Exodo 6:1-30
6 Jehova Diosñataqmi Moisesta nirqa: “Kunanmi qawanki Egipto nacionta kamachiqta* imam ruwasqayta.+ Ñuqapa atiyniyta qawaspanmi llaqtanmanta chayraq kacharisunkichik, hinaspapas qarqumusunkichikmi”, nispa.+
2 Diosqa nirqataqmi: “Ñuqaqa kani Jehova Diosmi.
3 Tukuy atiyniyuq kasqaytam ñuqaqa achka kutipi Abrahanman, Isaacman hinaspa Jacobman riqsichikurqani.+ ‘Jehova’ niq sutiypa+ ima ninan kasqantam ichaqa mana sumaqtachu paykunamanqa riqsichirqani.+
4 Paykunawanqa contratotam* ruwarqani Canaan allpata qunaypaqpas. Chay allpaqa karqa yachapakusqanku* allpam.+
5 Chay contrato ruwasqaykutaqa manam qunqanichu. Kikiypunim qawachkani Israelpa miraynin runaykunapa ñakarisqankutaqa, paykunataqa Egiptopi runakunamá llamkachikuspa ñakarichichkanku.+
6 Chaynaqa Israelpa mirayninkunatayá nimuy: ‘Diosmi nin: “Ñuqa Jehova Diosmi Egiptopi ñakarisqaykichikmanta hinaspa sirviente kasqaykichikmanta hurqumusqaykichik.+ Chaytaqa ruwasaq atiyniywanmi chaynataq Egipto runakunata ñakarichispaymi.+
7 Qamkunaqa ñuqapa runaykunañam kankichik, ñuqañataqmi Diosnikichik kasaq.+ Qamkunaqa sumaqtam yachankichik ñuqaqa Jehova Diosnikichik kasqayta, ñuqam Egiptopi ñakarisqaykichikmanta hurqusqaykichik.
8 Hinaspam Abrahanman, Isaacman hinaspa Jacobman qunay allpaman pusasqaykichik. Chay allpataqa qamkunamanmi qusqaykichik.+ Ñuqa Jehova Diosmi chaynata nini”’”, nispa.+
9 Chaymantam Moisesqa Israelpa miraynin runakunaman Diospa chayna nisqanta willarqa, paykunañataqmi mana kaqpaqpas hapirqakuchu hukmanyasqa hinaspa llumpay ñakarichisqa kasqankurayku.+
10 Hinaptinmi Jehova Diosqa Moisesta nirqa:
11 “Egiptota kamachiqman rispaykiyá nimuy Israelpa miraynin runaykunata kacharinanpaq”, nispa.
12 Moisesñataqmi Jehova Diosta nirqa: “Israelpa mirayninkuna mana uyariwachkaptinqa,+ ¿imaynamá Egiptota kamachiqqa uyariwanman kay mana rimakuy atiqtaqa?”, nispa.+
13 Jehova Diosqa munarqam Israelpa mirayninkuna Egiptomanta lluqsimunankuta. Chaymi Moisestawan Aarontaqa kaqmanta nirqa nisqankunata Israelpa mirayninkunaman hinaspa Egiptota kamachiqman nimunankupaq.
14 Israel ayllukunapi taytankumanta kamachiqkunam kayna karqa. Israelpa piwi* churinmi karqa Ruben,+ Rubenpa churinkunañataqmi karqa: Hanok, Palu, Hezron hinaspa Carmi.+ Paykunam karqa Rubenpa mirayninkuna.
15 Simeonpa churinkunañataqmi karqa: Jemuel, Jamin, Ohad, Jakin, Zoar hinaspa Saul.+ Saulqa karqa Canaan lawmanta warmipa wawanmi. Paykunam karqa Simeonpa mirayninkuna.
16 Leviypa churinkunañataqmi+ karqa: Guerson, Koat hinaspa Merari.+ Paykunapas sapakamam churiyuqkuna karqaku. Leviyqa kawsakurqa 137 watatam.
17 Guersonpa churinkunañataqmi karqa: Libni hinaspa Simei. Paykunapas sapakamam churiyuqkuna karqaku.+
18 Koatpa churinkunañataqmi karqa: Amram, Izar, Hebron hinaspa Uziel.+ Koatqa kawsakurqa 133 watatam.
19 Meraripa churinkunañataqmi karqa: Mali hinaspa Musi.
Paykunam karqa Leviypa mirayninkuna. Churinkunapas sapakamam churiyuqkuna karqaku.+
20 Amramqa casarakurqa Jokebed sutiyuq warmiwanmi, Jokebedqa karqa taytanpa paninmi.+ Jokebedmi wachakurqa Amrampa churinkunata, paykunam karqa: Aaron hinaspa Moises.+ Amramqa kawsakurqa 137 watatam.
21 Izarpa churinkunañataqmi karqa: Corey,+ Nefeg hinaspa Zicri.
22 Uzielpa churinkunañataqmi karqa: Misael, Elizafan+ hinaspa Sitri.
23 Aaronñataqmi casarakurqa Aminadabpa churin Elisebawan, Elisebaqa karqa Nasonpa+ paninmi. Elisebam wachakurqa Aaronpa churinkunata, paykunam karqa: Nadab, Abiu, Eleazar hinaspa Itamar.+
24 Coreypa churinkunañataqmi karqa: Asir, Elcana hinaspa Abiasaf.+ Paykunam karqa Coreypa mirayninkuna.+
25 Aaronpa churin Eleazarñataqmi+ casarakurqa Putielpa huknin warmi churinwan, paymi wachakurqa Fineasta.+
Paykunam karqa Leviy ayllupi kamachiqkunapa mirayninkuna.+
26 Chay ayllumantam Aaronwan Moisesqa karqaku. Paykunatam Jehova Dios nirqa: “Israelpa miraynin runaykunataqa lliwtam tropa-tropata hurqumunkichik”, nispa.+
27 Moiseswan Aaronmi Egiptota kamachiqwan rimarqaku Israelpa miraynin runakunata Egiptomanta hurqunankupaq.+
28 Egiptopi Moises kachkaptinmi Jehova Diosqa Moiseswan rimarqa. Chay punchawmi
29 Jehova Diosqa Moisesta nirqa: “Ñuqaqa Jehova Diosmi kani. Egiptota kamachiqmanyá tukuy nisqaykunata willamuy”, nispa.
30 Moisesñataqmi Jehova Diosta nirqa: “¿Imaynamá Egiptota kamachiqqa uyariwanman kay mana rimakuy atiqtaqa?”, nispa.+
Willakuykuna
^ Utaq: “Faraonta”.
^ Utaq: “Pactotam”. Qaway kay palabrapa ima ninan kasqanta.
^ Utaq: “Tiyapakusqanku”.
^ Utaq: “Punta naceq”.