Jesusqa hanaq pachapin espíritu karqan manaraq kay Hallp’api naceshaspa (Juan 8:23). Jehová Diospa ñawpaq kamasqanmi karqan, yanaparqantaqmi Taytanta tukuy imaymana kamaypi. Biblian sutichan ‘sapallan Churi’ nispa, Dios kikinpuni kamasqanrayku (Juan 1:14). Hinaspapas, ‘Simi’ nispan paytaqa nikullantaq, Taytanpa rantinpi rimasqanrayku.​—Leey Proverbios 8:22, 23, 30; Colosenses 1:15, 16.

Diosmi Churinta kay Hallp’aman kachamurqan. Chaypaqqa, María sutiyoq doncella sipaspa wiksanmanmi kawsayninta astamurqan. Chaymi Jesuspa taytanqa mana runachu karqan (Lucas 1:30-35). ¿Imapaqmi hamurqan? 1) Diosmanta cheqaq kaqta yachachinanpaq. 2) Pay hina Dios serviyta yachachiwananchispaq, hinaña sasachakuykunapi tarikusunman chaypas. 3) Huchamanta “kacharichisqa” kananchisrayku ch’uya kawsayninta qonanpaq.​—Leey Mateo 20:28.

Kacharichiyqa huk runata wañuchinanku kashaqtin kacharipunankupaq pago ruwaymi (Éxodo 21:29, 30). Diosqa manan machuyananpaqchu nitaq wañunanpaqchu runata kamarqan. ¿Imaynapin chayta yachanchis? Diosmi Adanta nirqan mana kasukuqtinqa wañupunanta. Kasukunman karqan chayqa, manan hayk’aqpas wañunmanchu karqan (Génesis 2:16, 17; 5:5). Biblian willan Adanwan hucha ‘qallarisqanta’. Arí, Adanmi wawankunaman huchata  saqerqan, chaymi llapa runakuna wañunchis. Chayraykun llapallanchis necesitanchis wañuymanta kacharichisqa kayta.​—Leey Romanos 5:12; 6:23.

¿Pin wañuymanta qespichisqa kananchispaq pagayta atinman? Runakunaqa wañusqanchiswanmi huchanchismanta paganchis. Ichaqa huchayoq runa kasqanchisraykun huchallanchismanta pagayta atinchis.​—Leey Salmo 49:7-9.

Jesusqa ch’uya runan karqan, manataqmi hayk’aqpas huchallikurqanchu. Chaymi payqa huchanchismanta pagananpaq wañurqan. Jehová Diosqa anchatan munakuwanchis, chaymi sapan Churinta kachamurqan ñoqanchisrayku wañunanpaq. Jesuspas munakuwanchismi, chaymi Taytanta kasukuspa huchamanta wañuymantawan kacharichiwananchispaq kawsayninta qorqan.​—Leey Juan 3:16; Romanos 5:18, 19.

Qhaway ¿Imaraykun wañuran Jesús? nisqa videota

Hallp’api kashaspaqa onqosqakunatan qhaliyachirqan, wañusqakunata kawsarichirqan, ñak’ariqkunatapas yanaparqan. Chaypin rikuchirqan Diosta serviqkunarayku qhepaman ruwananta (Mateo 15:30, 31; Juan 5:28). Jesús wañupuqtinmi Dios kawsarichispa espíritu cuerponta kutichipurqan hanaq pachapi kawsananpaq (1 Pedro 3:18). Chay qhepamanmi Taytanpa paña ladonpi suyarqan, kay Hallp’ata kamachinanpaq atiyta chaskinankama (Hebreos 10:12, 13). Kunanqa hanaq pachapin Jesús kamachikushanña, chay allin willakuytataq qatikuqninkuna Hallp’antinpi mast’arishanku.​—Leey Daniel 7:13, 14; Mateo 24:14.

Jesusmi Diospa qosqan atiywan pisi tiempollamanta millay runakunata wañuchinqa, ñak’ariykunatapas chinkachinqa. Kay Hallp’apas sumaq paraisomanmi tukupunqa, chaypin tiyanqaku Jesuspi iñiq lliw kasukuq runakuna.​—Leey Salmo 37:9-11.