Apocalipsis 20:1-15
-
Satanasca 1.000 huatacunatami huichcashca canga (1-3)
-
Cristohuan 1.000 huatacunata mandagrijcunamanta (4-6)
-
Satanasta cacharichishcamanta, tucuchinamantapish (7-10)
-
Yurajlla jatun tiyarina ñaupajpi huañushcacuna juzgashca canamanta (11-15)
20 Jahua pachamanta shuj ángel jatun jutcupaj llavehuan, paipaj maquipipish shuj jatun cadenahuan uriyamucujtami ricurcani.
2 Paica dragonta japishpami 1.000 huatacunata huatarca. Chai dragonmi ñaupa culebra, Diablo, Satanaspish can.
3 Chashna huatashpami jatun jutcuman shitarca. 1.000 huatacuna tucuringacama llajtacunata ama cutin pandachichunmi jutcupi huichcashpa, jutcuman yaicunatapish sellashpa churarca. Chai qꞌuipaca asha tiempotami cacharichishca canga.
4 Jatun tiyarinacunatami ricurcani. Chaicunapi tiyarijcunamanmi Diosca juzgachun autoridadta curca. Jesusmantapish, Diosmantapish huillashcamanta huañuchishcacunapaj* yahuartami ricurcani. Paicunaca manchanai millai animaltapish, chai animalman rijchajta rurashca animaltapish mana adorarcacunachu. Shinallataj paicunapaj frentepi, paicunapaj maquipica señalta mana chasquircacunachu. Paicunaca causarishpami Cristohuan 1.000 huatacunata mandarcacuna.
5 Paicunami punta causarijcunaca. (Caishuj huañushcacunaca 1.000 huatacuna tucuringacama mana causarircacunachu).
6 Punta causarijcunaca cushicuncunami. Paicunaca jucha illajcunami. Qꞌuipa huañuica paicunata mandangapaj autoridadta mana charinchu. Ashtahuanpish paicunaca Diospaj, Cristopaj sacerdotecunami cangacuna. Paicunaca Cristohuanmi 1.000 huatacunata mandangacuna.
7 Shinapish 1.000 huatacuna tucurijpimi Satanasca prezumanta cacharichishca canga.
8 Paica allpa chuscu esquinacunapi caj llajtacunata pandachingapajmi llujshinga. Paicunami Gog nishca, Magog nishcacuna can. Chashna pandachishpami paicunataca macanacungapaj tandachinga. Chai gentecunaca mama cucha arena shinami can.
9 Paicunaca tucui allpata rishpami jucha illajcunapaj carpa huasi muyundijpi, Dios cꞌuyashca llajta muyundijpi shayarircacuna. Shinapish jahua pachamanta nina uriyashpami paicunataca rupachirca.
10 Paicunata pandachij Diabloca azufrehuan rupacuj nina cuchapimi shitashca carca. Chaipimi manchanai millai animalpish, llulla profetapish ña carcacuna. Paicunaca tutapish, punllapish huiñai huiñaitami llaquichishca* cangacuna.
11 Yurajlla jatun tiyarinata, chai jahuapi tiyacujtapishmi ricurcani. Allpapish, jahua pachapish paipaj ñaupajmantami chingarirca. Cutinca ña mana ricurircacunachu.
12 Shinallataj huañushcacunataca jatuncunatapish, uchillacunatapish jatun tiyarina ñaupajpi shayacujtami ricurcani. Rollocunapishmi pascarirca. Shinapish shujtaj rollomi pascarirca. Chai rolloca causaita chasquinapaj rollomi carca. Rollocunapi quillcashca shinallatajmi huañushcacunataca paicunapaj ruraicunamanta juzgarca.
13 Mama cuchaca paipi caj huañushcacunatami tigrachirca. Huañuipish, Pambana Jutcupish* paicunapi caj huañushcacunatami tigrachircacuna. Huañushcacunaca cada unomi paicunapaj ruraicunamanta juzgashca carca.
14 Huañuipish, Pambana Jutcupish* nina cuchamanmi shitashca carcacuna. Nina cuchaca qꞌuipa huañuitami ricuchin.
15 Ashtahuanpish causaita chasquinapaj libropi mana quillcashcacunaca nina cuchamanmi shitashca carcacuna.
Notacuna
^ Griego rimaipica: “hachahuan huañuchishcacunapaj” ninmi.
^ O “prezushca”.
^ O “Hadespish”. Cai shimica huañushcacuna samaricujta ricuchingapajllami can. “Hades” shimita huasha diccionariopi ricui.
^ O “Hadespish”. Cai shimica huañushcacuna samaricujta ricuchingapajllami can. “Hades” shimita huasha diccionariopi ricui.
