Hebreos 10:1-39
-
Animalcunata carashpa sacrificiocunata ruranaca na sirvinllu (1-4)
-
Leyca shuj sombrashnami can (1)
-
-
Cristoca shuj viajellami paipa cuerpotaca entregarca (5-18)
-
Mushuj ñan y causaiman apaj ñan (19-25)
-
Tandanajunataca na saquinachu capanchi (24, 25)
-
-
Paicunapa munai pecadota rurajcunatami advirtin (26-31)
-
Aguantangapaca confiana y tucui shunguhuan crinami minishtirin (32-39)
10 Leyca shamuj punllacunapi tiana bendiciongunapa shuj sombrashnami can. Pero chai bendicionguna imashinapacha cajtaca na ricuchijunllu. Chaimandami Taita Diosta adorajcunaca, cada huata rurashca sacrificiocunahuanga na perfecto caita ushan.
2 Sacrificiocuna perfecto cachun ayudajpica, Taita Diosta adorajcunaca ña limpio cashpa paicunapa pecadocunamanda ñana culpable sintirishpami, sacrificiocunataca ñana ruranman carca.
3 Pero chai sacrificiocunaca, pecadorcuna cashcatami cada huata yarichin.*
4 Jari huagracunapa y chivocunapa yahuarca pecadocunata anchuchitaca na ushanllu.
5 Chaimi Cristo cai alpaman shamushpaca Taita Diostaca nirca: “‘Quiquinga ni sacrificiocunata ni ofrendacunatapash na munarcanguichu. Pero ñucamanga shuj cuerpotami cuhuarcangui.
6 Ni rupachishca ofrendacunatapash, ni pecadomanda ofrendacunatapash na munarcanguichu’.
7 Chaimi cashna nircani: ‘Ñuca Taita Dioslla, ñucaca quiquinba voluntadta rurangapami shamupashcani. Escribishca rollopica ñucamandami parlajun’” nishpa.
8 Primeroca nircami: “Quiquinga ni sacrificiocunata ni ofrendacunatapash, ni rupachishca ofrendacunatapash, ni pecadomanda ofrendacunatapash na munarcanguichu” nircami. Chai sacrificiocunaca Leypi nishcashna rurashcacunami can.
9 Chai jipami paica: “Ñucaca quiquinba voluntadta rurangapami shamupashcani” nirca. Paica punda ima tiashcata anchuchishpami mushujta churan.
10 Taita Diospa chai voluntadmandami, ñucanchicunaca Jesucristomanda limpio quidashcanchi.* Paica shuj viajetallami paipa cuerpotaca entregarca.
11 Ashtahuangarin tucuilla sacerdotecunami, Taita Diosta sirvingapaj ruraicunataca cada punlla ruran. Y chai sacrificiocunatallatami cutin cutin ruran. Shinapash chai sacrificiocunaca gentecunapa pecadocunata por completo anchuchitaca nunca na ushashcachu.
12 Pero Cristoca shujlla sacrificiota cushpami, pecadotaca para siempre anchuchishpa Taita Diospa ali ladopi tiarirca.
13 Y chai punllamandapachami paica, paipa tucuilla contracunata paipa chaquihuan saruchun churangacaman shuyajun.
14 Cristoca shujlla sacrificiota cushpami, limpiai tucunajujcunataca para siempre pecado illata rurashca.
15 Ashtahuangarin, chai cierto cashcataca espíritu santopashmi ricuchishca. Primeroca nishcami:
16 “Jehová* Diosca ninmi, cai tratotami* paicunahuanga chai punllacuna jipa rurasha. Ñucapa leycunatami paicunapa shungupi churasha y paicunapa yuyaipimi escribisha” nishpa.
17 Chai jipami nin: “Ñucaca paicunapa pecadocunata y paicunapa nali rurashcacunataca* cutinga na yarishachu” ninmi.
18 Chai pecadocunata perdonajpica, pecadocunamanda ofrendacunata cunaca ñana minishtirinllu.
19 Shinaca huauquipanicuna, Jesuspa yahuarmandami ñucanchica Santísimo* pushtuman rina ñandaca na manllashpa purinchi.
20 Chai ñanga mushuj ñanmi can y causaiman apaj ñanmi can. Chai ñandaca cortinata yalishpami ñucanchiman pascarca. Chai cortinaca Jesuspa cuerpotami ricuchin.
