Apocalipsis 21:1-27
-
Mushuj jahua pachamanta, mushuj allpamantapish (1-8)
-
Huañui ña mana tiyanamanta (4)
-
“Tucuitami mushujta ruracuni” (5)
-
-
Mushuj Jerusalén ima shina cashcata ricuchishcamanta (9-27)
21 Chai qꞌuipaca shuj mushuj jahua pachata, shuj mushuj allpatami ricurcani. Ñaupaman tiyashca jahua pachapish, ñaupaman tiyashca allpapish chingarishcami carca. Mama cuchapish ña mana tiyanchu.
2 Shinallataj jucha illaj mushuj Jerusalén llajtatami ricurcani. Chai llajtaca Dios maipi cashcamanta, jahua pachamantami uriyamucurca. Paica shuj novia paipaj cusapaj allichirishca shinami allichirishca carca.
3 Chai qꞌuipaca jatun tiyarinamanta shuj sinchi rimashca uyarijtami uyarcani. Chai rimashcami cashna nicurca: “¡Ricui! Diospaj carpa huasica gentecunahuanmi. Diosca paicunahuanmi causanga. Paicunapish Diospaj pueblomi canga. Diosllatajmi paicunahuan canga.
4 Paicunapaj ñahuicunamantaca tucui huiquitami pꞌichanga. Huañuica ña mana tiyangachu. Llaquipish, huacaipish, nanaipish ña mana ashtahuan tiyangachu. Ñaupaman imalla tiyashcacunaca chingarishcami” nicurcami.
5 Jatun tiyarinapi tiyacujca: “¡Ricui! Tucuitami mushujta ruracuni” nircami. Shinallataj paica: “Cai shimicunata quillcai. Cai shimicunaca crinalla, mana llulla shimicunami can” nircami.
6 Paica: “¡Cai shimicunaca ñami pajtarishca! Ñucami Alfa y Omega cani.* Ñucami callaripish, tucuripish cani. Maijanpish yacunachijmanca causaita cuj pugyu yacumantami gratis* ubyachisha.
7 Maijanpish mishajca caicunatami chasquinga. Ñucaca paipaj Diosmi casha. Paica ñuca churimi canga.
8 Shinapish manchajcuna, feta mana charijcuna, millai ruraicunata ruraj mapa runacuna, huañuchijcuna, huainayajcuna,* brujiajcuna, rurashcalla dioscunata adorajcuna, tucui llullajcunapish azufrehuan rupacuj nina cuchapimi shitashca cangacuna. Chaica qꞌuipa huañuitami ricuchin” nircami.
9 Tucuri canchis llaquicunahuan junda caj canchis tazoncunata charicuj canchis angelcunamanta shuj ángel shamushpami ñucataca: “Shamui, noviata ricuchisha, paimi Malta Ovejapaj huarmi cagrin” nirca.
10 Chai angelca Diospaj espirituhuanmi ñucataca shuj jatun, alto urcuman pusharca. Chai urcumantami jucha illaj Jerusalén llajtata ricuchirca. Chai llajtaca jahua pachamanta, Dios maipi cashcamantami uriyacurca.
11 Diospaj sumaj achijnicujhuanmi achijnicurca. Cristal shina achijnicuj yallitaj sumaj jaspe rumi shinami achijnicurca.
12 Jatun, alto pircacunayuj, 12 pungucunayujmi carca. Chai pungucunapica 12 angelcunami shayacurcacuna. Israelmanta 12 familiacunapaj shuticunapishmi pungucunapica quillcashca carca.
13 Inti llujshin ladomanca quimsa pungucunami carca. Janaj ladomanca quimsa pungucunami carca. Ura ladomanca quimsa pungucunami carca. Cutin inti huashicun ladomanca quimsa pungucunami carca.
14 Shinallataj llajta muyundij pircacunaca 12 callari rumicuna jahuapimi shayachishca carca. Chai rumicunapica Malta Ovejapaj 12 apostolcunapaj 12 shuticunami quillcashca carca.
15 Ñucahuan rimacujca llajtatapish, pungucunatapish, muyundij pircacunatapish midingapajmi oro carrizota charicurca.
16 Chai llajtaca chuscu esquinacunayujmi carca. Anchomanpish, largomanpish chaillatatajmi midirca. Angelca carrizohuanmi llajtataca midirca. Chai llajtaca 2.220 kilometrocuna* shinatami charirca. Largomanpish, anchomanpish, altomanpish igualmi carca.
17 Shinallataj muyundij pircacunatami midirca. Chai pircaca: 64 metrocuna* shinatami charirca. Angelca runacuna midij shinallatajmi midirca.
18 Muyundij pircaca jaspe rumihuan rurashcami carca. Llajtapish imahuan mana chagrushca orohuan rurashcami carca. Cristal shina achijnicujmi carca.
19 Chai llajta muyundij pirca callarica tucui laya sumaj rumicunahuan allichishcami carca: puntaca jaspe rumimi carca. Catijca zafiro rumimi carca. Ishquipaj qꞌuipaca calcedonia rumimi carca. Quimsapaj qꞌuipaca esmeralda rumimi carca.
20 Chuscupaj qꞌuipaca sardónica rumimi carca. Pichcapaj qꞌuipaca sardio rumimi carca. Sujtapaj qꞌuipaca crisólito rumimi carca. Canchispaj qꞌuipaca berilo rumimi carca. Pusajpaj qꞌuipaca topacio rumimi carca. Iscunpaj qꞌuipaca crisoprasa rumimi carca. Chungapaj qꞌuipaca jacinto rumimi carca. Chunga shujpaj qꞌuipaca amatista rumimi carca.
21 Ashtahuanpish 12 pungucunaca 12 perlacunami carca. Cada pungumi shuj solo perlahuan rurashca carca. Chai llajtapaj jatun ñanpish imahuan mana chagrushca orohuan rurashcami carca. Vidrio shinami carca.
22 Chai llajtapica Diospaj huasitaca maipi mana ricurcanichu. Ashtahuanpish Tucui poderta charij Jehová* Dios, Malta Ovejapishmi chai llajtapaj huasica.
23 Chai llajtaca intipish, lunapish achijyachichunca mana minishtinchu. Diospaj sumaj achijnicujmi llajtataca achijyachin. Llajtapaj lamparapish Malta Ovejami can.
24 Chai llajtapaj luz achijyachijpimi llajtacunaca puringacuna. Allpapi mandajcunapish chai llajtatami jatunyachingacuna.
25 Pungucunapish tucui punlla mana huichcaringachu. Chaipica tutaca ña mana tiyangachu.
26 Gentecunaca chai llajtatami jatunyachingacuna, alli ningacuna.
27 Shinapish millaita ruraj mapa runacunapish, umajcunapish chai llajtamanca ni maijan manataj yaicungachu. Causaita chasquinapaj rollopi quillcashcacunallami chaimanca yaicungacuna. Chai rolloca Malta Ovejapajmi can.
Notacuna
^ O “A y Z cani”. “Alfa y Omega” shimicunaca griego rimai alfabetopica callari letra y último letrami can.
^ O “mana cobrashpa”.
^ “Huainayana” shimita huasha diccionariopi ricui.
^ Griego rimaipica: “12.000 estadiocuna” ninmi. Shuj estadioca 185 metrocunatami charirca.
^ Griego rimaipica: “144 codos” ninmi.
^ “Jehová” shutita huasha diccionariopi ricui.
