UN PAR di aña pasá, Roald i Elsebeth, un pareha ku e tempu ei tabatin kasi 50 aña, tabata hiba un bida kómodo na Bergen, e di dos stat mas grandi di Noruega. Huntu ku nan yu hòmber i yu muhé, Fabian i Isabel, nan tabata sirbi fielmente den nan kongregashon. Roald tabata ansiano i Elsebeth tabata un pionero, i Fabian i Isabel tabata publikadónan aktivo den kongregashon.

Sinembargo, na sèptèmber 2009 e famia a disidí di hasi algu diferente. Nan a bai prediká pa un siman na un área aislá. Roald i Elsebeth, huntu ku Fabian, kende e tempu ei tabatin 18 aña, a bai Nordkyn, un península situá den e region di Finnmark, mas ariba di e Sírkulo Ártiko. Einan, den e pueblito di Kjøllefjord, nan a prediká huntu ku otro ruman ku tambe a bini na e área aislá ei pa yuda den e trabou di prediká. Roald a bisa: “Na kuminsamentu di e siman ei, mi tabata sinti mi hopi kontentu ku mi a logra regla mi asuntunan di tal manera ku mi por a partisipá den e aktividat spesial akí pa henter un siman.” Pero, den e mesun siman ei, Roald a kuminsá sinti su mes inkómodo. Kiko a pasa?

Roald a konta: “Ònferwagt, Mario, un pionero ku ta sirbi na Finnmark, a puntra nos si nos lo tabata dispuesto pa muda bai un stat ku yama Lakselv pa yuda e kongregashon einan ku tabata konsistí di 23 publikadó.” E pregunta a kohe Roald kompletamente for di base. El a splika: “Ami ku Elsebeth a pensa riba e posibilidat di sirbi kaminda tabatin mas nesesidat di publikadó—pero esei lo tabata despues ku nos yunan lo a bai biba riba nan mes.” Ma durante e par di dianan ku Roald a prediká den e área isolá akí, e por a mira ku e hendenan tabatin masha deseo pa siña tokante Yehova. Nan tabatin mester di yudansa awor, no despues. El a bisa: “E pregunta di Mario a molestiá mi konsenshi i a pone asta ku mi no por a drumi pa vários anochi.” Anto Mario a hiba Roald ku su famia Lakselv, rònt di 240 kilometer zùit di Kjøllefjord. Mario tabata ke pa e bishitantenan mes wak e kongregashon chikitu ei.

Na Lakselv, Andreas, un di e dos ansianonan lokal, a mustra e bishitantenan e área i e Salòn di Reino. E rumannan di e kongregashon a duna nan un kaluroso bonbiní i a bisa Roald i Elsebeth ku nan tabatin masha gana pa nan bin biba einan pa yuda ku e obra di Reino. Ku un sonrisa, Andreas a bisa Roald ku ya el a traha un afsprak pa un entrevista pa un trabou p’e i pa Fabian! Kiko Roald ku su famia lo a hasi awor?

Fabian su promé reakshon tabata: “Ami sí no tin gana di bin biba akinan.” E solo idea ku e tabatin ku bai laga su bon amigunan ku el a lanta kuné den su kongregashon i bin biba den un stat chikitu no a atra’é mashá. Ademas, e no a kaba su kurso pa bira elèktrishèn. Sinembargo, ora nan a puntra Isabel (ku e tempu ei tabatin 21 aña) kiko el a pensa di e idea di muda, el a bisa: “Esei ta nèt loke semper mi kier a hasi!” Pero despues Isabel a bisa: “Ora mi a sigui pensa riba dje, mi a puntra mi mes si esaki realmente tabata un bon idea. ‘Lo mi no sinti falta di mi amigunan? No ta mihó mi keda den mi kongregashon kaminda kosnan ta mas kumbiniente i mas sigur?’” Kon Elsebeth a reakshoná riba e invitashon? El a bisa: “Mi a sinti ku ta komo si fuera Yehova a duna nos famia un asignashon. Pero mi a pensa tambe riba nos kas resien renobá i tur e kosnan ku nos tabatin den nos kas i ku nos a yega na dje den e último 25 añanan.”

