යොහන් 6:1-71
6 ඉන්පසු යේසුස් ගලීල මුහුද එනම්, ටයිබීරියස් මුහුද හරහා ගොස් ගොඩ බැස්සේය.+
2 විශාල සමූහයක් යේසුස් අසනීප වී සිටි අයව ආශ්චර්යවත් ලෙස සුව කරන ආකාරය දැක ඔහු පසුපසම ගමන් කළෝය.+
3 යේසුස් කන්දකට නැඟ,+ තම ගෝලයන් සමඟ එහි ඉඳගත්තේය.
4 ඒ කාලයේදී යුදෙව්වරුන්ගේ උත්සවයක් වූ පාස්කුව+ ළඟා වී තිබිණ.
5 තමා ළඟට විශාල සමූහයක් පැමිණෙන ආකාරය දුටු යේසුස්, ෆිලිප්ට මෙසේ කීවේය. “මේ අයට කන්න දෙන්න අපි රොටි මිල දී ගන්නේ කොහෙන්ද?”+
6 ඒ අවස්ථාවේදී තමා කරන්න යන දේ යේසුස් දැන සිටි නිසා ඔහු ඒ ප්‍රශ්නය ෆිලිප්ගෙන් ඇසුවේ ඔහුව සෝදිසි කර බැලීම සඳහාය.
7 ෆිලිප් ඔහුට මෙසේ පිළිතුරු දුන්නේය. “අපි ඩිනාරි* දෙසීයක් වියදම් කළත් යන්තමින් හෝ ඔවුන්ගේ කුස පුරවන්න තරම්වත් අවශ්‍ය රොටි ප්‍රමාණය අපට මිල දී ගන්න බැරි වෙයි.”+
8 එවිට ඔහුගේ ගෝලයෙක් වූ අන්දෘ එනම්, සීමොන් පේතෘස්ගේ සහෝදරයා ඔහුට මෙසේ කීවේය.
9 “අපි ළඟ දැනට තිබෙන්නේ මේ කුඩා පිරිමි ළමයා ළඟ තිබෙන බාර්ලි රොටි පහයි+ කුඩා මසුන් දෙන්නයි විතරයි. නමුත් මෙච්චර සෙනඟකට මේ ටිකෙන් මොනවා කරන්නද?”+
10 යේසුස් මෙසේ පැවසුවේය. “සියලුදෙනාටම කෑමට ඉඳගන්න කියා කියන්න.”+ එම ස්ථානයේ තණකොළ හොඳින් වැඩී තිබූ නිසා ඔවුන්ට එහි ඉඳගැනීමට පහසු විය. රැස්ව සිටි සෙනඟ අතර පුරුෂයන් පන්දහසක් පමණ සිටියෝය.+
11 යේසුස් එම රොටි ගෙන දෙවිට ස්තුති කර, ඉඳගෙන සිටි අය අතරේ ඒවා බෙදා දුන්නේය. එලෙසම කුඩා මසුන්ද ඔවුන්ට ඇති තරම් බෙදා දුන්නේය.+
12 ඔවුන් කෑම කා තෘප්තියට පැමිණි විට+ ඔහු තම ගෝලයන්ට මෙසේ කීවේය. “කිසිම දෙයක් අපතේ යවන්න එපා. ඉතුරු වී ඇති කෑම එකතු කරන්න.”
13 එම බාර්ලි රොටි පහෙන් ඉතුරු වූ කැබලි ටික එකතු කරගත් විට ඔවුන්ට කූඩ දොළහක් පුරවාගත හැකි විය.+
14 යේසුස් සිදු කළ ආශ්චර්යයන් දුටු ජනයා, “ලෝකයට එන්න සිටින අනාගතවක්තෘ මොහු තමයි”+ කියා පැවසූහ.
15 ඔවුන් එකතු වී ඔහුව අල්ලාගෙන රජකමට පත් කිරීමට අදහස් කරගෙන සිටින බව තේරුම්ගත් යේසුස්, එතැනින් පිටත් වී+ නැවතත් තනිව කන්දට ගියේය.
