Mateo 10:1-42
-
Chunka iskayniyoq apostolkunamanta (1-4)
-
Imaynatachus jujkunaman willanamanta (5-15)
-
Discipulokuna qatikachasqa kanankumanta (16-25)
-
Runata manchakunamantaqa Diosta manchakunamanta (26-31)
-
Jesuspa thaj kay apamunanmantaqa espadata apamusqanmanta (32-39)
-
Jesuspa discipulonkunata chaskinamanta (40-42)
10 Chaymantan Jesusqa chunka iskayniyoq discipulonkunata wajarqan, jinaspa paykunaman atiyta qorqan millay* espiritukunata qarqonankupaq,+ imaymana onqoyniyoqkunata nanayniyoqkunatawan qhaliyachinankupaq.
2 Chay chunka iskayniyoq apostolkunan* karqanku:+ Pedro nisqa Simón,+ wayqen Andrespiwan;+ Zebedeoq wawan Santiago, wayqen Juanpiwan;+
3 Felipe, Bartolomé;+ Tomás,+ impuesto cobraq Mateo;+ Alfeoq wawan Santiago, Tadeo;
4 Cananita* nisqa Simón, Judas Iscariotepiwan, paymi karqan Jesusta jap’ichiqqa.+
5 Chay chunka iskayniyoq apostolkunatan Jesusqa kacharqan, paykunatan khaynata kamachirqan:+ “Aman mana judío runakunaq ñannintaqa rinkichischu, amallataq Samaria runakunaq llaqtanmanpas jaykunkichischu.+
6 Aswanpas Israel llaqtamanta chinkasqa ovejakunallamanmi rinkichis.+
7 Rispaqa, janaq pacha gobiernon qayllaykamunña,+ nispan ninkichis.
8 Onqosqakunatan qhaliyachinkichis,+ wañusqakunatan kausarichinkichis,* lepra onqoyniyoqkunatan qhaliyachinkichis, supaykunatapas qarqonkichismi. Gratisllan chaskirqankichis, gratisllataqmi qonkichispas.
9 Aman qorita, qolqeta ni cobretapas qolqe apanaykichispiqa apankichischu.+
10 Ñanpaqpas aman apankichischu qoqawata, llank’aqqa chaskinanpunin mijunantaqa.+ Chaymantapas aman apankichischu cambiakunaykichispaq p’achatapas, usut’atapas ni juj taunatawanpas.+
11 ”May llaqtamanpas may ayllumanpas jaykuspaqa maskhaychis pichus chaypi willasqaykichista chaskikunanpaq jina kaqta, jinaspa ripunaykichiskama chaypi qhepakunkichis.*+
12 May wasimanpas jaykuspaqa napaykunkichismi chaypi kaqkunata.
13 Paykunachus uyarikunankupaq jina kanqaku chayqa, thaj kay paykunapaq kachun;+ mana chayqa, thaj kay qankunaman kutimpuchun.
14 Maypipas mana chaskisunkichischu ni uyarisunkichispaschu chayqa, chay wasimanta llaqtamantapas lloqsipushaspan chakiykichispi kaq jallp’ata chhafchirparinkichis.+
15 Cheqaqtan niykichis: Juicio p’unchaypiqa* chay llaqtan aswan castigasqa kanqa Sodoma Gomorra llaqtakunamantaqa.+
16 ”Qankunataqa lobokuna* chaupipi ovejakunata jinan kachashaykichis; chayrayku, mach’aqwaykuna jina allin reparaq, ichaqa palomakuna jina mana imanakuq kaychis.+
17 Runakunamanta allinta cuidakuychis, paykunan apasunkichis juzgana wasikunaman,+ sinagogankupitaq+ soq’aykusunkichis.+
18 Noqaraykun kamachikuqkunaman reykunamanpas apasqa kankichis,+ chhaynapi paykunapas waj nacionmanta runakunapas willasqa kanankupaq.+
19 Paykunaman apasuqtiykichisqa aman llakikunkichischu imaynatachus imatataqchus rimanaykichismantaqa, chay ratupin yachankichis imatachus rimanaykichista.+
20 Manan qankunallachu rimankichisqa, aswanpas janaq pacha Taytaykichispa espiritunmi qankunamanta rimanqa.+
21 Chaymantapas wayqellantaqmi wayqenta wañuchinapaq entreganqa, taytataq wawanta. Wawakunapas tayta-mamanku contran jatarinqaku, jinaspa wañuchinapaq entreganqaku.+
22 Sutiyraykun llapa runakunaq cheqnisqan kankichis.+ Ichaqa tukukuykama aguantaqmi salvasqa kanqa.+
23 Juj llaqtapi qatikachasunkichis chayqa, waj llaqtaman ayqeychis,+ cheqaqtan niykichis: Israelpi ayllukunata llaqtakunatapas manaraq puriyta tukushaqtiykichismi runaq Churinqa chayamunqa.
