2 Corintios 9:1-15
9 Diospa runankunata+ yanapanaykichikpaq imallatapas qunaykichikmantaqa manam qillqamunayraqchu.
2 Yachaniñam yanapakuy munasqaykichiktaqa, chaymi Macedonia lawpi kaqkunaman kusikuywan qamkunamanta willakuni, paykunatam nirqani Acaya provinciapi kaqkunaqa qayna watamantaraq yanapakunaykichikpaq listoña kasqaykichikmanta. Chaymi Macedonia lawpi kaqkunaqa kusisqallaña ruwasqaykichikta yacharuspanku yaqa llapallanku chayna ruwayta munachkanku.
3 Chaywanpas iñiqmasinchikkunatam kachamuchkani ruwasqaykichikmanta alabakusqayku mana yanqa kananpaq hinaspa nisqayman hina listo kanaykichikpaq.
4 Manachayqa Macedonia lawpi kaqkunawan hamuspaykum mana listotachu tarimuykikuman, hinaptinmi qamkuna qunaykichik suyasqaykumanta pinqaypi kaymanku, qamkunapas pinqaypitaqmi kawaqchik.
5 Chayraykum iñiqmasinchikkunata kallpancharqani puntata watukamusunaykichikpaq hinaspa yanapakunaykichikpaq imapas qunaykichik kaqta huñuchkanankupaqña, chaynapi qusqaykichikqa mana obligasqa kananpaq aswanqa tukuy sunqumanta kananpaq.
6 Chaynaqa kaytayá yachaychik: Pipas aslla tarpuqqa asllatam cosechanqa, achka tarpuqñataqmi achkata cosechanqa.+
7 Sapakamayá sunqunpi imam tantiasqanman hina quchun, amayá llakikuspachu nitaq obligasqachu,+ Diosqa kuyan kusikuywan quqtam.+
8 Chaymantapas Diosqa mana kuyana kachkaptikichikpas aswan anchatam kuyasunkichikman, chaynapi tukuy tiempo imaykichikpas mana pisispan achkanpi kananpaq, hinaptinmi allinkunata ruwanaykichikpaq llapa imaykichikpas kanqa.+
9 Chayna kananmantam ñawpaq qillqakunapi nin: “Payqa wakchakunaman imatapas achkanpi quykuqmi. Allin ruwaq kayninqa wiña-wiñaypaqmi kanqa”, nispa.+
10 Tarpuqman achkanpi mugu quykuqmi hinaspa runamanpas tantata quykuqmi qamkunamanpas tarpunaykichikpaq muguta qusunkichik, hinaspam muguta mirachinqa, allin ruwasqaykichikmanta cosechaykichiktapas achkayachinqam.
11 Qamkunaqa tukuy imapim allinlla kanaykichikpaq yanapasqa kachkankichik chaynapi qukuykuqllaña kanaykichikpaq, chay qusqaykichikta runakunaman quptiykum runakuna Diosta agradecekunku.
12 Hukkunapa allinninpaq kay yanapakuy quyqa manam Diospa runankunata imapas pisipuqninpi yanapanallapaqchu,+ aswanqa achkallaña runakuna Diosta agradecekunankupaqmi.
13 Chaynata yanapakusqaykichikqa* imayna runa kasqaykichiktam qawachin, chay achkallaña runakunañataqmi Diosta hatunchanku Cristomanta* sumaq willakuyta willakusqaykichikman hina ruwasqaykichikrayku, Diostaqa hatunchankutaqmi paykunapaqpas chaynataq llapallanpaqpas achkanpi qukuykuq kasqaykichikraykupas.+
14 Chaymantapas paykunaqa kuyasunkichikmi, hinaspam Diosta qamkunapaq ruegakunku ancha kuyakuyninta* qamkunaman Dios qawachisusqaykichikmanta.
15 Diosmanyá gracias kachun ancha-ancha allin kaqta mana imallapaq quwasqanchikmanta.
Willakuykuna
^ Utaq: “Diospaq llamkasqaykichikqa”.
^ Utaq: “Diospa akllasqanmanta”.
^ Kaypiqa rimachkan mana kuyana kachkaspa kuyasqa kaymantam.
