Hechos 11:1-30
11 Judeapi kaq apostolkunawan iñiqkunapiwanmi uyarirqanku waj nacionkunamanta runakunapas Diospa siminta chaskisqankumanta.
2 Chaymi Jerusalén llaqtaman Pedro chayamuqtinqa, waj nacionmanta runakuna qhari kaynin qarachata kuchuchikunankuta+ munaqkunaqa payta phiñakurqanku:
3 “¿Cheqachu waj nacionmanta runakunaq wasinman jaykurqanki, jinaspa paykunawan mijurqanki? ¿Imaraykun chayta ruwarqanki?”, nispa.
4 Jinan Pedroqa lliu imachus pasasqanta paykunaman willarqan:
5 “Jope llaqtapi kashaspaymi Diosmanta mañakusharqani, chayllamanmi juj rijuriypi rikuruni cielomanta juj jatun tela jina tawantin ch’ullpanmanta jap’isqa uraykamushaqta, chayqa noqamanpunin chayamurqan.+
6 Chayta qhawaykuqtiymi chaypi kashasqa imaymana animalkuna: tawa chakiyoqkuna, salqakuna, pampanta suchuqkuna, phalaq animalkuna ima.
7 Chayllamanmi juj kunkata uyarini: ¡Pedro, chay animalkunata ñak’aspa mijuy!, nimuqta.
8 Jinan noqaqa nini: Señor, amapuni chaytaqa niwaychu, noqaqa manapunin mijuymanchu ima qhelli kaqtapas ni ima millakuna kaqtapas, nispa.
9 Chaymantan chay kunkaqa nimuwallantaq: Ama qhelli niychu Diospa ch’uyanchasqan kaqkunataqa, nispa.
10 Chay kunkaqa kinsa kutikaman rimapayamuwan, chaymantataq chay rikusqayqa cieloman oqarisqa karqan.
11 Chay ratupachan kinsa qharikuna alojakusqayku wasiman chayamusqaku, paykunataqa juj runan Cesarea llaqtamanta kachamusqa noqa maskhaqta.+
12 Jinan Diospa espiritunqa niwan: Ama iskayaspa paykunawan riy, nispa. Chaymi kay soqta wayqenchiskunawan kuska rirqayku, jinaspa chay runaq wasinman jaykurqayku.
13 ”Paypa willawasqankuman jinaqa, juj angelsi wasinpi payman rijurisqa, jinaspa nisqa: Jope llaqtaman runakunata kachaspa Pedro nisqa Simonta wajachimuy,+
14 paymi willasunki imakunata ruwaspas qanpas wasiykipi kaqkunapas salvasqa kawaqchis chayta, nispa.
15 Paykunata rimapayayta qallarishaqtiymi santo espíritu paykunaman chayamurqan, imaynan noqanchismanpas qallariypi chayamurqan jinata.+
16 Chay ratun noqaqa yuyariruni Señorpa nisqanta, paymi niq: Juanqa unullawanmi bautizarqan,+ qankunan ichaqa santo espirituwan bautizasqa kankichis,+ nispa.
17 Chhaynaqa, Señor Jesucristopi creeqkunaman gratislla qowasqanchis qokuynintataq paykunamanpas Dios qoshanman chayqa, ¿imaraykutaq noqari payta jark’ayman karqan?”,+ nispa.
18 Chaykunata uyarispan paykunaqa manaña Pedrota phiñakurqankuchu, aswanmi Diosta jatunchaspa ninakurqanku: “Chhaynaqa, Diosqa munashasqamá waj nacionniyoq runakunapas juchankumanta pesapakuspa kausayman aypanankutaqa”,+ nispa.
19 Estebanta wañuchisqanku qhepata qatikachay kaqtin ch’eqerichisqa kaqkunaqa+ Fenicia llaqtaman, Chipre islaman, Antioquía llaqtaman iman chayarqanku, paykunaqa judiokunallamanmi allin willakuykunataqa willaqku.+
20 Antioquía llaqtaman chayaq wakin iñiqkunan ichaqa Chipremanta Cirene llaqtamantawan karqanku, paykunamanta wakinmi griego rimaq runakunaman Señor Jesusmanta allin willakuykunata willayta qallarirqanku.
21 Chaymantapas paykunawanmi Jehová* Diosqa kasharqan, chaymi askha runakuna iñipurqanku, jinaspa Señorpa discipulon kapurqanku.+
22 Chaykunamanta yachaspan Jerusalenpi kaq iñiq t’aqaqa Bernabeta+ Antioquía llaqtaman kacharqan.
23 Chayman chayaspan Bernabeqa rikurqan Diosqa iñiqkunata sumaq sonqowan qhawarisqanta. Chaymi anchata kusikuspa llapankuta kallpacharqan tukuy sonqowan+ Señorllaman jap’ipakunankupaq.
24 Bernabeqa allin runa, allin iñiqmi karqan, santo espirituwanpas junt’an kasharqan. Chaymi askha runakuna Señorpi iñipurqanku.+
25 Chayraykun Bernabeqa Tarso llaqtata rirqan tarinankama Saulota+ maskhaq.
26 Tarispataq Antioquía llaqtaman pusamurqan. Paykunaqa juj wata junt’an chay llaqtapi iñiq t’aqawan juñukurqanku, askha runakunamanmi yachachirqankupas. Chay llaqtapin ñaupaqtaqa Jesuspa discipulonkunata cristiano nispa sutichakurqan,+ Diospa nisqanman jinan chayqa karqan.
27 Chay p’unchaykunapin wakin profetakuna+ Jerusalén llaqtamanta Antioquía llaqtaman jamurqanku.
28 Paykunamanta jujninmi karqan Ágabo,+ paymi espirituq kallpachasqan kaspa jinantinpi yarqay kananmanta willarqan+ (chay yarqayqa karqan Claudioq kamachikusqan tiempopin).
29 Chaymi iñiqkunaqa rimanakurqanku imankuchus kasqanman jina+ Judeapi tiyaq iñiqkunaman yanapayta apachinankupaq.+
30 Jinan paykunaqa juñusqankuta umalliqkunaman* apachirqanku Bernabewan Saulowan+ ima.
Uraypi willakuykuna
^ Qhaway “Astawan yachanapaq A5” nisqata.
^ Qhaway Explicasqa simikuna nisqapi “Umalliq, kuraq runa” nisqata.
