Galuega a le ʻAuaposetolo 15:1-41
15 Ua ō ifo nisi tagata mai i Iutaia ma aʻoaʻo atu i le ʻauuso e faapea: “Afai e lē peritomeina outou e tusa ai ma le tū a Mose,+ e lē mafai ona faaolaina outou.”
2 Peitaʻi, ina ua mavae sina taimi o fevaevaeaʻi i latou ma fefinaua‘i ma Paulo ma Panapa, ona latou fuafua lea ina ia ō aʻe Paulo, Panapa, ma nisi i le ʻauaposetolo ma toeaina i Ierusalema+ e faatatau i lenei mataupu.*
3 Ua momoli i latou e le faapotopotoga i se vaega o le auala, ona faaauau ai lea ona ō nei tane e ui atu i Foinie ma Samaria. Ua latou faamatala auʻiliʻili atu foʻi le faaliliuina o tagata o nuu ese, ma ua matuā olioli ai le ʻauuso uma.
4 Ina ua taunuu atu i Ierusalema, ua talia fiafia i latou e le faapotopotoga ma aposetolo ma toeaina, ona la faamatala atu lea o le tele o mea ua faia e le Atua e ala iā i laʻua.
5 Peitaʻi, ua tutū i luga nisi mai i le lotu a le ʻau Faresaio o ē ua talitonu ma faapea ane: “E tatau ona peritomeina i latou ma faatonuina e tausia le Tulafono a Mose.”+
6 Ona faapotopoto lea o aposetolo ma toeaina ina ia talanoaina lenei mataupu.
7 Ua tele le fefinaua‘i, ona tulaʻi ai lea o Peteru ma faapea atu iā i latou: “Le ʻauuso e, ua outou iloa lelei, na filifilia aʻu e le Atua mai iā te outou i le taimi ua teʻa, ina ia faalogo tagata o nuu ese i le upu o le tala lelei mai i loʻu gutu ma talitonu ai.+
8 O le Atua foʻi, o lē e silafia loto+ o tagata, na molimau o ia e ala i le tuuina atu o le agaga paia iā i latou,+ e pei foʻi ona ia faia iā i tatou.
9 E na te leʻi faaeseeseina foʻi i tatou ma i latou,+ i lona faamamāina o o latou loto i le faatuatua.+
10 Aiseā la ua outou tofotofo ai i le Atua, i le faaee atu i le ʻausoo o le avega+ e leʻi mafaia e o tatou augātamā, po o i tatou foʻi ona tauaveina?+
11 Nai lo o lea, ua tatou talitonu ua faaolaina i tatou ona o le agalelei faifua o le Alii o Iesu,+ ma e faapena foʻi na tagata.”+
12 Ona lē toe tautatala lea o i latou uma, ma ua latou faalogologo mai iā Panapa ma Paulo, a o la faamatala atu le tele o faailoga ma mea ofoofogia* na faia e le Atua i nuu ese e ala iā i laʻua.
13 Ina ua uma atu a la upu, ona tali mai lea o Iakopo e faapea: “Le ʻauuso e, ia faalogo mai iā te aʻu.
14 Ua uma ona faamatala auʻiliʻili atu e Simeona*+ le uluaʻi taimi na silasila ai le Atua i nuu ese, ina ia filifilia mai ai ni tagata mo lona suafa.+
15 Ua ōgatusa lenei mea ma upu a le ʻau Perofeta e pei ona tusia:
16 ‘Pe a mavae nei mea, ou te toe sau ma toe faatūina le faleʻie* o Tavita ua paʻū; ou te toe fausia foʻi ana mea ua faatafunaina ma toe faafoʻisia,
17 ina ia mafai ai e tagata ua totoe ona matuā saʻili iā Ieova,* faatasi ma tagata o nuu uma, ia ua faaigoaina i loʻu igoa, ua fetalai mai ai Ieova,* o lē ua faia nei mea+
18 na iloa mai i aso anamuā.’+
19 O lea la, o laʻu filifiliga,* ia aua neʻi faapopoleina tagata o nuu ese o ē ua liliu atu i le Atua,+
20 ae ia tusi atu iā i latou ina ia taumamao mai i mea ua leaga ona o le ifo i tupua,+ ma amioga lē mamā taufeusuaʻiga,*+ ma mea ua titina,* ma le toto.+
21 Auā talu mai aso anamua, e iai i latou na talaʻi mai i lea aai i lea aai e faatatau iā Mose, auā na faitauina i sunako i sapati uma+ mea na ia tusia.”
