Абон порнографи a тынг парахат у. Фенӕн ӕй ис рекламӕты, модӕйы, киноты, музыкӕйы, журналты, телевизоры, видеохъӕзтыты, смартфонты, планшетты ӕмӕ афтӕ дарддӕр, стӕй Интернеты ӕмӕ ма абон онлайн къамтӕ кӕрӕдзимӕ цы сайтты уылты фервитынц, уым дӕр. Нӕ рӕстӕджы порнографи бирӕтӕм диссаг нал кӕсы. Порнографимӕ ӕнӕфсисӕй чи кӕсы, уыцы адӕмы ӕмӕ уыцы бӕстӕты нымӕц фылдӕрӕй-фылдӕр кӕны. (Кӕс рамкӕ  «Ӕцӕг хабӕрттӕ порнографийы тыххӕй».)

Рӕстӕг куыд цӕуы, афтӕ порнографи дӕр ивы. Профессор Гейл Дайнс фыссы: «Нывтӕ ахӕм ӕргом систы, ӕмӕ раздӕр карз порнографийыл нымад чи уыд, уый абон нымад у хуымӕтӕг порнографийыл».

Дӕумӕ гӕсгӕ та порнографи цы у: зиан чи нӕ хӕссы, ахӕм хиирхӕфсӕн ӕви, адӕймагӕн йӕ бон амӕлын кӕмӕй у, ахӕм марг? Чырысти загъта: «Алы хорз бӕласыл дӕр ӕрзайы хорз дыргътӕ, ӕвзӕр бӕласыл та – ӕвзӕр дыргътӕ» (Матфейы 7:17). Цавӕр «дыргътӕ» дӕтты порнографи? Уый базонынӕн ӕркӕсӕм цалдӕр сӕйраг фарстамӕ порнографийы тыххӕй.

АХУЫРГӔНДТӔ ЦЫ ДЗУРЫНЦ? Иуӕй-иу ахуыргӕндтӕ ӕмӕ дохтыртӕ зӕгъынц, адӕймаг порнографийыл кӕй сахуыр вӕййы, тыхджын наркотиктыл куыд сахуыр уа, афтӕ.

Брайан b, Интернеты порнографимӕ кӕсыныл чи фӕцахуыр, иу ахӕм нӕлгоймаг зӕгъы: «Ницыуал мӕ урӕдта. Мӕ хъуыдытыл мӕ бар нал цыд. Афтӕ худинаг-иу мӕм каст, ӕмӕ ма-иу зыр-зыр кодтон, стӕй-иу мӕ сӕр риссын райдыдта. Цы нӕ арӕзтон, цӕмӕй йӕм мауал кастаин, фӕлӕ ма цалдӕр азы фӕстӕ дӕр йӕ уацары уыдтӕн».

Порнографийыл чи фӕцахуыр вӕййы, уыдон ӕй арӕх нӕ фӕхъӕр кӕнынц. Ахӕм адӕм никӕмӕн ницы фӕдзурынц ӕмӕ фӕсайынц. Бирӕтӕ дзы сӕхи иунӕг фӕхатынц, худинаг сӕм фӕкӕсы, фӕтӕрсынц, сӕхимӕ ныхъхъусынц ӕмӕ вӕййынц мӕстыгӕр. Иуӕй-иутӕ дзы суанг сӕхи марынмӕ дӕр ӕрцӕуынц. Алы бон дӕр-иу йӕ телефонмӕ порнографи чи рафыста, иу ахӕм нӕлгоймаг, Серж, зӕгъы: «Ӕрмӕстдӕр мӕхиуыл хъуыды кодтон. Мӕхи зӕххӕй сисыны аккагыл дӕр нӕ нымадтон, мӕхи аххосджын кодтон, мӕхимӕ кастӕн иунӕг ӕмӕ, цыма къӕппӕджы бахаудтӕн, афтӕ уыдтӕн».

Адӕймаг порнографимӕ ӕрмӕстдӕр цыбыр рӕстӕг кӕнӕ ӕнӕбары дӕр куы бакӕса, уӕддӕр, гӕнӕн ис, ӕмӕ йыл ӕвзӕрырдӕм фӕзына. Порнографийы фарстаты зындгонд иртасӕг Джудит Рейсман йӕ ныхасы Америкӕйы Иугонд Штатты Сенаты комитеты раз загъта, зӕгъгӕ, адӕймаг порнографимӕ куы фӕкӕсы, уӕд уыцы нывтӕ йӕ сӕрымагъзы ныффидар вӕййынц ӕмӕ йын йӕ зондахаст аивынц, стӕй йӕ фӕндгӕ дӕр нӕ фӕкӕны, афтӕмӕй йӕ цӕстытыл фӕуайынц, ферох кӕнын та сӕ кӕнӕ тынг зын вӕййы, кӕнӕ та уымӕн гӕнӕн ӕппындӕр нӕ вӕййы. Сюзаннӕ дӕр, 19-аздзыд чызг, Интернеты порнографимӕ кӕсыныл фӕцахуыр. Мӕнӕ цы загъта уый та: «Уыцы нывтӕ мӕ зонды ныффидар сты. Ӕвиппайды мӕ цӕстытыл уайын райдайынц. Афтӕ мӕм кӕсы, ӕмӕ сӕ кӕронмӕ никуы фервӕздзынӕн».