24 ”Yachachisqa runaqa manan aswan allinchu yachachiqninmantaqa, manallataqmi kamachipas patronninmantaqa.+
25 Yachachisqa runapaqqa allinmi yachachiqnin jina kay, kamachipaqpas patronnin jina kay.+ Wasiyoqtataq runakuna nirqanku Belcebú*+ nispa chayqa, ¡astawanraqchá wasinpi kaqkunataqa chhaynata ninqaku!
26 Chayrayku, aman paykunataqa manchakunkichischu. Imapas tapasqa kaqqa rijurichisqan kanqa, ima pakasqa kaqpas yachakunqan.+
27 Tutayaqpi nisqaytaqa k’anchaypi willaychis, ninrillapi uyarisqaykichistapas wasi patakunamanta willamuychis.+
28 Ama manchakuychischu cuerpo wañuchiqkunataqa, paykunaqa manan atinkumanchu kausay* chinkachiytaqa;+ aswanpas manchakuychis cuerpotawan kausaytawan Gehenapi* chinkachiy atiqta.+
29 ¿Manachu iskay pichinkukunata pisi valorniyoq qolqellapaq* vendekun? Chaywanpas manan jujllapas pampamanqa urmanmanchu janaq pacha Taytaykichis mana yachashaqtinqa.+
30 Qankunaqqa chujchaykichispas llapallanmi yupasqa kashan.
31 Chayrayku, ama manchakuychischu, qankunaqa askha pichinkukunamantapas astawanraqmi valenkichis.+
32 ”Pipas runakunaq ñaupanpi “reqsinin” niwaqniytaqa,+ noqapas “reqsinin” nillasaqtaqmi janaq pachapi kaq Taytaypa ñaupanpi.+
33 Pipas runakunaq ñaupanpi negawaqniytan ichaqa, noqapas negallasaqtaq janaq pachapi kaq Taytaypa ñaupanpi.+
34 Ama piensaychischu kay pachaman jamusqaywan thaj kay kanantaqa; manan thaj kayta apamuqchu jamuni, aswanmi espadata churaq.+
35 Noqaqa t’aqanachiqmi jamuni: Churin taytan contra kanqa, ususitaq maman contra, qhachuntaq suegran contra.+
36 Runaq enemigonkunaqa wasinpi kaqkunallataqmi kanqa.
37 Pipas taytantapas mamantapas noqamanta astawan munakuqqa manan noqapaq jinachu; pipas churintapas ususintapas noqamanta astawan munakuqqa manallataqmi noqapaq jinachu.+
38 Pipas discipuloy kayta munaqqa ñak’arina k’aspinta* chaskispan qhepayta jamunan, mana chayqa manan noqapaq jinachu kanqa.+
39 Pipas vidanta* salvayta munaqqa chinkachinqan, pipas noqarayku vidanta chinkachiqmi ichaqa salvanqa.+
40 ”Pipas qankunata chaskiqqa noqatan chaskiwallantaq, noqata chaskiwaqtaq kachamuqniytapas chaskillantaq.+
41 Pipas juj runata profeta kasqanrayku chaskiqqa, profeta jinan premiota chaskinqa;+ pipas juj chanin runata chanin kasqanrayku chaskiqqa, chanin runa jinan premiota chaskinqa.
42 Cheqaqtan niykichis: Pipas kay juch’uypaq qhawarisqa kaqkunamanta mayqenmanpas discipuloy kasqanrayku juj vaso chiri unullatapas jaywarinqa chayqa, manapunin imaraykupas premiontaqa chinkachinqachu”,+ nispa.
Uraypi willakuykuna
^ Griego rimaypiqa “qhelli” ninmi.
^ Chaypiqa “tukuy sonqowan ruwaq” nillanmantaqmi.
^ Griego rimaypiqa “jatarichinkichis” ninmi.
^ Chaypiqa “alojakunkichis” nillanmantaqmi.
^ Qhaway Explicasqa simikuna nisqapi “Juicio p’unchay” nisqata.
^ Loboqa atoq jinan, ichaqa aswan jatunmi, sinchi phiñataqmi kanpas.
^ Belcebú sutiqa Satanaspa juj kaq sutinmi; paymi supaykunaq kamachiqnin. Qhaway Explicasqa simikuna nisqapi “Belcebú” nisqata.
^ Gehena nisqaqa Jerusalén llaqtaq cantonpi q’opa kanana wayq’on karqan. Qhaway Explicasqa simikuna nisqapi “Gehena” nisqata.
^ Griego rimaypiqa “juj asarionllapaq” ninmi. Qhaway “Astawan yachanapaq B14” nisqata.
^ Qhaway Explicasqa simikuna nisqapi “Ñak’arina k’aspi” nisqata.
