Hechos 5:1-42
-
Ananiasmanta Safiramantawan (1-11)
-
Apostolkunaq señalkuna ruwasqanmanta (12-16)
-
Carcelpi wisq’asqa kasqankumanta lloqsimusqankumantawan (17-21a)
-
Wajmanta Jatun Juntaman apasqa kasqankumanta (21b-32)
-
“Diostan ñaupaqtaqa kasukunayku” (29)
-
-
Gamalielpa yuyaychasqanmanta (33-40)
-
Wasin-wasinta willasqankumanta (41, 42)
5 Juj runan karqan Ananías sutiyoq, esposantaq Safira, paykunan jallp’ankuta venderqanku.
2 Ananiasqa vendesqan qolqemanta wakintan esposanpa yachashasqan pakarqan, wakillanta apamuspataq apostolkunaman qorqan.+
3 Jinan Pedroqa payta nirqan: “Ananías, ¿imaraykun Satanaswan tanqachikurqanki santo espirituta+ llullakunaykipaq,+ jallp’a vendesqaykimanta wakin qolqeta pakanaykipaqpas?
4 Chay jallp’aqa qanpan karqan ¿riki? Vendesqayki qolqepas makiykipimá kasharqan riki chaywan ima munasqaykita ruwanaykipaq. Chhaynaqa, ¿imaraykun sonqoykipi yuyaykurqanki chhayna mana allinta ruwanaykipaq? Qanqa manan runakunatachu llullakushanki, aswanpas Diostan llullakushanki”, nispa.
5 Chayta uyarispan Ananiasqa wijch’ukuspa wañupurqan. Chay pasasqanmanta llapa uyariqkunaqa sinchitan mancharikurqanku.
6 Waynakunataq sayarispanku Ananiaspa cuerponta telakunawan k’uyurqanku, jinaspa jawaman orqospa p’ampamurqanku.
7 Kinsa horamanta jinataq Ananiaspa esposan jaykumurqan, payqa manan imatapas yacharqanchu imachus pasasqanmantaqa.
8 Jinan Pedroqa tapurqan: ¿“Khayna preciopichu jallp’aykichista venderqankichis?”, nispa. Paytaq nirqan: “Arí, chhaynapin”, nispa.
9 Jinan Pedroqa payta nirqan: “¿Imaraykun iskayniykichis yachachinakurqankichis Jehová* Diospa espiritunta pruebaman churanaykichispaq? Qosaykita p’ampamuqkunan punkupiña kashanku, kunanqa qantañataqmi orqosunkiku”, nispa.
10 Jinan payqa kaq ratu wijch’ukuspa Pedroq ñaupanpi wañupurqan. Chay waynakunataq jaykumuspanku wañusqataña tarirqanku, chaymi jawaman orqospa qosanpa ladonpi p’ampamurqanku.
11 Jinan Jerusalenpi llapa iñiqkuna sinchita mancharikurqanku, chay pasasqanta llapa uyariqkunapas manchasqan kasharqanku.
12 Apostolkunaqa ruwashallarqankun runakunaq ñaupanpi señalkunata milagrokunata ima;+ paykunaqa juj sonqollan juñunakuqku Salomonpa Columnankuna*+ nisqapi.
13 Wakinkunaqa manan iñiqkunaman juñukuyta munarqankuchu. Llaqta runakunan ichaqa iñiqkunamanta allinta rimasharqanku.
14 Chaymantapas askhan qharikunapas warmikunapas+ Señorpiqa iñipusharqanku.
15 Paykunaqa onqosqakunatapas jatun callekunamanmi orqomuqku, jinaspa chayman churaqku juch’uy puñuna patakunapi camillakunapi ima, chhaynapi chayninta Pedro pasaqtin llanthullanpas paykunaman chayananpaq.+
16 Jerusalén qayllapi kaq llaqtakunamantapas runakunaqa askhallañan jamuqku onqosqakunata millay espiritukunaq ñak’arichisqankunatawan apamuspa, jinan llapallanku qhaliyachisqa karqanku.
17 Uma sacerdotewan paywan llapa kaqkunapiwanmi ichaqa sinchi phiñasqa jatarirqanku (paykunaqa saduceo t’aqamantan karqanku),
18 jinaspa apostolkunata jap’ispa llaqtapi carcelman wisq’arqanku.+
19 Jehová* Diospa angelninmi ichaqa tutapi carcelpa punkunkunata kicharqan,+ jinaspa paykunata orqospa nirqan:
20 “Temploman rispa runakunaman willamushallaychis jamuq kausaymanta”, nispa.
21 Chayta uyarispan paykunaqa illarimuyllata temploman jaykurqanku, jinaspa yachachiyta qallarirqanku.
Chaykamataq uma sacerdoteqa paywan kaqkunapiwan chayamuspanku Jatun Juntapi* kaqkunata Israelpi llapa kuraq runakunatawan juñurqanku; guardiakunatataq carcelman kacharqanku apostolkunata apamunankupaq,
22 carcelman chayaspankun ichaqa mana apostolkunata tarirqankuchu, jinan kutimuspanku willakurqanku:
23 “Carceltan tarimuyku allin wisq’asqata, guardiakunatapas punkukunapi sayashaqta, kichaqtiykun ichaqa mana pipas chay ukhupi kasqachu”, nispa.