ХАТДЗӔГ: порнографи адӕймагӕй цагъар рауайын кӕны ӕмӕ йыл ӕппындӕр нӕ фӕауӕрды (2 Петры 2:19).

АХУЫРГӔНДТӔ ЦЫ ДЗУРЫНЦ? «Порнографийы аххосӕй бинонтӕн сӕ цард фехӕлы» (The Porn Trap, by Wendy and Larry Maltz).

Порнографи бинонты цардӕн зиан цӕмӕй хӕссы?

• Тӕссаг у, лӕг ӕмӕ усы ’хсӕн ӕнӕууӕнкдзинад кӕй фӕзындзӕн, кӕрӕдзийӕ кӕй адард уыдзысты ӕмӕ се ’хсӕн уарзондзинад кӕй нал уыдзӕн, уымӕй (Ӕмбисӕндтӕ 2:12–17).

• Адӕймаг йӕ цардӕмбалыл нал фӕхъуыды кӕны, уазал цӕстӕй кӕсын ӕм райдайы ӕмӕ дзы разы нал вӕййы (Ефесӕгтӕм 5:28, 29).

• Адӕймагмӕ чъизи хъуыдытӕ фӕзыны ӕмӕ йӕ хӕлд митӕ кӕнын ӕрфӕнды (2 Петры 2:14).

• Адӕймаг йӕ цардӕмбалы дӕр йемӕ хӕлд митӕ фӕкӕнын кӕны (Ефесӕгтӕм 5:3, 4).

• Адӕймаг йӕ цардӕмбалыл йӕ зӕрдӕ сивы ӕмӕ йыл гадзрахатӕй рацӕуы (Матфейы 5:28).

Библийы фыст ис, зӕгъгӕ, лӕг ӕмӕ ус кӕрӕдзийыл хъуамӕ «гадзрахатӕй ма цӕуой» (Малахи 2:16). Иу иннӕйыл гадзрахатӕй куы рацӕуы,  уӕд бинонты цардӕн тӕссаг вӕййы. Ахӕм лӕг ӕмӕ ус, гӕнӕн ис, ӕмӕ хицӕнӕй цӕрын райдайой, кӕнӕ та хицӕн дӕр ауой. Ӕмӕ уый ӕнцон нӕ вӕййы сӕ сывӕллӕттӕн дӕр.

Фӕлӕ порнографи сывӕллӕттӕн зиан ӕрмӕст уымӕй не ’рхӕссы. Уӕлдӕр цы Брайаны кой кодтам, уый загъта: «Дӕс азы бӕрц мыл куы цыд, уӕд иухатт цъынды ӕмбӕхстытӕй хъазыдыстӕм ӕмӕ ссардтон мӕ фыды журнал хӕлд нывтимӕ. Ӕз сӕм сусӕгӕй кӕсын райдыдтон, кӕд ӕй ӕмбаргӕ дӕр нӕ кодтон, ахӕм нывтӕм кӕсын мӕ цӕмӕн фӕндыд, уый, уӕддӕр. Порнографийыл уӕд фӕцахуыр дӕн ӕмӕ куы сыстыр дӕн, уӕд дӕр дзы мӕ бон фервӕзын нӕ уыд». Иртасӕнтӕм гӕсгӕ, сывӕллӕттӕ рӕзгӕ кары куы фӕкӕсынц порнографимӕ, уӕд сын фӕстӕдӕр сӕ буары монцтыл хӕцын зын вӕййы, стӕй сӕм кӕимӕфӕнды дӕр ӕмуат ӕрцӕуын ӕмӕ искӕмӕн тыхми бакӕнын ницы фӕкӕсы, уымӕй уӕлдай ма уый сӕ сӕрымагъзыл дӕр фӕзыны.

ХАТДЗӔГ: порнографи дыууӕ уарзон уды адджын цард сӕнад кӕны ӕмӕ сын зӕрдӕниз ӕмӕ маст ӕрхӕссы (Ӕмбисӕндтӕ 6:27).

ХУЫЦАУЫ НЫХАСЫ ФЫСТ ИС: «Амарут уӕ зӕххон буары фӕндтӕ: хӕтындзинад, чъизи митӕ, монцӕй судзын, фыдбылыз фӕндтӕ, стӕй зыд кӕнын, уымӕн ӕмӕ зыд кӕнын у мӕнгхуыцӕуттӕн кувын» (Колоссӕгтӕм 3:5).

