Le Auala e Mafai ai Ona e Ola e Faavavau

PLAY

Tali a le Tusi Paia

Ua folafola mai i le Tusi Paia: “O lē e faia le finagalo o le Atua e ola e faavavau.” (1 Ioane 2:17, Le Tusi Paia—Easy-to-Read Version) O le ā e finagalo le Atua e te faia?

Aʻoaʻo atili e faatatau i le Atua ma lona Alo o Iesu. Ina ua ia tatalo atu i le Atua, na faapea mai Iesu: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.” (Ioane 17:3) O le ā e aofia i le “iloa” o le Atua ma Iesu? E mafai ona tatou iloa i laʻua e ala i le suʻesuʻeina o le Tusi Paia ma faatatau mea ua tatou faitau iai i o tatou olaga. a O loo faailoa mai i le Tusi Paia manatu o Ieova le Atua, o Ia o le Puna o le ola. (Galuega 17:24, 25) E tatou te faitau foʻi i le Tusi Paia e faatatau iā Iesu, o lē na aʻoaʻoina mai “upu o le ola e faavavau.”—Ioane 6:67-69.
Ia faatuatua i le taulaga togiola a Iesu. Na afio mai Iesu i le lalolagi ina “ia auauna atu, ma foaʻi atu lona ola e fai ma togiola.”(Mataio 20:28) O le taulaga togiola na faia e Iesu, ua maua ai le avanoa mo tagata e ola ai e faavavau i le Parataiso i luga o le lalolagi. b (Salamo 37:29) Na fetalai Iesu: “Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) Mātau, e tele atu mea e manaʻomia nai lo le na o le talitonu iā Iesu. E manaʻomia ona tatou ʻfaatuatua iā te ia,’ e ala i le filifili e ola e ogatusa ma ana aʻoaʻoga ma le faia o le finagalo o lona Tamā.—Mataio 7:21; Iakopo 2:17.
Atiaʻe se faiā malosi ma le Atua. E finagalo le Atua ia tatou vavalalata atu iā te ia ma avea ma ana uō. (Iakopo 2:23; 4:8) E soifua e faavavau le Atua. E lē taitai ona maliu o ia, ma e finagalo o ia e ola e faavavau ana uō. E ala mai lana Afioga, ua faailoa mai e le Atua lona finagalo mo i latou o saʻili iā te ia: “Tau ina ia tumau pea e faavavau o outou loto.”—Salamo 22:26.

Faamatalaga Sesē e Faatatau i le Ola e Faavavau

Faamatalaga Sesē: O taumafaiga a tagata o le a iʻu ai i le ola e faavavau.

Mea moni: E ui lava ua folafola mai o nisi fualaau ma vailaau o le a ola umi ai se tagata, ae o na taumafaiga uma e lē iʻu atu ai i le ola e faavavau. Ua na o le Atua e mafai ona ia aumaia le ola e faavavau, ona e na o ia “o le puna o le ola.” (Salamo 36:9) Ua Ia folafola mai o le a Ia “faaumatia le oti e faavavau” ma foaʻi mai le ola e faavavau i tagata faamaoni uma.—Isaia 25:8; 1 Ioane 2:25.

Faamatalaga sesē: E na o tagata mai se ituaiga patino o le a ola e faavavau.

Mea moni: E lē faailoga tagata le Atua. Ae “o lē e mataʻu iā te ia i nuu uma lava, ma fai le amiotonu, e talia e ia.” (Galuega 10:34, 35) O tagata mai atunuu ma gagana eseese e usiusitaʻi i le Atua, e mafai ona ola e faavavau.

Faamatalaga sesē: E lē manaia le ola e faavavau.

Mea moni: O lenei meaalofa o le ola e faavavau e mai i le Atua, o lē e alofa iā i tatou ma finagalo ia tatou fiafia. (Iakopo 1:17; 1 Ioane 4:8) E na te silafia lelei, e tatou te manaʻomia ni galuega aogā ina ia tatou maua ai le fiafia. (Failauga 3:12) Mo i latou o le a ola e faavavau i le lalolagi, ua folafola mai le Atua o le a latou maua le faamalieina, o galuega aogā lea e latou te maua ai le fiafia ma ē pele iā i latou.—Isaia 65:22, 23.

E pei ona tatou iloa, o i latou o le ola e faavavau, o le a faaauau pea ona latou aʻoaʻoina nisi mea fou e faatatau i Lē na foafoaina mea faapea le tele o mea na ia foafoaina. Na ia faia le tagata ma le faanaunauga ia ola e faavavau ma aʻoaʻo e faatatau iā te ia, e ui lava e “suʻesuʻeina pea e tagata galuega a le Atua na ia faia mai i le amataga e oo i le iʻuga.” (Failauga 3:10, 11) O lea, o i latou o le a ola e faavavau, o le a tele pea mea latou te aʻoaʻoina ma faia.

a Ua ofo atu e Molimau a Ieova se suʻesuʻega faale-Tusi Paia. Mo nisi faamatalaga, maimoa i le vitiō O le ā e Faia i se Suʻesuʻega Faale-Tusi Paia?

b Tagaʻi i le mataupu “Na Faapefea Ona faasaoina i Tatou Iesu?”