16 සවස් වූ විට ඔහුගේ ගෝලයෝ ගලීල මුහුද අසලට ගොස්,+
17 ඔරුවකට නැග්ගෝය. ඔවුහු කපර්ණවුම බලා පිටත් වූහ. අඳුර වැටී තිබුණු ඒ මොහොත වන විටත් යේසුස් ඔවුන් වෙතට ඇවිත් සිටියේ නැත.
18 මේ අතරතුරේදී තද සුළඟක් හැමූ නිසා ගලීල මුහුද කැලඹෙන්න පටන්ගත්තේය.+
19 ඔවුන් කිලෝමීටර් පහක් හයක් පමණ ඔරුව පැදගෙන ගිය පසු යේසුස් දිය මත ඇවිදිමින් ඔරුව ළඟට එනවා දුටු විට ඔවුන් තුළ මහත් බියක් ඇති විය.+
20 එවිට යේසුස්, “භය වෙන්න එපා. මේ මමයි”+ කියා ඔවුන්ට පැවසුවේය.
21 එවිට යේසුස්ව ඔරුවට නග්ගවාගන්න ඔවුන් කැමති වූ අතර වැඩි වේලාවක් නොගොස් තම ගමනාන්තය දක්වා පැමිණීමට ඔවුන්ට හැකි විය.+
22 පසු දින එගොඩට වී බලාගෙන සිටි සමූහයා එක කුඩා ඔරුවක් පමණක් එහි තිබුණු බවත් එම ඔරුවට යේසුස් නැග්ගේ නැති බවත් ඔහුගේ ගෝලයන් එයට නැඟ එතැනින් පිටත් වී ගිය බවත් දැනගත්තෝය.
23 මේ අතර ටයිබීරියස් නම් නුවරේ සෙනඟක් ඔරුවල නැඟ, යේසුස් දෙවිට ස්තුති කර සමූහයට රොටි කෑමට දුන් ස්ථානය අසලට පැමිණියෝය.
24 යේසුස්වත් ඔහුගේ ගෝලයන්වත් එහි නොසිටින බව තේරුම්ගත් සමූහයා ඔවුන් පැමිණි කුඩා ඔරුවලම නැඟ, යේසුස්ව සොයමින්+ කපර්ණවුමට ගියෝය.
25 ඔවුහු එගොඩ වී යේසුස්ව හමු වූ විට, “ගුරුතුමනි,+ ඔබ මෙහි ආවේ කොයි වෙලාවේද” කියා ඔහුගෙන් ඇසූහ.
26 යේසුස් ඔවුන්ට මෙසේ පිළිතුරු දුන්නේය. “ඇත්තෙන්ම ඔබ මාව සොයන්නේ ඔබ යම් ලකුණු දුටු නිසා නොව රොටි කා තෘප්තියට පත් වූ නිසයි.+
27 නැති වී යන මෙවැනි ආහාර වෙනුවෙන් ඔබ වෙහෙසෙන්න එපා.+ ඒ වෙනුවට මනුෂ්‍ය පුත්‍රයා ඔබට ලබා දෙන කිසිදා නැති වී නොයන සදාකාල ජීවනයට මඟ පාදන ආහාර ලබාගන්න උත්සාහ කරන්න.+ මන්ද පියාණන්ගේ එනම්, දෙවිගේ අනුමැතිය තිබෙන්නේ මනුෂ්‍ය පුත්‍රයාටයි.”+
28 එහෙයින් ඔවුහු, “දෙවිගේ අනුමැතිය ලබන්න අප කළ යුත්තේ කුමක්ද” කියා ඔහුගෙන් ඇසූහ.