21 Shinallata Taita Diospa llactata ricuriajuj shuj alipacha sacerdotetami charipanchi.
22 Shinaca tucui shunguhuan y shinlli fehuanmi Taita Diostaca adorana capanchi. Nali concienciata ama charichunmi ñucanchi shungutaca limpiarca. Ñucanchi cuerpotapash limpio yacuhuanmi limpioyachirca.
23 Shinallata na dudashpa, ñucanchi shuyanajushca esperanzataca villachishpa catipashunchi. Porque chai esperanzata cuj Taita Diosca tucuitami cumplin.
24 Shujcunata juyangapaj y ali cosascunata rurashpa ñucanchipura ayudaringapaca, cada unomi caishujmanda chaishujmanda pendiente cana capanchi.*
25 Huaquingunaca tandanajunata saquina costumbretami charin. Pero ñucanchicunaca tandanajunataca na saquinachu capanchi. Ashtahuangarin caishuj chaishujmi animarina capanchi. Taita Diospa punlla chayamujujta ricushpacarin, ashtahuanmi chaicunataca rurana capanchi.
26 Cabal yachachishcacunata ali yachajushca jahua, paicunapa munai pecadota rurajpica, ima sacrificiopash chai pecadotaca na anchuchingachu.
27 Castigo tianatami manllashpa shuyanajunchi. Shinallata nina japirinshna Taita Dios culirashpa paipa contra shayarijcunata tucuchinatami shuyanajunchi.
28 Si Moisesman Cushca Leyta shuj runa na cazujpica ishcai o quimsa testigocunapa villashcacunahuanmi chai runaca sin misericordia huañuchi tucuna carca.
29 Shinaca ¿nachu Taita Diospa Churita na ricunayachishpa rechazashcamanda, shinallata chai runa limpio cachun tratota rurashca yahuarta na valichishcamandaca ashtahuan jatun castigota chai runaca miricin? Shinallata ¿nachu Taita Dios paipa ninan juyaita* ricuchingapaj utilizashca espíritu santota na valichishcamandaca ashtahuan jatun castigota chai runaca miricin?
30 Taita Diosca nishcami: “Ñucami vengarisha. Ñucami paicunamanga paicuna imata miricishcata cusha”. Pai shina nishcataca alimi yachapanchi. Shinallata: “Jehová* Diosmi paipa llactataca juzganga”.
31 Causajuj Taita Diospa castigota chasquinaca ninan manllanaipachami can.
32 Shinapash ama cungapanguichichu, cabal yachachishcacunata yachajushca jipaca, ashtaca llaquicunata charishpapashmi, quiquingunaca ashtaca cosascunata aguantarcanguichi.
33 Shinallata tauca viajemi gentecunapa ñaupapi maltratai tucurcanguichi, catiriashpapashmi llaquichi tucurcanguichi. Cutin shuj viajecunaca chashna llaquichi tucunajujcunapa ladopimi carcanguichi.
34 Carcelpi caj huauquicunatapash ninanda llaquishcatami ricuchiparcanguichi. Shuj ashtahuan ali y na tucurina bendiciongunata charinata yachaimandami, quiquingunapa charishcacunata quichujpipash cushilla cashpa catircanguichi.
35 Shinaca na manllashpami parlashpa catina capanguichi. Shinami ashtaca bendiciongunata chasquinguichi.
36 Taita Dios imata carasha nishpa prometishcata chasquingapaca, aguantanami capanguichi. Pero primeroca Taita Diospa voluntadtami rurana capanguichi.
37 “Maijanmi* shamujujca chayamungami y na unayangachu”. “Asha tiempollami faltan”.
38 “Alita rurajca* tucui shunguhuan crishcamandami causanga”. Y “ñucamanda caruyajpica, ñucaca na paihuanga cushijushachu”.
39 Shinapash ñucanchicunaca Taita Diosmanda caruyashpa tucuchi tucunacunaca na capanchichu. Sino tucui shunguhuan crishpa ñucanchi causaita salvajcunami capanchi.
Notacuna
^ O “yuyarichin”.
^ O “saquirishcanchi”.
^ Griego shimipica “leyta na cazushpa nali rurashcacunataca” nijunmi.
^ O “caishujmanda chaishujmanda preocuparina capanchi”, “caishujpi chaishujpi pensarina capanchi”.
^ Glosariopi “bondad inmerecida” shimita ricupangui.
^ Caipica Taita Diosmandami parlajun yarin.
