E tatou te maua mai le Tusi Paia se taʻitaʻiga e sili ona lelei mo le faia o filifiliga. E fesoasoani mai ia tatou “maua le atamai [ma le] malamalama.” (Faataoto 4:5) O nisi taimi e faailoa mai ai le filifiliga e sili ona lelei. E aumaia ai foʻi ni fautuaga e fesoasoani iā i tatou i le faia o filifiliga atamai.

I lenei mataupu

•  Fesoasoani mo oe i le faia o filifiliga lelei

•  Pe e tatau ona ou suia se filifiliga na ou faia muamua?

•  E faapefea pe afai na ou faia se filifiliga lē lelei ae e lē mafai ona ou suia?

•   Aua le faatopelauina le faia o se filifiliga. Ua faapea mai le Tusi Paia: “O le tagata e iai le utaga mamao, e na te iloilo lelei ona laasaga.” (Faataoto 14:15) Pe a faatopelau ona faia sau filifiliga, e ono e misia ai nisi o faamatalaga tāua. Ia faaalu se taimi e iloilo lelei ai ma le faaeteete au faaiʻuga.—1 Tesalonia 5:21.

•   Aua neʻi faavaea au filifiliga i ou faalogona. Ua lapataʻi mai le Tusi Paia e lē tatau ona tatou maufaatuatuaina i taimi uma o tatou loto. (Faataoto 28:26; Ieremia 17:9) Mo se faataʻitaʻiga, e ono lē mafai ona tatou faia se filifiliga lelei pe a tatou feita, mafatia, lotovaivai, lē fiafia pe matuā lagona foʻi le lē lavā.—Faataoto 24:10; 29:22.

•   Tatalo mo le atamai. (Iakopo 1:5) E fiafia le Atua e tali mai i na ituaiga tatalo. O ia o se Tamā alofa e manaʻo i lana fanau e ʻalofia faafitauli. “Auā o Ieova e na te foaʻi mai le atamai; e mai i lona fofoga foʻi le poto ma le faautaga loloto.” a (Faataoto 2:6) E na te foaʻi mai lenā atamai, ma e na o lana Afioga le Tusi Paia e mafai ona maua ai.—2 Timoteo 3:16, 17.

•   Ia faia ni saʻiliʻiliga. E te manaʻomia ni faamatalaga maufaatuatuaina ina ia e faia ai se filifiliga lelei. E pei ona taʻua i le Tusi Paia, “o le tagata atamai e faalogo ma ave i fale faatonuga.” (Faataoto 1:5) O fea e tatou te maua ai faamatalaga e maufaatuatuaina ma aogā?

   Muamua, ia vaai po o le ā se manatu o le Tusi Paia lava ia e faatatau i fesili o loo e mafaufau i ai. E sili atu ona iloa e Lē na foafoaina i tatou le mea e sili ona lelei mo i tatou, ma e maua i lana Afioga fautuaga e sili ona lelei. (Salamo 25:12) O nisi filifiliga e faailoa manino mai e le Tusi Paia le mea e tatau ona fai e ala mai i tulafono po o poloaʻiga. (Isaia 48:17, 18) Ae o isi mataupu e lē o faailoa patino mai ai le mea e tatau ona fai. Nai lo o lea, o loo aumaia ai ni taʻitaʻiga e ala mai i mataupu silisili. E mafai ona taʻitaʻia atu ai i tatou i le faia o filifiliga lelei e tusa pe e ese ma le filifiliga a isi tagata. Ina ia suʻe se mau o le Tusi Paia e talafeagai, ia faia ni saʻiliʻiliga i mataupu ma lomiga faale-Tusi Paia e pei o lomiga o loo maua i luga o lenei tuatusi. b

   O nisi filifiliga e manaʻomia ai ona iloilo nisi puna maufaatuatuaina o faamatalaga. Mo se faataʻitaʻiga, a o leʻi faatauina se oloa aemaise lava i oloa taugatā, e atamai ona faia muamua ni saʻiliʻiliga i lenā oloa ma le kamupani na gaosi mai ai, e aofia ai tuutuuga pe a leaga le oloa pe manaʻomia ona toe faafoʻi. E tatau foʻi ona faamautinoa o le oloa tonu lava lea e te manaʻomia.