29 යේසුස් මෙසේ පිළිතුරු දුන්නේය. “දෙවිගේ අනුමැතිය ලබන්න නම් ඔහු එවූ තැනැත්තා+ කෙරෙහි විශ්වාසය තබන්න අවශ්‍යයි.”+
30 එවිට ඔවුහු ඔහුට මෙසේ කීවෝය. “ඔබව විශ්වාස කරන්න නම් අපට ලකුණක් හැටියට ඔබ යම් දෙයක් කරන්න අවශ්‍යයි. ඔබ මොන වගේ දෙයක්ද කරන්නේ?+
31 උදාහරණයකට සිතන්න පාළුකරයේ මන්නා+ ආහාරයට ගත් අපේ මුතුන්මිත්තන් ගැන. ලියා තිබෙන ආකාරයටම ‘ඔහු ඔවුන්ට කන්න ස්වර්ගයෙන් ආහාර ලබා දුන්නා.’”+
32 එහෙයින් යේසුස් ඔවුන්ට මෙසේ කීවේය. “ඇත්තෙන්ම මම ඔබට කියන මේ දේ මතක තබාගන්න. ස්වර්ගයෙන් ඔබට ආහාර ලබා දුන්නේ මෝසෙස් නොවෙයි. එසේම ස්වර්ගයෙන් ඔබට සැබෑ ආහාරය ලබා දෙන්නෙත් මගේ පියාණන්.+
33 දෙවි ලබා දෙන ඒ සැබෑ ආහාරය නම් ස්වර්ගයෙන් ඇවිත් ලෝකයට ජීවනය ලබා දෙන තැනැත්තායි.”
34 එවිට ඔවුහු, “ස්වාමීනි, අපට ඒ ආහාරය හැමදාටම දෙන්න”+ කියා ඔහුට කීවෝය.
35 යේසුස් ඔවුන්ට මෙසේ කීවේය. “ජීවනය ලබා දෙන ආහාරය මමයි. මා ළඟට එන තැනැත්තාට කිසිදාක බඩගින්නක් ඇති වන්නේ නැහැ. මා කෙරෙහි විශ්වාසය තබන තැනැත්තාට කිසිදාක පිපාසයක් දැනෙන්නේද නැහැ.+
36 නමුත් මම කලින් ඔබට පැවසූ ලෙස ඔබ මාව දුටුවත් ඔබ මාව විශ්වාස කරන්නේ නැහැ.+
37 පියාණන් මට භාර දෙන සෑම කෙනෙක්ම මා ළඟට එයි. මා ළඟට එන අයව මම කොහෙත්ම ප්‍රතික්ෂේප කරන්නේ නැහැ.+
38 මන්ද මම ස්වර්ගයෙන් ආවේ+ මගේ කැමැත්ත ඉටු කිරීමට නොව මාව එවූ තැනැත්තාගේ කැමැත්ත ඉටු කිරීමටයි.+
39 මාව එවූ තැනැත්තාගේ කැමැත්ත නම් ඔහු මට භාර දුන් සියලුදෙනාගෙන් කිසි කෙනෙක්ව නැති කර නොගෙන අන්තිම දවසේදී මා ලවා ඔවුන් සියලුදෙනාවම නැවත නැඟිටුවීමයි.+
40 මගේ පියාණන්ගේ කැමැත්ත නම් පුත්‍රයාව දැක ඔහු කෙරෙහි විශ්වාසය තබන සෑම කෙනෙකුටම සදාකාල ජීවනය ලබා දීමයි.+ මම අන්තිම දවසේදී ඔවුන්ව නැවත නැඟිටුවනවා.”+
41 “ස්වර්ගයෙන් පැමිණි ආහාරය මමයි”+ කියා යේසුස් පැවසූ නිසා යුදෙව්වරු ඔහුට විරුද්ධව කොඳුරන්න පටන්ගත්තෝය.
42 ඔවුහුද, “මේ යෝසෙප්ගේ පුත් යේසුස් නේද?+ අපි ඔහුගේ පියාවත් මවවත් හොඳින් හඳුනනවා. එසේනම් ‘මම ස්වර්ගයෙන් ආවා’ කියා ඔහු කියන්නේ කොහොමද” කියා එකිනෙකා අතරේ කතා වූහ.+
43 යේසුස් ඔවුන්ට මෙසේ කීවේය. “කොඳුරන එක නතර කරන්න.
