Galuega a le ʻAuaposetolo 7:1-60
7 Ona fai mai lea o le ositaulaga sili: “Pe e moni ea nei mea?”
2 Ua tali atu Setefano: “Alii e, uso, ma tamā, inā faalogo mai ia. Na faaali le Atua mamalu i lo tatou augātamā o Aperaamo, a o iai o ia i Mesopotamia, a o leʻi alu atu e nofo i Karana,+
3 ma na ia fetalai atu iā te ia: ‘Ia e tuua lou atunuu ma lou aiga, ae alu atu i le atunuu ou te faasino atu iā te oe.’+
4 Ona tuua lea e ia o le laueleele o tagata Kaletaia, ae ua alu atu ma nofo i Karana. Ina ua mavae le oti o lona tamā,+ ona faatonuina lea o ia e le Atua e alu ese mai i inā, ae sau i lenei nuu, lea o loo outou nonofo ai nei.+
5 Peitaʻi, e na te leʻi avatua iā te ia se tofi i inei, e oo lava i se mea e tusa ma se tulagavae; ae na ia folafola e avatu iā te ia le fanua atoa e nonofo ai ma lana fanau pe a mavae atu o ia,+ e ui lava e leʻi iai sana fanau i lenā taimi.
6 E lē gata i lea, na fetalai le Atua iā te ia, o le a aumau lana fanau i se atunuu e lē o so latou atunuu, ma o le a faapologaina i latou e na tagata ma faapuapuagatia* i latou mo le 400 tausaga.+
7 Ua fetalai mai le Atua, ‘Ou te faamasino i lenā atunuu o le a nofo pologa ai i latou,+ ma pe a mavae nei mea, ona latou ō ese mai ai lea, ma tuuina mai iā te aʻu le auaunaga paia i lenei atunuu.’+
8 “Na ia tuuina foʻi iā te ia se feagaiga o le peritomeina,+ ona fanaua lea e ia o Isaako+ ma ua peritomeina i le aso lona valu,+ ua fanaua e Isaako o Iakopo,* ma na avea Iakopo ma tamā o ulu* o aiga e toʻa 12.
9 Sa lotoleaga foʻi ulu o aiga iā Iosefa+ ma faatau atu o ia i Aikupito.+ Ae sa faatasi le Atua ma ia,+
10 ma laveaʻiina o ia mai i ona puapuaga uma, ma tuuina atu iā te ia le atamai ma faapogaia Farao le tupu o Aikupito ia fiafia iā te ia. Sa tofia e Farao o ia e pule i Aikupito, faapea ma lona aiga atoa.+
11 Ae na oo le oge i Aikupito uma ma Kanana, ioe, o se puapuaga tele, e leʻi maua foʻi e o tatou augātamā ni meaʻai.+
12 Peitaʻi, na faalogo Iakopo o loo iai meaʻai* i Aikupito, ona ia aauina atu lea o o tatou augātamā mo le taimi muamua.+
13 Ae i le taimi lona lua, na faailoa atu ai e Iosefa o ia lava i ona uso, ma na oo ina iloa ai e Farao le aiga o Iosefa.+
14 Ona aami lea e Iosefa o lona tamā o Iakopo ma lona ʻauaiga uma mai i Kanana,+ e toʻa 75 tagata.+
15 Ona alu ifo lea o Iakopo i Aikupito,+ ua maliu ai o ia i inā,+ faapea foʻi ma o tatou augātamā.+
16 Na ave o latou tino i Sekema ma tuu ai i le tuugamau, lea na faatau e Aperaamo i tupe siliva mai i atalii o Hamoro i Sekema.+
17 “A o latalata mai le taimi e faataunuu ai le folafolaga na faalauiloa atu e le Atua iā Aperaamo, ua tupu tele le nuu ma faatoʻateleina i Aikupito.