   Ua faapea mai le Tusi Paia: “E faalēaogāina fuafuaga pe a lē iai ni talanoaga i mataupu faalilolilo.” (Faataoto 15:22) O lea a o leʻi faia se filifiliga, iloilo muamua faamatalaga maufaatuatuaina a se tasi. O se faaaʻoaʻoga talanoa muamua ma se fomaʻi a o leʻi faia sau faaiʻuga i se togafitiga faafomaʻi. (Mataio 9:12) I nisi tulaga, e lelei foʻi lou talanoa i se tasi sa ia fesagaʻia le faafitauli lea ua e fesagaʻia foʻi. Ae ia e manatua, e lē faia e le tagata o loo lua talanoa le filifiliga mo oe ma aafia ai i iʻuga o lenā filifiliga.—Kalatia 6:4, 5.

•   Iloilo totoʻa vala eseese uma. E faavae mai i faamatalaga uma ua e aoaoina mai, ona fai loa lea o le lisi o au filifiliga e fai faatasi ai ma itu lelei ma itu lē lelei o filifiliga taʻitasi. Ia iloilo ma le faamaoni āuga e mafai ona iʻu i ai au filifiliga. (Teuteronome 32:29) Mo se faataʻitaʻiga, e faapefea i au filifiliga ona aafia ai oe, lou aiga ma isi? (Faataoto 22:3; Roma 14:19) Pe a iloilo faatasi na fesili ma aʻoaʻoga a le Tusi Paia, o le a fesoasoani iā te oe e faia ai se filifiliga lelei ma atamai.

•   Faia o le filifiliga. O nisi taimi e tatou te faatalatū ai i le faia o filifiliga ona e tatou te lē o mautonu. Ae pe a faaauau pea ona lē mautonu, e ono iʻu ane i le misia o le avanoa e faia ai se filifiliga po o le iʻu foi i ni iʻuga lē lelei. Pe a faafaigofie le manatu, o le lē faia o se filifiliga e tutusa lelei ma le faia o se filifiliga lē lelei. E mafai ona fesoasoani mai le Tusi Paia e malamalama ai i le manatu e ala i le faatusa atu o lea tulaga i faatoʻaga. “Pe a e faatali seʻiloga e uma le matagi po o le taimi foʻi e lelei ai le tau, e lē mafai lava ona e totōina se laau ma selesele mai ai se mea.”—Failauga 11:4, Good News Translation.

 Ia manatua, e oo lava i le filifiliga e sili ona lelei, e lē mafai ona lelei atoatoa. E masani foʻi o le filifilia o se mea e aofia ai le faataulaga o se isi mea. E ono tutupu ai foʻi ni mea tatou te leʻi faatalitalia. (Failauga 9:11) O lea, faaaogā faamatalaga e sili ona lelei o loo maua ma filifili le mea e sili ona taulau manuia.

 E lē o filifiliga uma e te faia o filifiliga faaiʻu na. E ono suia le tulaga o mea iā te oe, po lau filifiliga foʻi na fai muamua ua iai ni iʻuga e te leʻi faatalitalia. E tāua ai le toe mafaufau lelei i le tulaga o mea ma faia se isi filifiliga e maua ai ni iʻuga lelei.

 O nisi filifiliga e lē tatau ona toe suia. (Salamo 15:4) Mo se faataʻitaʻiga, e faatalitalia e le Atua ulugalii faaipoipo e tumau pea a latou tautoga. c (Malaki 2:16; Mataio 19:6) Pe a tulaʻi mai ni faafitauli i se faaipoipoga, ia faia taumafaiga uma e foʻia ai ae lē o le faamuta.

 E iai le taimi e tatou te faia uma ai filifiliga lē lelei ma lē atamai. (Iakopo 3:2) E tatou te ono lagona ai le salamō po o le nofosala, o ni uiga masani. (Salamo 69:5) Pe afai e faapena o tatou faalogona i nisi taimi, o se mea lelei pe a mafai ona taofia ai i tatou mai i le toe faia o lenā mea sesē! (Faataoto 14:9) Peitaʻi, ua faalaeiau mai le Tusi Paia e faatatau i le soona uaʻi atu i faalogona nofosala, e mafai ona faavaivaia ai i tatou ma lē mafaufau lelei ai. (2 Korinito 2:7) d Ua faapea mai le Tusi Paia: “E alofa mutimutivale Ieova ma alofa fua.” (Salamo 103:8-13.) Ia taumafai e aʻoaʻo mai i filifiliga lē lelei e leʻi mafai ona e suia ma faia au taumafaiga lelei e faaleleia ai tulaga o mea.