Daniel 7:1-28
7 Babiloniapi rey Belsasar kamachikuyta qallarisqan watapin+ Danielqa puñunanpi puñushaspa mosqokurqan,+ rijuriykunapas umanman jamurqan. Chay mosqokusqanta rijuriykuna rikusqanta iman payqa llapanta qelqarqan.+
2 Khaynatan qelqarqan:
“Puñushaqtiymi rijuriykuna umayman jamuwarqan. Chaypin janaq pacha tawantin wayrakuna sinchita wayramuspa jatun lamar-qochata phoqchiqechishasqa.+
3 Chayllamanmi jatunkaray tawa manchay phiña animalkuna+ lamar-qochamanta lloqsimurqan, sapankan jujniraykama kasqa.
4 ”Ñaupaq kaq animalqa león jinan kasqa,+ ankaq rafran rafrayoq,+ qhawashallaqtiymi rafrankuna wit’usqa karqan. Kay jallp’a pachamantan oqarisqa karqan, runata jinan iskay chakimanta sayarichirqanku, jinaspa runaq sonqonta chay animalman qorqanku.
5 ”Iskay kaq phiña animal rikusqayqa oso jinan kasqa.+ Jujnin makin oqarisqan sayashasqa, siminpitaq kinsa waqtan tullukunata apashasqa, jinan juj kunka nimurqan: Jatariy, askhatapuni aychata mijuy,+ nispa.
6 ”Qhawashallaqtiymi juj manchay phiña animal rijurimullarqantaq. Chay animalqa leopardo* jinan kasqa,+ ichaqa tawa umayoqmi, wasanpi tawa rafrayoqmi kasqa,+ paymi kamachinanpaq autoridadta chaskirqan.
7 ”Qhawashallaqtiymi tuta rijuriykuna rikusqaypi juj manchay phiña animal rijurimullarqantaq, chaywanqa tawañan kasharqan. Chay animalqa sinchi manchakuymi, sinchi millaypunin kasqa, kallpasapataqmi kasqapas. Kirunkunapas fierromantan kasqa, jatuchachaqmi kasqapas. Mana manchakuspan oqoykurqanpas ñut’urqanpas, puchuqtapas ñut’utan sarurqan.+ Jujniraypunin kasqa ñaupaqpi rikusqay manchay phiña animalkunamantaqa. Chunka waqrayoqmi kasqapas.
8 Chay waqrakunata qhawashaqtiymi chay chunka waqrakuna ukhumanta juj juch’uy waqra wiñaramurqan,+ jinan ñaupanpi kaq kinsa waqrakunaqa urmapurqan. Chay juch’uy waqraqa runa jina ñawiyoqmi kasqa, siminpas jatunchakuspan imaymanata rimarqan.+
9 ”Qhawashallaqtiymi tronokuna churasqa karqan, unay tiempoña kausaq Kuraq Runataq+ tiyaykurqan.+ P’achanqa rit’i jina yuraqllañan kasqa,+ chujchanpas limpio t’aqsasqa willma jinan kasqa. Trononpas nina jinan kasqa, ruedankunapas nina rauray jinan kasqa.+
10 Nina mayun ñaupanmanta lloqsimushasqa.+ Paytaqa waranqaq waranqanmi servishasqaku, chunka waranqa kutimanta chunka waranqan paypa ñaupanpiqa sayashasqaku.+ Juzganapi tribunal+ tiyaykuqtinmi qelqa k’uyukuna kicharikurqan.
11 ”Chay juch’uy waqraq jatunchakuspa rimasqantan noqaqa qhawashallarqani,+ qhawashallaqtiymi chay millay phiña animaltaqa wañuchipurqanku, ñut’uspataq ninaman wijch’uykapurqanku.
12 Wakin manchay phiña animalkunamantaqa+ atiynintan qechupurqanku, juj tiempota juj churasqa tiempotawantaq paykunataqa kausachirqanku.
13 ”Tuta rijuriykuna rikusqayta qhawashallaqtiymi runaq churin jina janaq pachamanta phuyu ukhupi jamushasqa,+ paytan unay tiempoña kausaq Kuraq Runaq kasqanman jaykuchirqanku,+ jinaspan payman asuykachirqanku.