22 Ona filifili lea o le ʻauaposetolo, ma toeaina faapea le faapotopotoga atoa, e aauina atu i Anetioka faatasi ma Paulo ma Panapa, nisi o tane ua filifilia mai iā i latou; na latou aauina atu Iuta o lē ua igoa iā Pasapa faapea ma Sila,+ o ē e taʻimua i le ʻauuso.
23 Ua latou avatu iā i latou nei le tusi e faapea:
“O i matou o le ʻauaposetolo ma toeaina, o o outou uso, ua matou tusi atu iā te outou le ʻauuso e lē o ni Iutaia o loo i Anetioka,+ Suria, ma Kilikia: Talofa lava!
24 Ua matou faalogo ua iai nisi o i matou ua ō atu ma faapopoleina outou i a latou upu,+ ua taumafai e faaliliuese outou, e ui lava e matou te leʻi faatonuina i latou.
25 O lea ua matou malilie faatasi ai, e filifilia ni tane e aauina atu iā te outou faatasi ma o matou uso pele o Panapa ma Paulo,
26 o tane ua tuuina atu o laʻua ola, ona o le suafa o lo tatou Alii o Iesu Keriso.+
27 Ua matou aauina atu foʻi Iuta ma Sila, ina ia la faamatala atu mea lava nei.+
28 Auā ua tonu i le agaga paia+ ma i matou nei, ia lē faaopoopo atu nisi avega iā te outou, ae e na o mea nei e tatau:
29 ia faaauau ona taumamao mai i mea ua faataulaga mo tupua,+ ma le toto,+ ma mea ua titina,*+ ma amioga lē mamā taufeusuaʻiga.*+ Afai tou te matuā taumamao mai i nei mea, ona lelei ai lea o outou. Ia outou manuia!”
30 Ina ua tuuina atu nei tane e ō, ona latou ō ifo lea i Anetioka ma latou faapotopoto faatasi le toʻatele o le ʻausoo, ma tuu atu le tusi iā i latou.
31 Ina ua uma ona faitauina le tusi, ona latou olioli lea i faalaeiauga ua maua mai ai.
32 Talu ai o Iuta ma Sila o ni perofeta, ua la faalaeiau ai le ʻauuso i le tele o lauga ma faamalosia i latou.+
33 Ua mavae sina taimi, ona tuu atu lea o i laʻua e le ʻauuso e ō ma le filemu i ē na aauina mai i laʻua.
34 * ——
35 Peitaʻi, ua nonofo pea Paulo ma Panapa i Anetioka, ma ua la aʻoaʻo ma folafola atu le tala lelei o le afioga a Ieova,* faatasi ai foʻi ma isi e toʻatele.
36 Ua mavae ni nai aso, ona faapea atu lea o Paulo iā Panapa: “Seʻi o ta toe foʻi e asiasi i uso i aai uma na ta talaʻia ai le afioga a Ieova,* e vaai po o ā mai i latou.”+
37 Ua maumauaʻi foʻi Panapa e ave Ioane, o lē ua igoa iā Mareko.+
38 Peitaʻi, e leʻi manaʻo Paulo e ave o ia, auā na ia tuua i laʻua i Pafulia, ma e leʻi ō ma i laʻua i le galuega.+
39 O lea, ua matuā feita ai i laʻua ma fefinaua‘i, ona la ō eseese ai lea; ua alu Panapa+ ma ave Mareko ma folau atu i Kuperu.
40 Ae ua filifilia e Paulo ia Sila, ma ina ua uma ona tatalo le ʻauuso iā Ieova* ina ia tausia o ia, ona la ō ai lea.+
41 Ua la ō atu i Suria ma Kilikia, ua faamalosiau i faapotopotoga.
Faamatalaga Pito i Lalo
^ Po o le “finauga.”
^ Po o “vavega.”
^ E faasino atu iā Peteru.
^ Po o le “faleapitaga; fale.”
^ Po o le “o loʻu manatu.”
^ Po o “mea ua tapē e aunoa ma le faaaluina o le toto.”
^ O le upu Eleni, o le por·nei′a. Tagaʻi i le Uiga o Upu.
^ O le upu Eleni, o le por·nei′a. Tagaʻi i le Uiga o Upu.
^ Po o “mea ua tapē e aunoa ma le faaaluina o le toto.”
