Faamaumauga a Ioane 17:1-26
17 Ua fetalai atu Iesu i nei mea, ona tepa aʻe lea o ona fofoga i le lagi, ua faapea atu: “Loʻu Tamā e, ua oo mai le itula. Ia e faamamaluina lou atalii, ina ia faamamaluina ai oe e lou atalii.+
2 Ia faia lenei mea, e pei lava ona e tuuina mai iā te ia le pule i tagata uma,+ ina ia avatu e ia le ola e faavavau+ iā i latou uma ua e tuuina mai iā te ia.+
3 O le ola e faavavau+ foʻi lenei, ia latou iloa oe,* le Atua moni e toʻatasi,+ atoa ma lē na e auina mai, o Iesu Keriso.+
4 Ua ou faamamaluina oe i le lalolagi,+ ma faamāeʻaina le galuega na e tuuina mai iā te aʻu e fai.+
5 O lenei, loʻu Tamā e, ia e faamamaluina aʻu pe a ou iai i ou autafa, i le mamalu na ou maua a o ta faatasi, a o leʻi faia tagata i le lalolagi.+
6 “Ua ou faailoa atu lou suafa i tagata ua e foaʻi mai iā te aʻu i le lalolagi.+ O ou tagata i latou, ma ua e foaʻi mai iā te aʻu ma ua latou tausia* lau afioga.
7 Ua latou iloa nei, o mea uma ua e foaʻi mai iā te aʻu, o au mea ia;
8 auā ua ou tuuina atu iā i latou au fetalaiga na e tuuina mai iā te aʻu,+ ma ua latou talia au fetalaiga ma iloa ai, na ou sau e fai ma ou sui,+ ma ua latou talitonu na e auina mai aʻu.+
9 Ua ou talosaga atu mo i latou; ou te lē talosaga atu mo le lalolagi, ae mo i latou na e foaʻi mai iā te aʻu, auā o ou tagata i latou;
10 ma o aʻu mea uma, o au mea ia, ma o au mea, o aʻu mea foʻi ia,+ ma ua faamamaluina aʻu ona o i latou.
11 “O loo ou alu atu iā te oe; ou te lē toe iai i le lalolagi, a o i latou, e i le lalolagi lava i latou.+ Le Tamā paia e, ia e leoleo iā i latou+ ona o lou suafa lea na e tuuina mai iā te aʻu, ina ia tasi* i latou e pei foʻi ona tasi* i taʻua.+
12 A o oʻu faatasi ma i latou, sa masani ona ou leoleo iā i latou+ ona o lou suafa lea na e tuuina mai iā te aʻu. Na ou leoleo iā i latou ma e leai se tasi o i latou ua faaumatia,+ seʻi vaganā le atalii o le faaumatiaga,+ ina ia taunuu ai tusitusiga paia.+
13 A o lenei o loo ou alu atu iā te oe, ma ua ou fai atu nei mea i le lalolagi, ina ia faatumuina i latou i loʻu olioli.+
14 Ua ou tuuina atu au afioga iā i latou, ae ua ʻinoʻino le lalolagi iā i latou, auā e lē o ni tagata o le lalolagi i latou,+ e pei foʻi o aʻu, e lē o aʻu o se tagata o le lalolagi.
15 “Ou te lē talosaga atu iā te oe, ina ia aveesea i latou mai le lalolagi, ae ina ia leoleo iā i latou ona o lē ua leaga.+
16 E lē o ni tagata o le lalolagi i latou,+ e pei foʻi o aʻu, e lē o aʻu o se tagata o le lalolagi.+
17 Ia faapaiaina i latou* i le upu moni;+ o lau afioga o le upu moni lea.+
18 E pei ona e auina mai aʻu i le lalolagi, ua ou aauina atu foʻi i latou i le lalolagi.+
19 Ou te faapaiaina aʻu lava. Ou te faia lenei mea mo i latou, ina ia faapaiaina ai foʻi i latou e ala i le upu moni.
20 “Ua ou talosaga atu iā te oe e lē mo na o i latou nei, ae o i latou foʻi ua faatuatua iā te aʻu e ala i a latou upu,
21 ina ia tasi i latou uma+ e pei ona autasi oe le Tamā ma aʻu, o aʻu foʻi e autasi ma oe,+ ina ia autasi foʻi i latou ma i taʻua, ina ia talitonu ai le lalolagi na e auina mai aʻu.
22 Ua ou tuuina atu iā i latou le mamalu na e tuuina mai iā te aʻu, ina ia tasi i latou e pei ona tasi i taʻua.+
23 Ou te autasi ma i latou, ma e autasi oe ma aʻu, ina ia atoatoa ai ona tasi* i latou, ina ia iloa ai e le lalolagi na e auina mai aʻu, ma ua e alofa iā i latou e pei ona e alofa mai iā te aʻu.
24 Loʻu Tamā e, ou te manaʻo i ē ua e tuuina mai iā te aʻu, ina ia iai faatasi ma aʻu i le mea ou te iai,+ ina ia latou vāai i loʻu mamalu ua e tuuina mai iā te aʻu, auā ua e alofa mai iā te aʻu a o leʻi faavaeina le lalolagi.+
25 Loʻu Tamā amiotonu e, e moni e leʻi iloa lava oe e le lalolagi,+ ae ua ou iloa oe,+ ma ua iloa foʻi e i latou nei, na e auina mai aʻu.
26 Ua ou faailoa atu lou suafa iā i latou, ma saga faailoa atu,+ ina ia iā i latou le alofa lea na e alofa mai ai iā te aʻu, ma ou autasi ai ma i latou.”+
Faamatalaga Pito i Lalo
^ Po o le “aʻoaʻo le poto e faatatau iā te oe.” Ua faaalia e le veape Eleni, o se gaoioiga e faaauau pea ona fai.
^ Po o le “usiusitaʻi i.”
^ Po o le “autasi.”
^ Po o le “autasi.”
^ Po o le “Ia vavaeese i latou.”
^ Po o le “autasi.”
