Hëchus 1:1-26
1 Kuyashqa Teöfilu, punta kaq willakuytaqa qellqamurqä, Jesus imëkata rurar y yachatsikur qallanqampita,+
2 santu espïritu yanapaptin akranqan apostolkunata yachatsir,+ ciëluman apashqa kanqan junaqyaq pasanqanta willakurmi.+
3 Imëka sufrimientupa pasarirmi, pëqa kawamushqa kanqanta cläru pruëbakunawan rikätsikur pëkunata yuripurqan.+ Pëtaqa cuarenta junaqmi rikäyarqan, y Diospa Gobiernumpitam pëkunata parlaparqan.+
4 Pëkunawan juntarëkarmi llapankunata kënö mandarqan: “Ama Jerusalenpita ëwakuyëtsu,+ sinöqa qamkunata willanqä* Teyta änikunqanta shuyar këkäyë.+
5 Juanqa yakuchömi bautizarqan, peru qamkunaqa ichikllachönam santu espïrituwan+ bautizashqa kayanki”.
6 Tsëmi yapë juntakäyanqanchö, “Teytë, ¿kanan witsanku Israelchö gobiernuta yapë patsätsinki?”+ nir tapuyarqan.
7 Tsënam pëqa kënö nirqan: “Qamkunaqa manam derëchuyoqtsu kayanki, Teyta autoridäninman* churanqan tiempukunata o witsankunata musyayänëkipaq.+
8 Peru santu espïrituta chaskirmi poderyoq tikrayanki,+ Jerusalenchö,+ entëru Judëa provinciachö, Samariachö,+ y patsapa mas karu kuchunyaqmi*+ testïgukuna kayanki”.+
9 Tsëkunata parlar ushariptinnam, pëkuna rikarëkäyaptin Teyta Dios ciëluman apakurqan y pukutë tsaparkuptinmi rikäyarqannatsu.+
10 Ciëluman ëwakoqta rikarëkäyaptinmi, yuraq röpashqa ishkaq nunakuna illaqpita lädunkunachö yurir+
11 kënö niyarqan: “Galilëa nunakuna, ¿imanirtan ciëluman rikarar këkäyanki? Qamkunapita ciëluman apashqa Jesusqa, ciëluman ëwakoqta rikäyanqëkinöllam shamunqa”.
12 Tsëpitanam pëkunaqa, Olïvus jirka nir reqiyanqampita Jerusalenman kutikuyarqan.+ Tsë jirkaqa, Jerusalenpita juk kilömetruchönöllam* karqan.
13 Chëkurnam posadakuyanqan wayipa altusninchö cuartuman witsäyarqan. Tsëchömi Pëdru, Juan, Santiägu y Andres, Felïpi y Tomas, Bartolomë y Mateu, Alfeupa tsurin Santiägu, Llapan Shonqunwan Imatapis Ruraq* Simon, y Santiägupa tsurin Jüdas këkäyarqan.+
14 Pëkunam juk yarpëlla llapankuna juntu mañakur këkäyarqan, pëkunawanmi juk ishkë warmikuna,+ Jesuspa mamänin Marïa y Jesuspa wawqinkuna këkäyarqan.+
15 Tsë junaqkunam Pëdruqa wawqikuna y panikuna këkäyanqanchö sharkur,* (tsëchö këkaqkunaqa cientu veintinömi kayarqan) pëkunata kënö nirqan:
16 “Ollqukuna, wawqikuna, Jesusta prësoq nunakunata pushaq Jüdaspaq,+ santu espïritu yanapaptin David willakunqanqa cumplikänanmi karqan.+
17 Pëqa noqantsikwanmi këkarqan,+ y kë sagrädu rurëpaqmi akrashqa karqan.
18 Tsë nunaqa, mana allita rurar tarinqan qellëwanmi chakrata rantirqan+ y tsëman peqapa o umapa jeqaptin pachan pashtaptinmi aqishninkunapis* yarqaramurqan.+
19 Tsëtaqa Jerusalenchö llapan kawaqkunam musyariyarqan. Tsëmi idiömankunachö Akeldama nir tsë chakrapa jutin churayarqan, tsëqa ‘yawar chakra’ ninanmi.
20 Awmi, Salmus libruchömi kënö qellqarëkan: ‘Wayimpis tsunyëkar quedatsun, y ama ni pï tsëchö kawatsuntsu’+ y ‘ruranampaq kaqta jukna ruratsun’.+
21 Tsëmi Señor Jesus imëkata rurar noqantsikwan këkanqan witsanchö, noqantsikwan pureq ollqukunapita jukta akranantsik.
22 Awmi, Jesusta Juan bautizanqampita,+ noqantsikpita ciëluman apashqa kanqan junaqyaq,+ noqantsikwan juntu pë kawarimunqampita testïgu kanampaqmi noqantsikwan pureq ollqukunapita jukta akranantsik”.+
23 Tsëmi ishkaqta akrayarqan: Barsabas nir reqiyanqan Josëta, pëtaqa Justu nirpis reqiyaqmi, y Matïasta.
24 Tsëpitanam Teyta Diosman mañakur kënö niyarqan: “Llapankunapa shonqunta reqeq Teyta Jehovä,*+ musyëkatsiyämë kë ishkan nunakunapita mëqanta akranqëkita,
25 tsënöpa kë sagrädu rurëta y apostol kë carguta Jüdaspa rantin chaskinampaq. Jüdasqa kikin munanqanta rurakunampaqmi tsëkunata dejarqan”.+
26 Suertita jitariyaptinnam+ Matïas akrashqa yarqurqan, y pëmi onci apostolkunaman yapakarqan.*
Nötakuna
^ Kënöpis niyanmi: willayanqaq.
^ O “cargunman”.
^ O “patsapa entëru kuchunkunayaqmi”.
^ O “säbadu junaqchö ëwëta puëdiyanqanchönöllam”.
^ O “Kushi Kushilla Imatapis Ruraq”.
^ Kënöpis niyanmi: ichirkur.
^ Kënöpis niyanmi: aqashninkunapis.
^ O “11 apostolkunawan yupashqa karqan”. Tsënö nirqa, pëpis 11 apostolkunanö kanqampaqmi parlëkan.