Apocalipsis 1:1-20
-
Diosmanta chasquishcatami Jesucristoca ricuchirca (1-3)
-
Canchis congregacioncunata saludashcamanta (4-8)
-
“Ñucami Alfa y Omega cani” nishcamanta (8)
-
-
Juanca Diospaj espíritu yuyachijpimi Amitopaj punllapi carca (9-11)
-
Jesusta jatunyachishcata muscuipi shina ricushcamanta (12-20)
1 Caicunaca Jesucristo ricuchishcacunami. Caicunataca Diosta sirvijcunaman ricuchingapajmi Diosmanta chasquirca. Jesucristoca paipaj angelta cachashpami shamuj punllacunapi ima tucunata paita sirvij Juanman señalcunahuan ricuchirca.
2 Paimi Dios huillashca shimitapish, Jesucristo imata huillashcatapish huillarca. Paica tucui imalla ricushcatapishmi huillarca.
3 Cai profeciapi tiyaj shimicunata sinchita liyijca cushicunmi. Shinallataj chaipi quillcashca shimicunata uyajcunapish, cazujcunapish cushicunmi. Dios agllashca tiempoca ñami quichquiyamucun.
4 Ñucaca Juanmi cani. Asia llajtapi saquirij canchis congregacioncunamanmi quillcacuni.
Diospish, paipaj jatun tiyarina ñaupajpi caj canchis espiritucunapish yallitaj llaquij cashcata cancunaman ricuchichun, sumaj causaitapish cuchun. “Diosca cunanpish tiyaj, ñaupapish tiyaj, shamugrij Diosmi”.
5 Jesucristopish yallitaj llaquij cashcata cancunamanca ricuchichun. Paica Cashcata huillaj Testigo, huañushcacunamanta Punta causarij, cai allpapi tiyaj mandajcunatapish Mandajmi can.
Jesusca ñucanchijtami cꞌuyan. Paipaj quiquin yahuarhuanmi ñucanchij juchacunamanta quishpichirca.
6 Ñucanchij Yaya Diosta sirvichunmi ñucanchijtaca mandajcunata, sacerdotecunata rurarca. Chaimanta Jesusca huiñai huiñaipaj jatunyachishca cachun, huiñai huiñaipaj poderyuj cachun. Chashna cachun.*
7 ¡Ricuichij! Paica pꞌuyu chaupipimi shamunga. Chaitaca tucuicunami ricunga. Lanzahuan tujsijcunapishmi paitaca ricungacuna. Paimantami allpapi causaj tucui familiacunaca llaquirishpa pechopi huajtaringacuna. Chaica chashnatajmi tucunga. Chashna cachun.*
8 Jehová* Diosca: “Ñucami Alfa y Omega cani.* Ñucaca cunanpish tiyaj, ñaupapish tiyaj, shamugrij, Tucui poderta charij Diosmi cani” ninmi.
9 Cancunapaj huauqui Juanmi cani. Cristo Jesushuan shuj shinalla cashcamantami cancuna shinallataj llaquicunata apacuni, ahuantacuni. Cancunahuanmi mandasha. Ñucaca Diosmanta huillashcamanta, Jesusmanta huillashcamantapishmi Patmos nishca islapi carcani.
10 Diospaj espíritu yuyachijpimi Amitopaj punllapi carcani. Chaipi cashpami ñuca huashapica shuj trompeta tocaj shina sinchita rimashcata uyarcani.
11 Chashna uyarishpaca: “Can imata ricushcata shuj rollopi quillcai. Chai quillcashcataca: Éfeso, Esmirna, Pérgamo, Tiatira, Sardis, Filadelfia, Laodicea, cai canchis congregacioncunaman cachai” nircami.
12 Ñucahuan pi parlacushcata ricungapajmi tigrarircani. Chashna tigrarishpaca canchis oro candelerocunatami* ricurcani.
13 Candelerocuna chaupipica runapaj churi layatami ricurcani. Paica chaquicunacama churanahuan churarishca, pechopipish oro chumbihuan chumbillirishcami carca.
14 Shinallataj paipaj uma ajchapish yuraj millma shina, rasu shina yurajllami carca. Paipaj ñahuicunapish nina lunyacuj shinami carca.
15 Paipaj chaquicunapish cobreta hornopi rupachijpi achijnicuj shina achijnicujmi carca. Pai rimashcapish huajiacuj achca yacucuna shinami carca.
16 Paipaj alli maquipica canchis estrellacunatami charicurca. Paipaj shimimantapish ishqui filoyuj espadami llujshirca. Chai espadaca suni, puntasapami carca. Paipaj ñahuipish inti yallitaj achijyachicuj shinami carca.
17 Paita ricushpaca paipaj chaquipimi huañushca shina urmarcani.
Chaimi paipaj alli lado maquita ñuca jahuapi churashpaca cashna nirca: “Ama manchaichu. Ñucami Callaripish, Tucuripish cani,
18 causajpishmi cani. Ñucaca huañushcami carcani. Shinapish cunanca huiñai huiñaitami causacuni. Huañuipaj llavetapish, Pambana Jutcupaj* llavetapishmi charini.
19 Shinaca can imata ricushcacunata quillcai. Cunan imalla tucucushcatapish, chai qꞌuipa imalla tucuna cashcatapish quillcai.
20 Ñuca alli lado maquipi can ricushca canchis estrellacunapish, canchis oro candelerocunapish Dios pacalla charicushcacunami. Chaicunaca caitami ricuchin: chai canchis estrellacunaca canchis congregacioncunamanta angelcunatami ricuchin. Cutin canchis candelerocunaca canchis congregacioncunatami ricuchin.
Notacuna
^ O “Amén”.
^ O “Amén”.
^ “Jehová” shutita huasha diccionariopi ricui.
^ O “A y Z cani”. “Alfa y Omega” shimicunaca griego rimai alfabetopica callari letra y último letrami can.
^ Chai candeleroca mecherocunata churana canchis maquiyujmi carca.
^ Griego rimaipica: “Hadespaj” ninmi. “Hades” shimita huasha diccionariopi ricui.
