Pecado nishpaca Taita Diospa mandashcacunata na cazushpa imatapash nalita rurashcatami shina nin (1 Juan 3:4; 5:17). Bibliapica imatapash nalita rurashpa o Taita Diospa ñaupajpi imatapash nalita rurashpami pecadotaca ruraita ushan ninmi. Shinallata alita ruranata yachashpapash nalita rurajpica pecadomi can (Santiago 4:17).

 Punda tiempopi “pecadota” traducishpaca, imamanbash chayachingapaj munashpa na chayachi ushashcatami ningapaj munan. Por ejemplo, punda tiempopi israelita soldadocunaca huaracapi rumita churashpaca maiman chayachina cashpapash na pandarishpalla chayachin cashcatami Bibliapica parlan. Na pandarishpalla chayachin nishpaca na pecadota rurashcatami ningapaj munan (Jueces 20:16). Shinaca Taita Diospa mandashcata na pactachishpami pecadotaca ruran.

 Taita Dios ñucanchita rurashca caimandami pai imata mandashcatapash pactachichun munan (Revelación [Apocalipsis] 4:11). Shinallata ñucanchi imata rurashcatami Taita Diospa ñaupajpica ricuchina canchi (Romanos 14:12).

Pecadotaca ¿ima horapash na rurashachu ninchimanllu?

 Na, Bibliapica ninmi: “Tucuicuna juchata rurashcamandami, Taita Diospa puncha pambagucunamanda anchuchi tucushca causanajun” (Romanos 3:23; 1 Reyes 8:46; Eclesiastés 7:20; 1 Juan 1:8). ¿Imamandata tucuicuna juchata rurashca canchi nin?

 Pundapica Adán y Evataca Taita Diosca jucha illajtami rurarca. Chaimi paicunaca pecadotaca na ruran carca (Génesis 1:27). Shinapash Taita Diosta na cazuimandami pecadorcuna tucurca (Génesis 3:5, 6, 17-19). Paicuna huahuacunata charishpaca paicunapa pecadotaca huahuacunamanmi yalichirca (Romanos 5:12). Rey Davidca cashnami nirca ñuca mamapa vijsa ucumandallatami juchayu nacirircani nishpa (Salmo 51:5).

¿Tucui pecadocunachu igual can?

 Bibliapica punda tiempopi Sodoma llactamanda gentecunaca “nalicuna, jatun juchata” rurajcuna cashca ninmi. Shinallata paicunapa pecadoca ashtahuanmi mirashpa catijushca ninmi (Génesis 13:13; 18:20). Maijan pecadocuna ashtahuan nali cashcataca quimsa yuyaicunapi ricupashun.

1.   Ashtahuan nali. Bibliapica ninmi huainayana, yanga dioscunata mañana, shuhuana, machana, ima llaquipash japishpami ali canman nina, huañuchina, brujocunapaman rinami jatun juchacuna can nin (1 Corintios 6:9-11; Revelación 21:8). Bibliapica yachachinmi jatun nali juchahuan, imatapash nali yuyashpa rurashca juchahuanga na igual cashcata. Por ejemplo na yuyashpata imatapash nishpa llaquichishpaca, jatun nali juchacunahuanga na igualchu can (Proverbios 12:18; Efesios 4:31, 32). Maijan juchacunamandapash na cuidarishpaca, jatun juchacunata ruraita ushashcatami Bibliapica yachachin (Mateo 5:27, 28).

2.   Na yachashpata rurashca. Huaquin pecadocunaca Taita Diospa mandashcacunata na yachaimanda rurashcacunami can (Hechos 17:30; 1 Timoteo 1:13). Shinallata Taita Diospa mandashcacunata yachashca jahua nalita rurashcataca Taita Diosca alimi yachan (Números 15:30, 31). Bibliapica yachachinmi yachashca jahua juchata ruraj gentecunaca “nali shunguta” charishcata (Jeremías 16:12).

3.   Cati cati rurana. Bibliapica shuj viajeta rurashca juchahuan, cutin cutin chai juchatallata rurashca juchahuanga na igual cashcatami yachachin (1 Juan 3:4-8). Diospa mandashcacunata yachashca jahua nalicunata ruraj gentecunataca Taita Diosca na ricunayachinllu (Hebreos 10:26, 27).

 Jatun juchacunata rurashca gentecunaca llaquillami causan. Rey Davidca jatun juchata rurashcamandami cashna nirca: “Jatun nalita ñuca rurashcacunami, ñuca umapi shinllitami llapimujun. Llasha quipishnami, ñuca jahuapi shinllita llapimujun” (Salmo 38:4). Shinapash Bibliapica cashnami nin: “Paita na manllajpash, nali causaitaca saquichun. Nalita ruraj runapash, nali yuyaicunata saquichun. Chaita saquishpa, Mandaj Diospajman tigrarichunlla, paica llaquingami. Ñucanchi Taita Diospajman tigrarichunlla. Paimi, ashtaca ima nalita rurashcatapash anchuchinga” (Isaías 55:7).