Na final di e siman spesial, Roald ku su famia a regresá Bergen, pero nan no por a stòp di pensa riba nan rumannan kristian na Lakselv, un 2.100 kilometer leu. Elsebeth a bisa: “Mi a hasi hopi orashon na Yehova, i mi a keda den kontakto ku e rumannan ku nos a konosé. Nos tabata manda potrèt pa otro i konta otro nos eksperensianan.” Roald a bisa: “Ami tabatin mester di tempu pa e idea di muda senk bon den mi. Tambe mi tabatin ku puntra mi mes si esaki lo tabata posibel. Kon nos lo a mantené nos mes? Mi a hasi hopi orashon na Yehova i a papia ku mi famia i ku e rumannan ku tabatin mas eksperensia.” Fabian a konta: “Mas mi a pensa riba dje, mas mi a realisá ku mi no tabatin un motibu bálido pa bisa nò. Hopi biaha mi tabata hasi orashon na Yehova, i pokopoko pero sigur e deseo pa muda bai einan a bira mas grandi.” I kiko di Isabel? A fin di prepará su mes pa e posibel mudansa, el a kuminsá traha pionero den e stat kaminda nan tabata biba. Despues di a traha pionero pa seis luna, durante kua el a dediká hopi tempu tambe na estudio personal di Beibel, el a sinti ku e tabata kla pa hasi e kambio grandi ei.

Segun ku e deseo pa sirbi kaminda tin mas nesesidat di publikadó a bira mas grandi, e famia a dal paso pa logra nan meta. Roald tabatin un trabou ku tabata paga bon i ku e tabata gusta mashá, pero el a pidi su doño di trabou si e por a laga su trabou (tuma ‘buiten bezwaar’) pa un aña. Ma su doño di trabou a pidié pa e keda traha partaim—siguiendo un skema di traha dos siman i haña liber seis siman. Roald a bisa: “Finansieramente, mi a bai hopi atras, pero tur kos a sali bon sí.”

Elsebeth a konta: “Mi kasá a pidi mi pa purba di haña un kas na Lakselv i hür esun di nos na Bergen. A tuma mi hopi tempu i esfuerso, pero nos a logra. Despues di un tempu, nos yunan a haña trabou partaim i nan ta yuda nos kubri e gastunan di kuminda i transporte.”

 Isabel a bisa: “Kaminda nos a bai biba ta un stat chikitu. Pues, komo pionero, mi reto di mas grandi tabata pa haña un trabou ku mi por a sostené mi mes kuné. Tin biaha kosnan no tabata pinta bon.” Tòg el a logra kubri su gastunan, ya ku e tabata dispuesto pa tuma kualke trabou partaim ku e por a haña, pa chikitu ku esei por tabata (el a haña nuebe durante e promé aña). I kon a bai ku Fabian? Fabian a bisa: “Pa mi por a kaba e kurso pa bira elèktrishèn, mi tabatin ku kore stazje. Esei ta loke mi a hasi na Lakselv. Mas despues, mi a pasa mi eksamen i a haña un trabou partaim komo elèktrishèn.”

Marelius i su esposa Kesia tambe kier a sirbi kaminda tabatin mas nesesidat di publikadó. Marelius, kende awor tin 29 aña, a bisa: “E diskursonan i entrevistanan ku mi a skucha na kongreso tokante e trabou di pionero a motivá mi pa pensa riba e posibilidatnan pa amplia mi sirbishi.” Sinembargo, pa Kesia, kende awor tin 26 aña, e idea di muda bai for di su famia tabata un opstákulo. El a bisa: “Mi tabatin miedu di e idea di bai laga mi sernan kerí.” Ademas, Marelius tabata traha fultaim pa paga e hipotek riba nan kas. El a bisa: “Ku yudansa di Yehova i hopi orashon, den kua nos tabata pidié yuda nos hasi kambio, nos por a muda bai.” Na promé lugá, nan a kuminsá dediká mas tempu na estudio personal di Beibel. Despues, e pareha a bende nan kas i a kita for di trabou. Na ougùstùs 2011, nan a muda pa Alta, un stat den nort di Noruega. Einan, pa nan gana nan pan di kada dia komo pionero, Marelius ta traha komo akountent i Kesia ta traha den un pakus.

Knut i Lisbeth, un pareha ku aworakí tin 30 i piku aña di edat, a sinti nan konmoví ora nan a lesa e relatonan di Anuario tokante rumannan ku a bai sirbi kaminda tin mas nesesidat di publikadó di Reino. Lisbeth a bisa: “E eksperensianan akí sigur sigur a lanta den nos e deseo pa sirbi den un otro pais, pero mi a vasilá pa tuma un desishon pasobra mi a duda si un hende gewon manera ami lo por a hasi un kos asina.” Tòg nan a dal paso pa logra nan meta. Knut a bisa: “Nos a bende nos apartamento, i pa spar sèn, nos a muda bai biba serka mi mama. Mas despues, pa haña un idea kiko ke men sirbi den un otro pais, nos a muda bai un kongregashon di abla ingles na Bergen pa un aña, kaminda nos a keda serka mama di Lisbeth.” No a tarda muchu pa Knut i Lisbeth sinti ku nan tabata kla pa dal e último paso, anto unu basta grandi, esta, di muda bai Uganda. Tur aña nan ta bai Noruega bèk pa dos luna pa traha. Asina nan ta haña sufisiente fondo pa por biba i prediká fultaim na Uganda pa restu di e aña.