44 කෙනෙක් මා ළඟට එන්නේ මාව එවූ මගේ පියාණන් ඔහු තුළ ඒ සඳහා ආශාවක් ඇති කළොත් පමණයි.+ අවසාන කාලයේදී මම ඔහුව නැවත නැඟිටුවනවා.+
45 ‘යෙහෝවා දෙවි ඔවුන් සියලුදෙනාටම උගන්වයි’+ කියා අනාගතවක්තෘවරුන්ගේ ලියවිලිවල ලියා තිබෙනවා. පියාණන්ට සවන් දී ඉගෙනගත් සියලුදෙනාම එන්නේ මා ළඟටයි.+
46 දෙවි විසින් එවා ඇති මා හැර+ වෙන කිසි මිනිසෙක් මගේ පියාණන් වන දෙවිව දැක නැහැ.+ ඔහුව දැක තිබෙන්නේ මා පමණයි.
47 ඒ නිසා මම ස්ථිරවම කියන්නේ, මාව විශ්වාස කරන තැනැත්තාට සදාකාල ජීවනය හිමි වන බවයි.+
48 “ජීවනය ලබා දෙන ආහාරය මමයි.+
49 පාළුකරයේ සැරිසරමින් සිටි ඔබේ මුතුන්මිත්තන් මන්නා+ ආහාරයට ගත්තත් ඔවුන් සියලුදෙනාම මහලු වී මිය ගියා.
50 නමුත් ස්වර්ගයෙන් පැමිණෙන සැබෑ ආහාරය කන කිසි කෙනෙකු මිය යන්නේ නැහැ.
51 ස්වර්ගයෙන් පැමිණි ඒ ජීවනදායක ආහාරය මමයි. කෙනෙක් එම ආහාරය කෑවොත් ඔහු සදාකල් ජීවත් වෙනවා. ඇත්තටම මා ලබා දෙන ආහාරය නම් ලෝකයට ජීවනය ලබා දීම සඳහා+ මා පූජා කරන මගේ ශරීරයයි.”+
52 එවිට යුදෙව්වන් අතර උණුසුම් විවාදයක් ඇති විය. “මේ මිනිසා, අපට කන්න ඔහුගේ ශරීරය දෙන්නේ කොහොමද” කියා ඔවුහු පැවසූහ.
53 එහෙයින් යේසුස් ඔවුන්ට මෙසේ කීවේය. “ඇත්තෙන්ම මම ඔබට කියන්නේ, ඔබ මනුෂ්‍ය පුත්‍රයාගේ ශරීරය කෑමට ගන්නේවත්+ ඔහුගේ රුධිරය බොන්නේවත්+ නැත්නම් ඔබට ජීවනය හිමි වන්නේ නැති*+ බවයි.
54 මගේ ශරීරය කෑමට ගෙන මගේ රුධිරය බොන තැනැත්තාට සදාකාල ජීවනය ලැබෙයි. මම අන්තිම දවසේදී ඔහුව නැවත නැඟිටුවනවා.+
55 මගේ ශරීරය සැබෑ ආහාරයක්. මගේ රුධිරය සැබෑ බීමක්.
56 මගේ ශරීරය කෑමට ගෙන මගේ රුධිරය බොන තැනැත්තා මා සමඟ එකට බැඳී සිටිනවා. මමත් ඔහු සමඟ එකට බැඳී සිටිනවා.+
57 මාව එව්වේ ජීවමාන+ පියාණන්. මා ජීවත් වන්නේ ඔහු නිසයි. ඒ වගේම මගේ ශරීරයෙන් පෝෂණය වන තැනැත්තා මා නිසා ජීවත් වෙයි.+
58 ස්වර්ගයෙන් පැමිණි ආහාරය එයයි. ඒ ආහාරය මිය ගොස් ඇති ඔබේ මුතුන්මිත්තන් කෑ ආහාරයට වඩා වෙනස්. ස්වර්ගයෙන් පැමිණි ආහාරය කන තැනැත්තා සදහටම ජීවත් වෙයි.”+
59 ඔහු ඒ දේවල් පැවසුවේ කපර්ණවුමෙහි සෙනඟ රැස්ව සිටි ශාලාවේ උගන්වමින් සිටියදීය.
