Mateo 20:1-34
20 ”Janaq pacha gobiernoqa uvas chajrayoq runamanmi rijch’akun, chay runan tutallamanta lloqsirqan chajranpi llank’achinanpaq runakunata maskhaq.+
2 Llank’apakuqkunata tarispataq paykunawan rimanakurqan juj p’unchaymanta juj denario qolqeta* pagapunanpaq, jinaspa uvas chajranman kacharqan.
3 Las nueveta jina* wajmanta lloqsispan mercado plazapi rikullarqantaq qasi sayashaq runakunata.
4 Jinan paykunata nirqan: Qankunapas uvas chajrayman llank’aq riychis, iman paganatan pagapusaykichis, nispa.
5 Chaymi paykunaqa rirqanku. Chajrayoqmi lloqsillarqantaq las doceta jina,* chaymantataq tardenta las tresta jina,* chaypipas kaqllatataqmi ruwarqan.
6 Las cincota jinaña* lloqsispan chajrayoqqa tarillarqantaq qasi sayashaq runakunata, jinan paykunatapas nirqan: ¿Imanaqtinmi kaypi ch’isiyaq sayashankichis mana imata ruwaspa?, nispa.
7 Chaymi paykunaqa nirqanku: Manan pipas llank’anata qowankuchu, nispa. Jinan chajrayoqqa nirqan: Chhaynaqa qankunapas uvas chajrayman llank’aq riychis, nispa.
8 ”Ch’isinyashaqtintaq uvas chajrayoqqa chajran llank’achiq runata nirqan: Llank’aqkunata wajamuspa pagapuy,+ qhepa chayamuqkunamanta qallarispan ñaupaq chayamuqkunapi tukunki, nispa.
9 Las cincota jina* llank’ayta qallariqkunan jamuspanku juj denario qolqeta sapankanku chaskirqanku.
10 Chaymi ch’isiyaq llank’aqkunaqa masta chaskinankupaq piensasharqanku, ichaqa paykunapas juj denario qolqetan chaskillarqankutaq.
11 Chayta chaskikuspan paykunaqa chajrayoqmanta rimapakuyta qallarirqanku,
12 jinaspa payta nirqanku: Kay qhepa chayamuqkunaqa juj horallamá llank’anku, noqaykun ichaqa ruphaypa chayasqan sayk’usqallaña ch’isiyaq llank’aykuyku, ¿chaychu paykunamanqa noqaykuman jinallataq pagapushanki?, nispa.
13 Chajrayoqtaq paykunamanta jujninta nirqan: Amigo, noqaqa manan ima mana allintachu ruwashayki. ¿Manachu rimarqanchis juj denario qolqeta pagapunaypaq?+
14 Pagoykita aparikuspa ripuy. Noqaqa kay qhepa chayamuqkunamanpas qanman jinallataqmi pagapuyta munani.
15 ¿Manachu qolqeywanqa ima munasqaytapas ruwayman? Icha, ¿envidiakushankichu paykunapaq allin kaqta ruwapusqaymanta?,+ nispa.
16 Chhaynallataqmi qhepapi kaqkunaqa ñaupaqpi kanqaku, ñaupaqpi kaqkunataq qhepapi kanqaku”,+ nispa.
17 Jerusalén llaqtaman rishaqtinkun Jesusqa chunka iskayniyoq discipulonkunata sapaqman pusaspa nirqan:+
18 “Jerusalén llaqtamanmi wichashanchis, chaypin runaq Churinqa umalli sacerdotekunaman, kamachikuy simi yachachiqkunamanwan entregasqa kanqa. Paykunan wañunanpaq juchachanqaku,+
19 jinaspa waj nacionmanta runakunaman entreganqaku asipayanankupaq, soq’anankupaq, k’aspipi warkunankupaq+ ima; kinsa p’unchaymantan ichaqa kausarichisqa kanqa”,+ nispa.