14 Chaypin payqa chaskirqan atiyta,+ jatunchayta,+ kamachikunanpaq atiytawan, chhaynapi llapa llaqtakuna, nacionkuna, imaymana rimayniyoq runakuna payta servinankupaq.+ Paypa kamachikuyninqa wiñaypaqmi kanqa, gobiernonpas manan jayk’aqpas chinkachisqachu kanqa.+
15 ”Umayman chay rijuriykuna jamusqanwanmi sinchi manchasqa kasharqani, may llakisqan kasharqani.+
16 Chaymi chaypi sayashaqkunamanta jujninman asuykuspa nirqani chaykunata sut’inchawananpaq. Jinan payqa tukuy chaykuna imachus kasqanta sut’inchawarqan, niwarqanmi:
17 ”Chay jatunkaray manchay phiña tawa animalkunaqa+ kay pachamanta paqarimuq tawa reykunan.+
18 Tukuy munayniyoqpa+ ch’uya serviqninkunan gobiernota chaskinqaku,+ kamachikuq kanankupaqmi atiyta chaskinqaku,+ paykunaqa wiñaypaqmi, arí, wiñay-wiñaypaqpunin kamachikunqaku, nispa.
19 ”Noqaqa astawanmi yachayta munarqani tawa kaq manchay phiña animalmanta. Chay animalqa jujniraypunin kasqa wakinkunamantaqa, sinchi manchakuymi, sinchi millaypunin kasqa. Kirunkunapas fierromantan kasqa, sillunkunapas cobremantan kasqa. Mana manchakuspan oqoykurqanpas ñut’urqanpas, puchuqtapas ñut’utan sarurqan.+
20 Astawanmi yachayta munallarqanitaq umanpi chunka waqrakunamantapas+ wiñamuq juch’uy waqramantapas, chay waqraq ñaupanmantan urmarqan kinsa waqrakuna.+ Chaymantapas chay waqraqa ñawiyoqmi karqan, siminpas jatunchakuspan imaymanakunata rimarqan, wakin waqrakunamantaqa aswan jatunpaq jinan qhawarikurqan.
21 ”Noqaqa qhawashallarqanin chay waqrata, payqa ch’uya kaqkuna contran maqanakuyta qallarirqan jinaspa atipasharqan.+
22 Chayllamanmi unay tiempoña kausaq Kuraq Runaqa jamuspa+ tukuy munayniyoqpa ch’uya serviqninkunapaq justiciata ruwapurqan,+ chayamurqanmi chay ch’uya kaqkuna gobiernota chaskinankupaq señalasqa tiempopas.+
23 ”Willawaqniyqa niwallarqantaqmi: Chay manchay tawa kaq phiña animalqa kay pachamanta paqarimuq tawa kaq gobiernon. Chay gobiernoqa kay pachapi llapa gobiernokunamantapas jujniraymi kanqa, pachantintan chinkachinqa, sarunqa, ñut’unqa.+
24 Chay chunkantin waqrakunaqa tawa kaq gobiernomanta lloqsimuq chunka reykunan kanku. Chay reykunaq qhepanmanmi juj reyñataq lloqsimunqa, chay reyqa jujniraymi kanqa, kinsa reykunatan sarunchanqa.+
25 Ancha jatun Dios contran rimanqa,+ tukuy munayniyoqpa ch’uya serviqninkuna contran rimashallanqa. Kamachikuykunata tiempokunata iman cambiayta munanqa. Juj tiempo, iskay tiempo, kuskan tiempon*+ ch’uya runakuna paypa makinman entregasqa kanqa.
26 Ichaqa juzganapi tribunal tiyaykuqtinmi atiyninqa qechusqa kapunqa, payta chinkachipunankupaqmi atiyninta qechupunqaku.+
27 ”Kay pachapi kaq llapa gobiernokunaq atiyninpas jatunchasqa kayninpas tukuy munayniyoqpa+ ch’uya llaqtanmanmi qopusqa kanqa. Gobiernonkuqa wiñaypaq gobiernon,+ llapa gobiernokunan paykunata servinqaku kasukunqakupas, nispa.
28 ”Kaypin chay willakuy tukupun. Noqa Danielqa chaykunamantan sinchi mancharisqa kasharqani, q’ellumanraqmi tukurqani, ichaqa sonqoypin chay rikusqaykunata jap’irqani”, nispa.
Uraypi willakuykuna
^ Leopardoqa puma jinan, ichaqa ch’eqchin.
^ Chaypiqa yaqapaschá “Juj wata, iskay wata, kuskan watan” nillanmantaq.