60 ඒ දේවල් අසාගෙන සිටි ඔහුගේ ගෝලයන්ගෙන් බොහෝදෙනෙක් මෙසේ පැවසූහ. “මෙය මහ පුදුම කතාවක්. මේ වගේ දේවල් අසාගෙන ඉන්න පුළුවන් කාටද?”+
61 තමන් පැවසූ දේවල් ගැන තම ගෝලයන් කොඳුරමින් සිටි බව තේරුම්ගත් යේසුස් ඔවුන්ට මෙසේ පැවසුවේය. “මා පැවසූ දේවල් නිසා ඔබ තුළ කම්පනයක්+ ඇති වෙනවා නම්,
62 මනුෂ්‍ය පුත්‍රයා කලින් සිටි තැනට නැඟ යනවා ඔබ දැක්කොත් ඔබට මොනව වෙයිද?+
63 ජීවනය ලැබෙන්නේ කෙනෙක් දෙවිගේ මඟ පෙන්වීමට යටත් වුණොත් පමණයි.+ මිනිසුන් තමාගේම උත්සාහයෙන් කරන දේවලින් කිසි ප්‍රයෝජනයක් ඔවුන්ට ලැබෙන්නේ නැහැ. මා පැවසූ මේ දේවල් ඔබට පැවසුවේ දෙවිගේ මඟ පෙන්වීමට එකඟවයි.+ එයින් ජීවනය ලැබෙයි.+
64 නමුත් ඔබ අතරේම මේ දේවල් විශ්වාස නොකරන අයත් සිටිනවා.” යේසුස් එසේ පැවසුවේ විශ්වාස කරන්නේ නැති අය කවුරුන්ද කියාත් තමාව පාවා දෙන්නේ කවුද කියාත් ඔහු ඒ අවස්ථාවේ සිටම දැන සිටි නිසාය.+
65 ඔහු තවදුරටත් මෙසේ පැවසුවේය. “මා වෙතට එන්න පියාණන් කෙනෙකුට අවසර දුන්නොත් මිස+ අන් කිසිවෙකුට මා වෙතට එන්න බැරි බව මා ඔබට පැවසුවේ ඒ නිසයි.”
66 ඒ නිසා යේසුස්ගේ ගෝලයන්ගෙන් බොහෝදෙනෙක් තමන් කලින් අත්හැර ආ දේවලට ආපසු හැරී ගියෝය.+ ඔහු සමඟ සිටීමට ඔවුන් තුළ තවදුරටත් කැමැත්තක් නොතිබිණ.+
67 එවිට යේසුස් දොළොස්දෙනා දෙස බලා, “ඔබත් යන්න කැමතිද” කියා ඇසුවේය.
68 සීමොන් පේතෘස්+ ඔහුට මෙසේ පිළිතුරු දුන්නේය. “ස්වාමීනි, අප කා ළඟට යන්නද?+ සදාකාල ජීවනයට මඟ පාදන වදන් පවසන්නේ ඔබ පමණයි.+
69 දෙවි එවා ඇති ශුද්ධ තැනැත්තා ඔබ බව+ අපි දන්නවා. එය අපට හොඳටම විශ්වාසයි.”
70 එවිට යේසුස් ඔවුන්ට මෙසේ කීවේය. “මම දොළොස්දෙනෙක්ව තෝරාගත්තා.+ ඒත් ඒ දොළොස්දෙනාගෙන් කෙනෙක් අපහාස කරන්නෙක්.”+
71 යේසුස් ඒ අවස්ථාවේදී කතා කරමින් සිටියේ සීමොන් ඉස්කාරියොත්ගේ පුත් යූදස් ගැනය. මන්ද යූදස් දොළොස්දෙනාගෙන් කෙනෙක් වුවත් ඔහු පසුව යේසුස්ව පාවා දුන්නේය.+