20 Chaymantataq Zebedeoq+ esposanqa churinkunapiwan Jesusman qayllaykuspa valekunanpaq k’umuykurqan.+
21 Chaymi Jesusqa nirqan: “¿Imatan munashanki?”, nispa. Warmitaq nirqan: “Valekuykin kay iskay wawaykuna gobiernoykipi qanwan kuska tiyanankupaq, jujnin paña ladoykipi jujnintaq lloq’e ladoykipi”,+ nispa.
22 Jinan Jesusqa chay warmiq wawankunata nirqan: “Qankunaqa manan yachankichischu imatachus mañakushankichis chayta. ¿Atiwaqchischu ujanayña kashan chay copa* ujayta?”,+ nispa. Paykunataq nirqanku: “Atisaqkun”, nispa.
23 Jinan Jesusqa nirqan: “Ujankichismi copaytaqa,+ paña ladoypi lloq’e ladoypi pipas tiyananmi ichaqa mana noqaq ninaychu, aswanpas Taytaymi ajllanqa pikunachus chaypi tiyanqa chaytaqa”,+ nispa.
24 Chayta yachaspan chunka discipulokunaqa phiñakurqanku chay iskaynin wayqekunapaq.+
25 Jesustaq paykunata wajaspa nirqan: “Yachasqaykichis jina, nacionkunapi kamachikuqkunaqa kamachisqan runakunatan dueñochakunku, umalli kaqkunapas jujkunatan sarunchanku.+
26 Qankuna ukhupin ichaqa mana chhaynachu kanan,+ aswanmi pipas qankuna ukhupi kuraq kayta munaqqa serviqniykichis kanan,+
27 mayqenniykichispas ñaupaqpi kayta munaqtaq kamachiykichis kanan.+
28 Runaq Churinpas manan servichikuqchu jamurqan, aswanpas jujkunata servinanpaqmi,+ vidanwan* pagaspa askha runakunata kacharichinanpaqwan”,+ nispa.
29 Jericó llaqtamanta lloqsishaqtinkun ancha askha runakuna Jesusta qatikurqanku.
30 Ñan patapin iskay ñausakuna tiyasharqanku, jinan chayninta Jesuspa pasashasqanta uyarispa kallpawan wajakurqanku: “¡Davidpa Churin Señor, khuyapayaykuwayku!”,+ nispa.
31 Runakunataq chay ñausakunata phiñarikurqanku upallanankupaq, paykunan ichaqa astawanraq wajakurqanku: “¡Davidpa Churin Señor, khuyapayaykuwayku!”, nispa.
32 Jinan Jesusqa sayaykurqan, paykunata wajaspataq nirqan: “¿Ima ruwapunaytan munankichis?”, nispa.
33 Paykunataq nirqanku: “Señor, ñawiykuta kichariwayku”, nispa.
34 Chaymi Jesusqa anchata khuyapayaspa ñawinkuta llamiykurqan,+ jinan paykunaqa kaq ratu qhawaripurqanku, chaymantataq payta qatikurqanku.
Uraypi willakuykuna
^ Juj denario qolqeqa juj p’unchay llank’asqamanta pagon karqan. Qhaway “Astawan yachanapaq B14” nisqata.
^ Griego rimaypiqa “Kinsa kaq horata jina” ninmi, chaytaqa yupaqku intiq lloqsimusqanmantapachan.
^ Griego rimaypiqa “soqta kaq horata jina” ninmi, chaytaqa yupaqku intiq lloqsimusqanmantapachan.
^ Griego rimaypiqa “isqon kaq horata jina” ninmi, chaytaqa yupaqku intiq lloqsimusqanmantapachan.
^ Griego rimaypiqa “11 kaq horata jinaña” ninmi, chaytaqa yupaqku intiq lloqsimusqanmantapachan.
^ Griego rimaypiqa “11 kaq horata jina” ninmi, chaytaqa yupaqku intiq lloqsimusqanmantapachan.
^ Jesustan wañuchinanku karqan Diosta k’amiqmanta tumpaspa, Diostaq mana chayta jark’ananchu karqan, chaymantan rimashan “copa” nispaqa.
