Apocalipsis 12:1-17
-
Huarmimanta, cꞌari huahuamanta, dragonmantapish (1-6)
-
Miguelca dragonhuanmi macanacurca (7-12)
-
Dragonta allpaman shitashcamanta (9)
-
Diabloca ashalla tiempota charishcatami yachan (12)
-
-
Dragonca huarmitami catirashpa llaquichirca (13-17)
12 Jahua pachapica shuj jatun señaltami ricurcani: chaipica inti shina achijnicuj churanata churarishca shuj huarmimi carca. Lunapish paipaj chaqui ucupimi carca. Paipaj umapipish 12 estrellacunayuj coronata churarishcami carca.
2 Paica chichumi carca. Huachana punllacuna ña pajtashcamantami huachana nanaihuan achca llaquita apashpa capariricurca.
3 Shinallataj jahua pachapica shujtaj señaltami ricurcani: chaipica nina shina pucanicuj jatun dragonmi ricurirca. Chai dragonca canchis umacunayuj, chunga gachucunayujmi carca. Paipaj umacunapica canchis coronacunatami* charirca.
4 Paipaj chupahuanca quimsapi chaupishca shuj parte estrellacunatami jahua pachamanta aisashpa allpaman shitarca. Chai dragonca huahua huacharijpi chai rato millpungapajmi huachagrij huarmipaj ñaupajpi shayarirca.
5 Chai huarmica shuj cꞌari huahuatami huacharca. Chai cꞌari huahuami tucui llajtacunata fierro varahuan michinga. Huahuaca Diospajman, Diospaj jatun tiyarinamanmi apashca carca.
6 Cutin huarmica shitashca pambapi, Dios allichishca lugarpimi miticunaman rirca. Chaipimi 1.260 punllacunata paimanca carangacuna.
7 Jahua pachapica shuj macanacuimi callarirca. Chaipica Miguelmi* paipaj angelcunandij dragonhuan macanacurca. Dragonpish paipaj angelcunandijmi paicunahuan macanacurca.
8 Shinapish paicunaca mana mishai tucurcacunachu.* Jahua pachapi cachunpish paicunataca mana ashtahuan saquircachu.
9 Chai jatun dragonca allpamanmi shitashca carca. Paica ñaupa culebrami. Diablo, Satanás shutipishmi. Paimi allpapi causajcunataca tucuicunata pandachicun. Paitami paipaj angelcunandij allpaman shitarca.
10 Shinallataj jahua pachapi shuj sinchi rimashca cashna nicujtami uyarcani:
“¡Ñucanchij Diosmi quishpichishca. Paipaj podertapishmi ricuchishca. Paipaj Gobiernomi mandai callarishca. Cristopish* autoridadtami chasquishca! Ñucanchij Diospaj ñaupajpi tutapish, punllapish ñucanchij huauquicunata juchachijca allpamanmi shitashca cashca.
11 Paicunaca Malta Ovejapaj yahuarmanta, paicuna huillashcamantapishmi paitaca misharcacuna. Huañuna cashpapish paicunapaj causaitaca mana llaquircacunachu.
12 Chaimanta ¡jahua pachapish, chaipi causajcunapish cushicuichij! Ashtahuanpish ¡allpapi causajcuna, mama cuchapi causajcunapish aij imachari tucunguichij! Diabloca ashalla tiempota charishcata yachashpami cancunapajmanca yallitaj pꞌiñarishpa uriyashca” nircami.
13 Dragonca allpaman shitashca cashcata cuentata cushpami cꞌari huahuata huachaj huarmitaca catirashpa llaquichirca.
14 Shinapish Diosmi chai huarmimanca chaquishca pambaman, paipaj allichishca lugarman volashpa richun jatun aguilapaj ishqui alascunata curca. Chaipimi shuj tiempota, ishqui tiempota, chaupi tiempotapish* culebramanta carupi paimanca carangacuna.
15 Chai huarmi jatun yacupi ahogarichunmi culebraca huarmita catishpa, paipaj shimimantaca jatun yacuta shina yacuta shitarca.
16 Shinapish huarmitaca allpami ayudarca. Allpa pascarishpami dragonpaj shimimanta shitashca yacutaca millpurca.
17 Chaimi dragonca huarmihuan yallitaj pꞌiñarirca. Shinallataj huarmipaj saquirij huahua huahuacunahuanmi macanacunaman rirca. Chai huahua huahuacunami Diospaj mandashcacunata cazuncuna, Jesusmanta huillangapajpish agllashcacuna can.
Notacuna
^ Griego rimaipica: “diademacunatami” ninmi.
^ “Miguel” shutica ‘¿Dios shinaca pitaj canyari?’ nisha ninmi.
^ Caitaca “Dragonca mana misharcachu” nishpapishmi traducishcacuna.
^ Griego rimaipica: “paipaj Cristopish” ninmi.
^ Tucuita sumajpica quimsa tiempo chaupimi can.
