O le Tusi a Iakopo 2:1-26
2 Oʻu uso e, po ua outou faailoga tagata ea a o outou tausisi i le faatuatua i lo tatou Alii mamalu o Iesu Keriso?+
2 Auā pe afai e ulu atu se tagata i a outou faatasitasiga ma ni mama auro i ona lima ma se ofu manaia, ae ulu atu foʻi ma se tagata mativa ma se ofu palapalā,
3 pe e tou te talia fiafia ea o lē ua ofu i le ofu manaia ma faapea atu, “Inā alaala ia oe i lenei mea lelei,” ae ua outou fai atu i le tagata mativa, “Inā tū ia oe i inā,” pe “Nofo ia i inei i lalo o le mea e tū ai oʻu vae”?+
4 Pe afai o lea, po ua outou lē faaituʻau ea,+ ma fai outou ma faamasino e faia ni faaiʻuga leaga?+
5 Faalogo mai ia oʻu uso pele e, po ua lē filifilia ea e le Atua o ē e matitiva i le vaaiga a le lalolagi ina ia mauʻoa i le faatuatua,+ ma avea ma suli o le Malo, lea na ia folafola mai i ē e alolofa iā te ia?+
6 Peitaʻi, ua outou faamāsiasi i le tagata mativa. Pe e lē o tagata mauʻoa ea o loo faasauā iā te outou,+ ma molia* outou i le faamasinoga?
7 Po ua latou lē fai upuleaga ea i le suafa lelei ua valaauina ai outou?
8 Afai ua outou usiusitaʻi i le tulafono a le tupu e tusa ai ma tusitusiga paia, “Ia e alofa atu i lou tuaoi e pei o oe lava iā te oe,”+ ua lelei lava lea.
9 Ae afai e faaauau ona outou faailoga tagata,+ ua outou faia la le agasala, ma ua taʻusalaina ai outou e le tulafono o ni tagata solitulafono.+
10 Auā afai e tausia e se tasi le Tulafono uma ae solia se poloaʻiga e tasi, ua solia e ia tulafono uma.+
11 Auā o lē na fetalai, “Aua e te mulilua,”+ na fetalai foʻi, “Aua e te fasioti tagata.”+ Afai e te lē mulilua ae e te fasioti tagata, ua e solia lava le tulafono.
12 Ia faaauau ona outou tautatala ma amioaʻi faapea, e pei o ē o le a faamasinoina e tusa ma le tulafono a tagata saʻoloto.*+
13 Auā o le tagata e lē alofa mutimutivale, e faamasinoina o ia e aunoa ma le alofa mutimutivale.+ E manumalo le alofa mutimutivale i le faamasinoga.
14 Oʻu uso e, o le ā le aogā o le faapea mai o se tasi e faatuatua ae e leai ni ana galuega?+ Pe e mafai ea e lenā faatuatua ona faaolaina ai o ia?+
15 Afai ua iai ni uso po o ni tuafāfine ua tau leai ni ofu,* ma ua lē lava a latou meaʻai mo le aso,
16 o le ā le aogā pe a fai atu se tasi o outou iā i latou: “Inā ō ia ma le fifilemu, ia māfanafana ma ia maoona,” ae e tou te lē foaʻi atu ni mea e manaʻomia mo o latou tino?+
17 E faapea foʻi ona mate le faatuatua pe a leai ni galuega.+
18 Peitaʻi, e faapea mai se tasi: “Ua iā te oe le faatuatua, ae ua iā te aʻu galuega. Inā faaali mai ia lou faatuatua e aunoa ma galuega, ae ou te faaali atu loʻu faatuatua e ala i aʻu galuega.”
19 Ua e talitonu e toʻatasi lava le Atua. Ioe, ua lelei lava lea. Ae e talitonu foʻi temoni ma latou tetemū.+
20 Le tagata valea e, pe e te lē iloa ea, e lē aogā le faatuatua pe a leai ni galuega?
21 Pe e leʻi taʻuamiotonuina ea Aperaamo lo tatou tamā i galuega, ina ua ia ofoina atu lona atalii o Isaako i luga o le fata faitaulaga?+
22 Ua outou iloa na galulue faatasi lona faatuatua ma ana galuega, ma o ana galuega na faaatoatoaina ai lona faatuatua,+
23 ua taunuu ai foʻi tusitusiga paia e faapea: “Na faatuatua Aperaamo iā Ieova,* ma na ia silasila ai iā te ia o lē e amiotonu,”+ ma na taʻua ai o ia o le uō a Ieova.*+
24 Ua outou iloa foʻi e taʻuamiotonuina le tagata i galuega, ae e lē na o le faatuatua.
25 Pe e leʻi faapena foʻi ona taʻuamiotonuina Raava le fafine talitane i ana galuega, ina ua ia talileleia avefeʻau ma aauina atu i laʻua i se isi ala?+
26 O le mea moni, e pei lava ona oti le tino pe a leai le agaga,*+ e faapea foʻi ona mate le faatuatua pe a leai ni galuega.+
Faamatalaga Pito i Lalo
^ Ele., “fetoso.”
^ Ele., “le tulafono o le saʻolotoga.”
^ Ele., “ua lē lavalavā.”
^ Po o le “mānava.”