Colosenses 1:1-29
1 Diospa munayninpi Cristo Jesuspa apostolnin noqa Pablon iñiqmasinchis Timoteopiwan+ kay cartata apachimushaykichis
2 qankuna Colosas llaqtapi kaq ch’uya iñiqmasikunaman, arí, qankuna Cristowan* jujllachasqa junt’aq kaqkunaman:
Qankunawan kachun Taytanchis Diospa ancha sumaq sonqo kaynin thaj kayninpas.
3 Qankunapaq mañakuspaykuqa “gracias” nillaykupunin Señorninchis Jesucristoq Taytan Diostaqa,
4 Cristo Jesuspi iñisqaykichista, llapa iñiqmasikunatapas mayta munakusqaykichistawan yachaspayku.
5 Janaq pachapi suyakuyniykichis waqaychasqa kasqanraykupunichá chaytaqa ruwashankichis.+ Chay suyakuymantaqa cheqaq willakuyta, allin willakuykunata uyarisqaykichispin yacharqankichis ¿riki?
6 Chay uyarisqaykichis allin willakuykunaqa allintan rurushan, pachantinmantaqmi chayashanpas.+ Chhaynallataqchá qankuna ukhupipas pasashan Diospa ancha sumaq sonqo kaynin imaynapunichus kasqanta uyarispa allinta yachasqaykichis p’unchaymantapacha.
7 Chaytaqa ancha munasqa kamachimasiyku Epafras-si+ yachachisqasunkichis, payqa Cristoq junt’aq kamachinmi, rantiykupitaqmi qankunataqa yanapashasunkichis.
8 Paymi willawanku Diospa espiritunman jina munakuq kasqaykichistapas.
9 Chhayna kasqaykichista yachasqayku p’unchaymantapachan Diosmanta mañakushallaykupuni qankunapaq,+ chhaynapi tukuy yachaywan santo espirituq entiendechisqanwan ima paypa munayninmanta allinta yachanaykichispaq.+
10 Mañakullaykutaqmi Jehová* Diospaq jina kausanaykichispaq,* chhaynapi tukuy allin kaqkunata ruwaspa, paymanta cheqaq kaqta astawan yachaspa+ ima sonqonpaq jinapuni kanaykichispaq.
11 Mañakullaykutaqmi jatun atiyninman jina necesitasqaykichis atiywan kallpachasqa kanaykichispaqpas,+ chhaynapi pacienciawan kusikuywan ima tukuy imatapas aguantanaykichispaq,
12 Tayta Diosman graciasta qonaykichispaqwan; paymi yanaparqasunkichis k’anchaypi kashaq runakunaq herencia chaskiqmasin kanaykichispaq.+
13 Paymi laqhayaqpa* atiyninmanta kacharichiwaspanchis+ munakusqan Churinpa gobiernonman churawarqanchis,
14 chay Churinwanmi preciowan kacharichisqa karqanchis, juchanchismantan perdonasqa karqanchis.+
15 Payqa mana rikuna Diospa rijch’ayninmi,+ tukuy imamantapas paymi ñaupaqta kamasqa karqan.+
16 Paywanmi janaq pachapi tukuy ima kaqkuna, kay pachapi tukuy ima kaqkunapas kamasqa karqan: rikuna kaqkuna, mana rikuna kaqkuna,+ kamachikuqkuna, munayniyoqkuna, gobiernokuna, autoridadkunapas. Arí, paywanmi tukuy imapas kamasqa karqan,+ paypaqtaqmi karqanpas.
17 Chhaynaqa, paymi tukuy imamantapas ñaupaqta karqan,+ paywantaqmi tukuy imapas kamasqa karqan.
18 Paymi cuerpoq umanqa, arí, paymi iñiq t’aqaq umanqa.+ Paywanmi tukuy imapas qallarirqan, wañupuqkunamantapas paymi ñaupaqta kausarimpurqan,+ chhaynapi pay tukuy imaymanaq qallariynin kananpaq.
19 Tukuy imapas paypi junt’asqa kanantan Diosqa munan.+
20 Chaymantapas ñak’arina k’aspipi* Cristoq jich’asqan yawarwan+ kay pachapi kaqkunata janaq pachapi kaqkunatapas pay kikinwan allipunachiytan payqa munan.+
21 Ñaupaqpiqa karupin Diosmantaqa kasharqankichis, paypa enemigontaqmi karqankichispas millay ruwaykunapi yuyayniykichista churasqaykichisrayku,
22 kunanmi ichaqa pay kikinwan allipunachisunkichis wañuyman entregakuqpa cuerponwan, chhaynapi paypa ñaupanpi ch’uya, mana imanasqa, mana juchachana kanaykichispaq.+
23 Chaypaqqa iñishanallaykichismi,+ imapichus iñiyninchis saphichasqa kashan chaypipas mana kuyurispan+ allinta tajyanaykichis,+ uyarisqaykichis allin willakuykunapi suyakuymantapas manan karunchakunaykichischu; chay allin willakuykunataqa pachantinpiñan willakun,+ noqa Pablotaqmi chay willakuykunata willanaypaq churasqa karqani.+
24 Qankunarayku ñak’arisqaywanmi kusisqa kashani,+ chaywanpas manaraqmi lliutachu Cristoq cuerponrayku ñak’arishani,+ chay cuerpoqa iñiq t’aqan.+
25 Diospa llank’ana qowasqanman jinan noqaqa chay iñiq t’aqata servinaypaq churasqa karqani,+ chhaynapi qankunarayku paypa siminta tukuy sonqo willanaypaq.
26 Diospa pakasqa ch’uya yachayninta willanaypaq,+ chay yachaytaqa manan pipas kay pachapiqa yacharqanchu,+ manan ñaupa tiempopi kausaq runakunapas yacharqankuchu, kunanmi ichaqa chay yachayta ch’uya kamachinkunaman reqsichishan.+
27 Diosqa munayninman jinan chay ch’uya kamachinkunawan ancha valorniyoq pakasqa ch’uya yachayninta nacionkunaman reqsichishan.+ Chay pakasqa ch’uya yachayqa Cristowan jujllachasqa kasqaykichismi, paywan kuska jatunchasqa kanaykichispaq suyakuyniykichismi.+
28 Paymantan noqanchisqa willashanchis llapa runakunata anyaspa, tukuy yachaywan yachachispa ima, chhaynapi llapa runakunata tukuy imaymanapi Cristowan jujllachasqata Diosman pusananchispaq.+
29 Chaypaqmi noqaqa tukuy atisqayta llank’ashani paypa kallpa qowasqanwan kallpachakuspa.+
Uraypi willakuykuna
^ Qhaway “Astawan yachanapaq A5” nisqata.
^ Griego rimaypiqa “purinaykichispaq” ninmi.
^ Laqhayaqtaqa “tutayaq” nillankutaqmi.
^ Qhaway Explicasqa simikuna nisqapi “Ñak’arina k’aspi” nisqata.