24 Chayta uyarispan templota qhawaq umalliwan umalli sacerdotekunapiwanqa ninakurqanku: “Imachá kunanqa pasanqa”, nispa.
25 Chayllamanmi juj runa chayamurqan, jinaspa paykunata nirqan: “Carcelman wisq’amusqaykichis runakunaqa templopin kashanku, chaypin runakunaman yachachishanku”, nispa.
26 Jinan templota qhawaq umalliqa guardiankunapiwan rispa paykunata pusamurqanku, ichaqa runakuna rumiwan ch’aqenankuta manchakuspan+ sumaqllata pusamurqanku.
27 Pusamuspankutaq Jatun Juntaq ñaupanpi sayaykachirqanku, jinan uma sacerdoteqa paykunata
28 nirqan: “¿Manachu noqaykuqa kamachirqaykichis amaña chay runaq sutinpi yachachinaykichispaq?+ Chhaynaqa, ¿imaraykutaq qankunari Jerusalén llaqtaman yachachikuyniykichista junt’aykachishankichis? ¿Imaraykun chay runaq wañusqanmantapas noqaykuta juchachayta munashawankiku?”,+ nispa.
29 Jinan Pedroqa wakin apostolkunapiwan nirqanku: “Noqaykuqa kamachikuq Diostan ñaupaqtaqa kasukunayku, runakunata kasukunaykumantaqa.+
30 K’aspipi* warkuspa wañuchisqaykichis+ Jesustan ñaupa taytanchiskunaq Diosnin kausarichipun.
31 Paytan Diosqa jatunchan paña ladonpi+ tiyachispa, paytan churan kausayman apaq jatun umalli kananpaq+ salvaq kananpaqwan,+ chhaynapi Israel runakuna juchankumanta pesapakuspa Diosman kutirikunankupaq, chhaynapitaq perdonasqa kanankupaq.+
32 Noqaykun chaykunamanta testigo kayku,+ kasukuqninkunaman Diospa qosqan santo espiritupas+ yanapawankun chaykunamanta willanaykupaq”, nispa.
33 Chayta uyarispan paykunaqa sinchita phiñakurqanku, jinaspa wañuchiyta munarqanku.
34 Chayllamanmi Jatun Junta ukhumanta juj runa sayarirqan, payqa fariseon* karqan, sutinmi karqan Gamaliel,+ payqa kamachikuy simita yachachiqmi karqan, lliu runaq respetasqantaqmi karqanpas; paymi kamachikurqan apostolkunata juj ratulla jawaman orqonankupaq.
35 Jinaspa paykunata nirqan: “Israel runakuna, kay runakunata imatapas ruwanaykichispaqqa allintaraq piensaychis.
36 Yuyashankichispaschá ñaupa watakunapi Teudas runawan imachus pasasqanta, payqa jatarispan umalli churakurqan, jinaspa t’aqanman juñukurqanku tawa pachaj jina qharikuna. Wañuchisqa kaqtintaq ichaqa payta qatikuq llapa runakuna ch’eqeripurqanku, jinaspa mana imapi tukupurqanku.
37 Chay qhepamanmi jatarillarqantaq censo kashasqan p’unchaykunapi Galilea llaqtayoq Judas, paytapas askha runakunan qatikullarqankutaq, wañupuqtinmi ichaqa payta qatikuq runakunapas ch’eqeripullarqankutaq.
38 Chaymi niykichis: Ama imanaychispaschu chay runakunataqa. Imachus yachachisqanku imachus ruwasqankupas runakunallamanta jamushan chayqa, chinkapullanqan;
39 Diosmantachus jamushan chayqa, manan chinkachiyta atinkichischu.+ Sichus imanankichispas chayqa, yaqapaschá qankuna Diospa contranpi jatarishawaqchis”,+ nispa.
40 Jinan paykunaqa chay yuyaychayta uyarikurqanku, chaymi apostolkunata wajachimuspa waqtallarqankuña,+ kamachirqankutaq amaña Jesuspa sutinpi rimanankupaq, jinaspa kacharipurqanku.
41 Jinan paykunaqa Jatun Juntaq ñaupanmanta kusisqa ripurqanku,+ Jesuspa sutinpi p’enqayta ñak’arisqankumanta Diospa allin qhawarisqan kasqankurayku.
42 Sapa p’unchaymi paykunaqa templopi, wasin-wasinta+ rispa ima Cristo Jesusmanta+ allin willakuykunata mana samaspa yachachisharqanku willasharqanku ima.
Uraypi willakuykuna
^ Qhaway “Astawan yachanapaq A5” nisqata.
^ Chay columnakunaqa chimpa-chimpankan sayasharqan, techoyoqtaqmi karqanpas, chaupinqa calle jinan karqan.
^ Qhaway “Astawan yachanapaq A5” nisqata.
^ Qhaway Explicasqa simikuna nisqapi “Jatun Junta” nisqata.
^ Chaypiqa “Sach’api” otaq “Mallkipi” nillanmantaqmi.
^ Qhaway Explicasqa simikuna nisqapi “Fariseokuna” nisqata.