Цыбыртӕй йӕ куы зӕгъӕм, уӕд Йегъовӕйы c цӕсты порнографи у тынг ӕлгъаг хъуыддаг. Уый тыххӕй нӕ, ӕмӕ, нӕлгоймаг ӕмӕ сылгоймаджы ’хсӕн цы вӕййы, уый ӕвзӕрыл нымайы. Хуыцау сылгоймаг ӕмӕ нӕлгоймаджы афтӕ скодта, цӕмӕй-иу ӕмуат ӕрцӕуой, ӕмӕ йӕ фӕнд уыд, цӕмӕй уый фӕрцы лӕг ӕмӕ ус сӕ кӕрӕдзи рӕвдауой, кӕрӕдзийӕн адджындӕр уой ӕмӕ сын цот цӕуа (Иаковы 1:17).

Уӕдӕ уӕд фидарӕй зӕгъӕн цӕмӕн ис, ӕмӕ Йегъовӕйы цӕсты порнографи тынг ӕлгъаг хъуыддаг у? Цалдӕр хъуыддагмӕ гӕсгӕ.

• Зоны йӕ, порнографи бинонты цард кӕй халы (Ефесӕгтӕм 4:17–19).

• Уарзы нӕ ӕмӕ йӕ фӕнды, цӕмӕй нӕ ӕвзӕрдзинадӕй бахъахъхъӕна (Исай 48:17, 18).

• Йегъовӕйы нӕ фӕнды, цӕмӕй-иу ус ӕмӕ лӕг ахицӕн уой ӕмӕ-иу бинонты цард фехӕла (Матфейы 19:4–6).

• Фӕнды йӕ, цӕмӕй нӕхи ӕнӕгъдаудзинадӕй хъахъхъӕнӕм ӕмӕ кӕрӕдзийы бартӕн аргъ кӕнӕм (1 Фессалоникӕгтӕм 4:3–6).

• Фӕнды йӕ, цӕмӕй аргъ кӕнӕм, нӕ бон цот уадзын кӕй у, уыцы лӕварӕн ӕмӕ не ’фсӕрмыйаг уӕнгтӕ хынджылӕггаг ма кӕнӕм (Дзуттӕгтӕм 13:4).

• Йегъовӕ зоны, порнографи кӕй ӕвдисы Хӕйрӕджы цӕстӕнгас, ома йӕ хӕлд ӕмӕ йӕ хиуарзон зондахаст, нӕлгоймаг ӕмӕ сылгоймаджы ’хсӕн цы вӕййы, уымӕ (Райдиан 6:2; Иудӕйы 6, 7).

ХАТДЗӔГ: порнографи адӕймаджы Хуыцауӕй дард кӕны (Ромӕгтӕм 1:24).

Фӕлӕ Йегъовӕ хорз ӕмбары, порнографийы къӕппӕгӕй фервӕзын кӕй фӕнды, уыдоны. Библийы фыст ис: «Йегъовӕ у фӕлмӕнзӕрдӕ ӕмӕ тӕригъӕдгӕнаг, уый мӕсты кӕнынмӕ тагъд нӕ кӕны ӕмӕ ӕгӕрон у йе ’нувыд уарзт. Уымӕн ӕмӕ хорз зоны, цӕмӕй конд стӕм, уый, сыджыт кӕй стӕм, уый дзы рох нӕу» (Псалом 103:8, 14). Хуыцау сӕрныллӕг адӕмы хоны, цӕмӕй йӕм раздӕхой ӕмӕ «сӕм бахъуаджы сахат фӕлмӕнзӕрдӕ уа ӕмӕ сын йе стыр хорзӕхӕй бахай кӕна» (Дзуттӕгтӕм 4:16; кӕс рамкӕ «Порнографийӕ куыд фервӕзӕн ис?»).

Тынг бирӕтӕ Хуыцауы ӕххуысыл сразы сты. Ӕмӕ цымӕ фӕфыдӕнхъӕл сты? Йе ’взӕр митӕй чи фервӕзт, уыдонӕй иуӕй-иуты тыххӕй Библи зӕгъы: «Ӕхсад ӕрцыдыстут, ссыгъдӕг стут ӕмӕ рӕстгӕнджытыл нымад ӕрцыдыстут нӕ Хицау Йесо Чырыстийы номӕй ӕмӕ нӕ Хуыцауы сыгъдӕг тыхы фӕрцы» (1 Коринфӕгтӕм 6:11). Апостол Павелау ахӕм адӕм зӕгъдзысты: «Алцыдӕр у мӕ бон, хъару мын чи дӕтты, уый фӕрцы» (Филиппӕгтӕм 4:13).

Сюзаннӕйӕн дӕр йӕ бон баци порнографийы къӕппӕгӕй фервӕзын. Мӕнӕ цы радзырдта: «Ӕрмӕстдӕр дын Йегъовӕ баххуыс кӕндзӕн порнографийы къӕппӕгӕй фервӕзынӕн. Ӕххуыс ӕмӕ дзы разамынд куы курай, уӕд сыгъдӕг цӕсгомимӕ йӕ разы ӕрлӕууын дӕ бон бауыдзӕн. Уый дӕ нӕ ныууадздзӕн».