Galuega a le ʻAuaposetolo 3:1-26
3 Ua ō aʻe Peteru ma Ioane i le malumalu i le itula e fai ai tatalo, o le itula lea e iva,*
2 ma ua sii atu se tamāloa na fanau mai o pipili. E latou te tuu o ia i aso uma i tafatafa o le faitotoʻa o le malumalu ua taʻua o le Matagofie, ina ia ʻaisi atu ai o ia mo ni meaalofa mai iā i latou e ō atu i le malumalu.
3 Ina ua ia iloa atu Peteru ma Ioane o le a ulu i le malumalu, ona ia talosaga atu lea iā i laʻua mo ni meaalofa.
4 Ua pulatoʻa atu Peteru ma Ioane iā te ia ma faapea atu: “Ia vaai mai iā i maʻua.”
5 Ona taulaʻi atu lea o lana vaai iā i laʻua, ma le manatu e maua mai ai se mea mai iā i laʻua.
6 Ae ua fai atu Peteru: “E leai saʻu siliva po o se auro, ae ou te avatu iā te oe le mea lea ua iā te aʻu. I le suafa o Iesu Keriso le Nasareta, inā savali ia!”+
7 Ona tago atu lea o ia i le lima taumatau o le tamāloa ma faatū i luga.+ Ona malolosi ai loa lea o ona vae ma ona tapuvae;+
8 ua oso o ia i luga ma tū,+ ma amata ona savali, ona ulufale atu lea o ia ma i laʻua i le malumalu, ua savali ma osooso ma vivii i le Atua.
9 Ua iloa atu foʻi e tagata uma o ia ua savali ma vivii i le Atua.
10 Ua latou iloa foʻi o le tagata lenei e masani ona nofo i le Faitotoʻa Matagofie o le malumalu,+ ma ʻaisi mo ni meaalofa. Ona matuā ofo ai lea o i latou ma ua matuā fiafia lava i le mea ua tupu iā te ia.
11 A o pipii atu pea le tamāloa iā Peteru ma Ioane, ua taufetuli faatasi atu tagata uma iā i latou i le mea ua taʻua o le Faapaologa o Solomona,+ ua matuā ofo i latou.
12 Ina ua vaai atu Peteru i lenei mea, ona ia faapea atu lea i tagata: “Tagata o Isaraelu e, aiseā ua outou matuā ofo ai i lenei mea? Aiseā foʻi ua outou pulatoʻa mai ai iā i maʻua, e peiseaʻī o so maʻua mana, po o lo maʻua faamaoni i le Atua ua mafai ai ona savali o ia?
13 O le Atua o Aperaamo, Isaako ma Iakopo,+ o le Atua o o tatou augātamā, ua ia faamamaluina lana Auauna+ o Iesu,+ o lē na outou tuuina atu+ ma faafitia i luma o Pilato, e ui na loto Pilato e faasaʻoloto o ia.
14 Ioe, na outou faafitia lē e paia ma amiotonu, ma na outou talosaga e tatala atu iā te outou sē e fasioti tagata,+
15 ae outou fasiotia le Sui Sili o le ola.+ Peitaʻi, ua toe faatūina o ia e le Atua mai i le oti, ma ua avea i maʻua ma molimau i lenei mea.+
16 Ona o lona suafa ma lo ma faatuatua i lona suafa, ua malosi ai lenei tagata, o lē ua outou vāai i ai ma iloa. O lo ma faatuatua foʻi iā te ia ua malosi lelei ai le tino o lea tagata o loo i o outou luma.
17 O lenei le ʻauuso e, ua ou iloa na outou faia lenei mea ma le lē iloa+ e pei foʻi o o outou taʻitaʻi.+
18 Peitaʻi, o le auala lenei ua faataunuu ai e le Atua mea na ia muaʻi folafolaina mai, e ala i fofoga o perofeta uma e faapea, o le a faapuapuagatiaina lana Keriso.+
19 “O le mea lea, inā salamō ia+ ma liliu,+ ina ia soloiesea a outou agasala,+ ma ia oo mai ai le taimi e toe faafouina ai mai iā Ieova lava ia*
20 ma auina mai e ia le Keriso, ua tofia mo outou, o Iesu lea.
21 E tatau ona iai pea o ia i le lagi seʻia oo i le taimi e toe faafoʻisia ai mea uma, lea na fetalai mai ai le Atua i fofoga o ana perofeta paia i aso ua mavae.
22 O le mea moni, ua fai mai Mose: ‘E tofia e Ieova* lo outou Atua mo outou se perofeta e pei o aʻu, mai i o outou uso.+ E tatau ona outou faalogo i mea uma e fai atu ai o ia iā te outou.+
23 Ioe, o sē e lē faalogo i lenā Perofeta, e matuā faaumatia o ia mai i tagata.’+
24 O perofeta uma foʻi e amata mai iā Samuelu ma ē na sosoo mai ai, o ē na faia valoaga, na latou faailoa manino mai foʻi e uiga i aso nei.+
25 O outou o atalii o perofeta ma le feagaiga lea na osia e le Atua ma o outou augātamā,+ ma faapea atu iā Aperaamo: ‘O lau fanau e manuia ai aiga uma o le lalolagi.’+
26 Ina ua tofia e le Atua lana Auauna, na ia auina atu muamua o ia iā te outou,+ e faamanuia atu iā te outou, e ala i le faaliliuese o outou taʻitoʻatasi mai i a outou amioga leaga.”
Faamatalaga Pito i Lalo
^ E faasino atu i le pe ā o le 3 i le afiafi.