18 Ona tulaʻi mai lea o se isi tupu i Aikupito, o lē na te lē iloa Iosefa.+
19 Na faia e ia ni togafiti leaga i o tatou tagata, ma na ia faia mea sesē i le faamalosia o tamā e lafoaʻi a latou tamameamea, ina ia aua neʻi o latou feola.+
20 I lenā taimi, na fanau mai ai Mose, ma sa matuā aulelei o ia i le silafaga a le Atua. Sa tausia o ia mo le tolu masina i le aiga o lona tamā.+
21 Ae ina ua lafoaʻia o ia,+ na maua o ia e le afafine o Farao ma na ia tausia o ia e pei o sana lava tama.+
22 O lea, na aʻoaʻoina ai Mose i le atamai uma o Aikupito. O le mea moni, na malosi o ia i ana upu ma gaoioiga.+
23 “Ina ua atoa le 40 o ona tausaga, na manatu* ai o ia e alu e asiasi i ona uso,* le fanauga a Isaraelu.+
24 Ina ua ia vaai atu i se tasi o i latou ua agaleagaina, ona ia puipui lea iā te ia ma faia le tauimasui mo lē na agaleagaina, e ala i le fasiotia o le tagata Aikupito.
25 Sa manatu o ia, ua iloa e ona uso e faaolaina i latou e le Atua e ala iā te ia, ae e latou te leʻi iloa.
26 I le aso na sosoo ai, na ia asiasi atu ai iā i latou ma maua ai ni tagata se toʻalua o tauaʻimisa, ma na ia taumafai e faalelei lo la vā i le faapea atu: ‘Sole, o le ʻauuso oulua, aiseā ua lua feʻainaʻi ai?’
27 Ae na tūlei ese o ia e le tagata na faasauā i lona tuaoi ma faapea mai: ‘O ai na tofia oe e fai ma pule ma faamasino iā i maʻua?
28 Po ua e manaʻo ea e fasioti aʻu e pei ona e faia i le tagata Aikupito ananafi?’
29 O le tala lenā na sola ai loa Mose ma aumau o se tagata ese i le nuu o Mitiana, lea na ia fanaua ai ni atalii se toʻalua.+
30 “Ina ua mavae tausaga e 40, ona faaali mai lea o se agelu iā te ia i le toafa* o le mauga o Sinai i se laau tuitui na mū.+
31 Ina ua vaaia e Mose lenei mea, ona matuā ofo ai lea o ia. Peitaʻi, a o faalatalata atu e vaavaai i ai, ae ia faalogoina loa le siʻufofoga o Ieova* o faapea mai:
32 ‘O aʻu o le Atua o o outou augātamā, o le Atua o Aperaamo, o Isaako ma Iakopo.’+ Ona matuā gatete ai lea o Mose, ma e leʻi toe manaʻo e toe faalatalata atu i ai.
33 Ua fetalai mai Ieova* iā te ia: ‘Ia aveese seevae mai i ou vae, auā e paia le eleele o loo e tū ai.
34 Ua ou iloa lava le sauāina o loʻu nuu o loo i Aikupito, ua ou faalogo i lo latou ōi,+ ma ou te alu ifo e laveaʻi iā i latou. O lea, inā sau ia, ou te auina atu oe i Aikupito.’
35 O Mose lenei na latou tuulafoaʻiina, ma faapea atu: ‘O ai na tofia oe e fai ma pule ma faamasino?’+ O ia foʻi lenei na auina mai e le Atua+ e fai ma pule ma faaola, e ala i le agelu lea na faaali mai iā te ia i le laau tuitui.
36 O le tagata lenei na taʻitaʻia ese i latou+ ina ua uma ona faia o mea ofoofogia* ma faailoga i Aikupito,+ ma le Sami Ulaula,+ ma le toafa i tausaga e 40.+
37 “O Mose lenei na faapea atu i le fanauga a Isaraelu: ‘E tofia e le Atua mo outou se perofeta e pei o aʻu, mai i o outou uso.’+
38 O ia lenei na iai faatasi ma le faapotopotoga i le toafa ma le agelu+ lea na tautala atu iā te ia+ i le mauga o Sinai, ma na faatasi foʻi ma o tatou augātamā, ma na ia maua afioga paia o loo ola, ina ia tuuina mai iā i tatou.+
39 Na mumusu o tatou augātamā e usiusitaʻi iā te ia, ma na latou teena o ia,+ ma toe liliu atu o latou loto i Aikupito.+
40 Na latou faapea atu iā Arona: ‘Ia e faia ni atua mo i tatou e taʻitaʻia i tatou. Auā e tatou te lē iloa po o le ā le mea ua tupu i lenei tagata o Mose, o lē na aumaia i tatou mai i Aikupito.’+
41 Ona latou faia lea o se tamaʻi povi i na aso, ma avatu i ai taulaga i le tupua, ma na fiafia foʻi i latou i galuega a o latou lima.+
42 Ona liliuese lea o le Atua ma tuu atu i latou ina ia faia le auaunaga paia i ʻau o le lagi,+ e pei ona tusia i le tusi a Perofeta e faapea: ‘Le aiga o Isaraelu e, po o aʻu ea na outou fasia ai manu ma osi atu i ai taulaga i tausaga e 40 i le toafa?
