Na e alu i le fale o tagata e lē peritomeina ma aai faatasi ma i latou.”
4 Ona faamatala auʻiliʻili atu lea e Peteru iā i latou o mea e uiga i lenei mataupu e faapea:
5 “Sa ou tatalo a o oʻu iai i le aai o Iopa, ma na ou vaaia ai se faaaliga o le mea e pei o se ʻie lino telē ua tuutuu ifo mai i le lagi i ona pito e fā, ma ua oo mai lava iā te aʻu.+
6 Na ou vaavaai i ai ma ou mātauina ai manu vaefā o le lalolagi, o manufeʻai, o mea fetolofi ma manufelelei o le lagi.
7 Na ou faalogo foʻi i se leo o faapea mai iā te aʻu: ‘Peteru e, tū ia i luga, inā fasi ma ʻai!’
8 Ae na ou faapea atu: ‘E leai le Alii e, auā ou te leʻi ʻai lava i se mea ua leaga ma lē mamā.’
9 Ua toe tali mai le leo mai i le lagi: ‘Aua e te toe taʻua e leaga mea ua faamamāina e le Atua.’
10 Na faatolu ona faalogoina lea leo, ona ave aʻe loa lea o mea uma i le lagi.
11 O le taimi foʻi lenā na tutū mai ai i le fale na matou iai ni tamāloloa se toʻatolu, o ē na aauina mai i Kaisareia iā te aʻu.+
12 Ona faatonuina lea o aʻu e le agaga e ō ma i latou e aunoa ma le masalosalo. Na matou ō faatasi foʻi ma nei uso e toʻaono, ma matou ulufale atu i le fale o le tamāloa.
13 “Na ia faamatala mai iā i matou lona vaaia o le agelu o tū i lona fale ma faapea mai: ‘Ia aauina atu ni tagata i Iopa ma aami iā Simona, o lē e igoa foʻi iā Peteru,+
14 ma e na te faailoa atu iā te oe ni faamatalaga e faaolaina ai oe ma lou aiga.’
15 Ae ina ua amata ona ou tautala atu, ona oo ifo lea i o latou luga le agaga paia, e pei foʻi ona oo ifo iā i tatou i le amataga.+
16 O le mea lea na ou manatua ai le fetalaiga a le Alii, e masani ona faapea mai, ‘E faia e Ioane papatisoga i le vai,+ ae e papatisoina outou i le agaga paia.’+
17 O le mea lea, afai ua foaʻi mai e le Atua iā i latou le meaalofa foaʻifua, lea foʻi na ia foaʻi mai iā i tatou o ē talitonu i le Alii o Iesu Keriso, o ai la aʻu ou te taofia ai le Atua?”*+
18 Ina ua latou faalogo i nei mea, ona latou lē toe finau atu lea,* ae ua latou faamamaluina le Atua e faapea: “E manino mai, ua tuuina atu foʻi e le Atua le avanoa i tagata o nuu ese e salamō ai, ina ia maua ai e i latou le ola.”+
19 Na ō i latou o ē na faataapeapeina+ ona o sauāga na tutupu ina ua oti Setefano, ua oo atu i Foinie, i Kuperu ma Anetioka, ae e leʻi faailoaina atu le upu i se tasi, seʻi vaganā ai tagata Iutaia.+
20 Peitaʻi, na ō mai i Anetioka nisi o i latou na, o ē e mai i Kuperu ma Kurene, ma talanoa atu i tagata e tautatala i le gagana Eleni, ma folafola atu le tala lelei e uiga i le Alii o Iesu.
21 Sa iai foʻi le aao o Ieova* iā i latou, ma e toʻatele na talitonu ma liliu atu i le Alii.+
22 Na oo atu le tala e uiga iā i latou i le faapotopotoga i Ierusalema, ona latou auina atu lea o Panapa+ e oo atu lava i Anetioka.
23 Ina ua taunuu atu o ia ma vaaia le agalelei faifua o le Atua, ona olioli ai lea o ia ma faalaeiau atu iā i latou uma ina ia tumau pea i le Alii ma le lotofaamaoni;+
24 auā o ia o se tagata lelei ma ua tumu i le agaga paia ma le faatuatua. Ua talitonu foʻi le toʻatele o tagata i le Alii.+
25 Ona alu ai lea o ia i Taso e matuā saʻili iā Saulo.+
26 Ina ua ia maua o ia, ona ia aumaia lea o ia i Anetioka. E tusa ma le tausaga atoa na la faatasi ai ma le faapotopotoga, ma aʻoaʻo atu le motu o tagata. O Anetioka na faatoʻā taʻua ai soo o Kerisiano,+ e ala i le taʻitaʻiga a le Atua.
27 I ia aso, na ō ifo ai perofeta+ mai i Ierusalema i Anetioka.
28 Ona tulaʻi lea o se tasi o i latou e igoa iā Akapo,+ ma valoia e ala i le agaga, se oge tele o le a oo mai i le lalolagi uma.+ O le mea moni, na tupu lenā mea i le taimi o Kalaotio.
29 Ona filifili ai lea o le ʻausoo e auina atu se fesoasoani+ i uso o loo nonofo i Iutaia, e tusa ma le mea ua mafai e le tagata;+
30 ua latou faia faapea, ma auina atu lenā fesoasoani i toeaina e ala iā Panapa ma Saulo.+
Faamatalaga Pito i Lalo
^ Po o le “finau.”
^ Po o le “faalavelave ai i le ala o le Atua?”
^ Ele., “lē magagana ai lea.”