Kon kosnan a sigui ku e rumannan akí ku a ofresé nan mes pa sirbi di buena gana otro kaminda? Roald a bisa: “Nos ta pasa muchu mas tantu tempu huntu komo famia den e área isolá akí ku tempu nos tabata biba na Bergen. Nos a sera mas ku  otro. Ta un bendishon pa mira kon nos yunan a progresá spiritualmente.” El a agregá: “Ademas, awor nos no ta dje preokupá ei mas ku kos material. Nos no ta duna asina tantu balor mas na nan.”

Elsebeth a mira e nesesidat pa siña un otro idioma. Dikon? E teritorio di Kongregashon Lakselv ta inkluí e pueblo di Karasjok, den e área sentral di e saminan, un pueblo indígena di e regionnan norteño di Noruega, Suesia, Finlandia i Rusia. Pues pa Elsebeth por a alkansá e hendenan di e pueblo akí mas fásil, el a sigui un kurso den e idioma sami. Awor e por hiba un kòmbersashon simpel den e idioma ei. E ta disfrutando di e trabou den su teritorio nobo? Elsebeth a bisa ku un kara radiante: “Mi ta dirigí seis estudio di Beibel. Lo mi no ke ta niun otro kaminda ku no ta aki!”

Fabian, kende awor ta traha pionero i ta un sirbidó ministerial, a bisa ku e ku Isabel a yuda tres hóben di nan kongregashon nobo ku tabatin mester di animashon pa ta mas enbolbí den aktividatnan di e kongregashon. Awor tur e tres hóbennan akí ta aktivo den sirbishi. De echo, dos di nan a batisá i a traha pionero ousiliar na mart 2012. Un di nan, un ruman muhé ku a kuminsá drif bai for di e bèrdat, a gradisí Fabian ku Isabel ku nan a yud’é bira fuerte atrobe. Fabian a bisa: “Mi hemut a yena ora el a bisa esei. Ta un goso di por yuda un ruman!” Isabel a remarká: “Den e asignashon akí, mi por a ègt ‘purba i mira ku Yehova ta bon.’” (Sal. 34:8) Anto el a agregá: “I riba tur esei, nos ta ègt disfrutá di nos sirbishi akinan!”

Awor Marelius ku Kesia ta hiba un bida mas simpel, pero ku mas satisfakshon. E kongregashon na Alta, na unda nan a muda bai, awor tin 41 publikadó. Marelius a bisa: “Ora mi wak bèk i mira kuantu nos bida a kambia, mi ta sinti mi hopi animá. Nos ta gradisí Yehova ku nos por sirbié komo pionero akinan. No tin nada mas dushi ku esei.” Kesia a agregá: “Mi a siña konfia mas den Yehova, i el a kuida nos bon. Tambe mi a ripará ku e echo ku mi ta biba mas leu for di mi famianan ta yuda mi apresiá e momentonan ku nos ta pasa huntu mas ainda. Nunka a duel mi ku nos a tuma e desishon ei.”

I kon ta bayendo ku Knut i Lisbeth na Uganda? Knut a bisa: “A tuma un poko tempu pa ahustá na un pais i un kultura nobo. Awa i koriente ta bai kada ratu, i tambe nos sa haña doló di stoma, pero nos por tin kuantu estudio di Beibel ku nos ke!” Lisbeth a bisa: “Apénas mei ora for di kaminda nos ta biba tin teritorio kaminda hende nunka a yega di tende e bon notisia. Pero ora nos bai einan, nos ta haña hende ta lesa nan Beibel i ta pidi nos pa siña nan komprond’é. E goso ku bo ta sinti di por siña hende humilde asina e mensahe di Beibel ta inkomparabel!”

Ki felis nos Lider, Kristu Hesus, mester ta ora e mira for di shelu kon e obra di predikashon ku el a inisiá ta yega na mas i mas region di tera! Sí, pa tur sirbidó di Dios ta un goso di por ofresé nan mes di buena gana pa kumpli ku e mandato di Hesus pa ‘hasi hende di tur nashon su disipel.’—Mat. 28:19, 20.