43 Nai lo o lea, ua outou ave le faleʻie o Moloka+ ma le fetu o le atua o Refana, o faatusa na outou faia e tapuaʻi i ai. O lea ou te ave mamao ai outou i tala atu o Papelonia.’+
44 “Sa i o tatou augātamā le faleʻie* i le toafa, e pei ona Ia poloaʻi mai ina ua fetalai mai iā Mose ia faia e tusa ma le ata na ia vaai i ai.+
45 Na maua e o tatou augātamā ma Iosua le faleʻie, ma na latou aumaia i le laueleele na nonofo ai tagata ese,+ o ē na tutuliesea e le Atua mai i luma o o tatou augātamā,+ ma sa iai pea e oo mai i aso o Tavita.
46 Na ia maua le finagalo malie o le Atua, ma talosaga atu mo le faaeaga o le saunia o se afioaga mo le Atua o Iakopo.+
47 Ae na fausia e Solomona se fale mo ia.+
48 Peitaʻi, e lē afio le Silisili Ese i ni fale e faia e lima,+ e pei ona fai mai ai le perofeta:
49 ‘Ua fetalai mai Ieova:* O le lagi o loʻu nofoālii lea,+ a o le lalolagi o le mea lea e tū ai oʻu vae.+ O le ā le ituaiga o fale e tou te faia mo aʻu? O fea foʻi le mea ou te mālōlō ai?
50 Pe e leʻi faia ea e oʻu lima nei mea uma?’+
51 “O outou o tagata ua maaa ma ua lē peritomeina o outou loto ma taliga, ua outou teena pea le agaga paia; e pei ona faia e o outou augātamā, ua faapea foʻi ona outou faia.+
52 O ai ea se perofeta e leʻi faasauā i ai o outou augātamā?+ Ioe, na latou fasiotia i latou na muaʻi folafolaina mai le afio mai o lē amiotonu,+ o lē na outou faalataina ma fasiotia.+
53 Ua outou maua foʻi le Tulafono na tuuina mai e ala i agelu,+ ae e tou te leʻi tausia lava.”
54 O lea, ina ua latou faalogo i nei mea, ona matuā tigā ai lea o o latou loto ma lilivau o latou nifo iā te ia.
55 Ae ona ua tumu o ia i le agaga paia, ua ia tepa aʻe ai i le lagi ma iloa atu ai le mamalu o le Atua, ma Iesu o loo tū i le itu taumatau o le Atua,+
56 ma faapea atu: “Faauta! ua ou iloa atu ua avanoa le lagi ma le Atalii o le tagata+ o loo tū i le itu taumatau o le Atua.”+
57 Ona latou feʻei leotetele lea, ua pupuni foʻi o latou taliga i o latou lima, ma taufetuli faatasi atu iā te ia.
58 Ua latou lafo o ia i tua o le aai, ona fetogi lea iā te ia i maa.+ Ua tuu e ē na molimau+ o latou ofu tele i vae o se tauleʻaleʻa e igoa iā Saulo.+
59 A o latou fetogi atu pea maa iā Setefano, ua ōle atu o ia ma faapea atu: “Le Alii e, Iesu, ia e talia mai loʻu agaga.”
60 Ona ia tootuli lea ma alaga i se leo malosi: “Ieova* e, aua e te tuuaʻia i latou i lenei agasala.”+ Ina ua mavae ona fai atu o nei upu, ona oti ai lea o ia.*
Faamatalaga Pito i Lalo
^ Po o le “faileagaina.”
^ Po o le “ma augātamā.”
^ Pe atonu “ua faia foʻi faapea e Isaako iā Iakopo.”
^ Po o le “ua iai saito.”
^ Po o le “filifili.”
^ Po o le “alu e vaai po o ā mai ona uso.”
^ Tagaʻi i le Uiga o Upu.
^ Po o “vavega.”
^ Po o “le faleʻie o le molimau.”
^ Ele., “ona moe ai lea o ia i le oti.”
