María Isabel ta un publikadó hóben i yen di entusiasmo ku ta biba den e stat San Bernardo, na Chile, Suramérika. E ku su famia ta di e pueblo indjan mapuche. Ku masha entusiasmo, henter e famia a bin ta apoyá e esfuersonan pa forma un kongregashon nobo na e idioma mapuche, ku ta ser yamá tambe mapudungun.

Den nan kongregashon a keda anunsiá ku lo bai tene e Memorial, òf Konmemorashon di e morto di Kristu na idioma mapudungun i ku lo tin 2.000 papel di invitashon disponibel na e idioma ei pa parti. Esaki a pone María Isabel pensa. Kiko é lo por hasi pa yuda parti e invitashonnan? El a kòrda riba algun eksperensia di otro hóbennan Testigu di Yehova ku tabatin éksito ora nan a prediká na nan kompañero- i maestronan di skol. El a papia ku su mayornan tokante e asuntu, i huntu nan a disidí ku María Isabel lo a bini ku un plan pa parti e invitashonnan na skol. Ki plan el a bini kuné?

Promé, María Isabel a pidi e direktiva di skol pèrmit pa plak un invitashon na entrada di skol. Nan a bai di akuerdo ku su petishon i a elogi’é pa su inisiativa. Un mainta na skol, ora ku nan tabata kontrolá lista di presensia, e kabes di skol asta a menshoná e invitashon via spiker!

Kaba, María Isabel a pidi pa bishitá tur klas. Despues ku el a haña pèrmit serka e maestro, e tabata puntra den kada klas si tabatin mucha ku ta mapuche. El a bisa: “M’a pensa ku kisas lo tin 10 pa 15 mucha ku ta mapuche den henter e skol; logá tabatin hopi mas! Na tur mi a parti 150 invitashon!”

Un señora ku a mira e poster di e invitashon na e entrada di skol a puntra ta ku ken e tin ku papia tokante e evenemento. Imaginá kon sorprendí el a keda ora nan a mand’é bai papia ku un mucha muhé di 10 aña! María Isabel a bisa ku un smail: “El a ferwagt un persona mas grandi.” El a duna e señora un invitashon i un splikashon kòrtiku i a pidié su adrès ya asina e ku su mayornan por a bishitá e señora i kont’é mas tokante e Reino di Dios. E 20 publikadónan ku ta sirbi den e teritorio di idioma mapudungun a keda masha kontentu di mira e señora i tambe 26 otro persona interesá di e pueblo mapuche presente na Memorial. Awor e grupo ei ta un kongregashon progresivo!

Akaso bo tambe lo por tuma e mesun tipo di inisiativa ei? No ta importá ki edat bo tin; bo por invitá bo kompañeronan di skol òf bo koleganan di trabou na Memorial òf na un diskurso públiko òf un kongreso di distrito. Bo ke haña algun idea kon bo por tin éksito ku un proyekto asina? Wèl, bo por buska eksperensianan ku a sali den nos publikashonnan. Ademas, pidi Yehova duna bo su spiritu santu pa yuda bo haña e kurashi pa papia tokante dje. (Luk. 11:13) Si bo hasi asina, bo tambe lo por keda gratamente sorprendí i hopi animá ora bo mira e éksito di bo esfuerso bon planiá.