Никола́ ӕмӕ Сели́нӕ та сӕмбӕлдысты ӕндӕр зындзинадыл. Францийы филиалӕй сын ӕфсымӕртӕ загътой, цӕмӕй ӕндӕр ӕмбырдмӕ ахызтаиккой, ӕмӕ сразы сты. Уыдон зӕгъынц: «Фыццаг тынг цин кодтам, фӕлӕ фӕстӕдӕр не ’мбӕлтты мысын райдыдтам. Нӕ ног ӕмбырды та нын ӕввахс ӕмбӕлттӕ нӕма уыд» a. Цы дын баххуыс кӕндзӕн, цӕмӕй дын ног ӕмбырдмӕ ахизын афтӕ зын ма уа? Хотӕ ӕмӕ ’фсымӕртӕн сӕ бон куыд у, се ’мбырдмӕ чи рахызт, уыдонӕн ӕххуыс кӕнын? Ӕмӕ цы ис саразӕн, цӕмӕй, ног ӕмбырдмӕ кӕй рахызтӕ, уый дӕхицӕн дӕр уа цины хос ӕмӕ дӕ ног ӕмбырдӕн дӕр?

ЦЫППАР УАГӔВӔРДЫ

1. Дӕ ныфс Йегъовӕйыл дар (Пс. 37:5). Кадзу́ми цӕры Японийы. 20 азы лӕггад кодта иу ӕмбырды. Фӕлӕ йын стӕй йӕ лӕджы куыстӕй ӕндӕр ранмӕ арвыстой, ӕмӕ уый тыххӕй сӕ цӕрӕнбынат фӕивтой. Кадзуми йӕ «фӕндаг Йегъовӕйы бар» куыд бакодта? Уый загъта: «Хатт-иу мӕхимӕ иунӕг кастӕн ӕмӕ-иу тынг мӕт кодтон. Фӕлӕ-иу Йегъовӕмӕ скуывтон ӕмӕ-иу мӕ цы тыхсын кодта, уый-иу йын радзырдтон. Йегъовӕ-иу мӕ фехъуыста ӕмӕ-иу мын хъарутӕ радта».

Цы дын баххуыс кӕндзӕн, цӕмӕй ног уавӕрты дӕ ныфс Йегъовӕйыл тынгдӕр дарай? Цӕмӕй зайӕгой рӕза, уый тыххӕй йӕ фӕхъӕуы дон ӕмӕ, зӕххы чи ис, уыцы пайда буаргъӕдтӕ. Афтӕ у йӕ хабар уырнындзинадӕн дӕр – фӕхъӕуы йӕ ’фсадын, цӕмӕй фидардӕр кӕна. Гыццыл раздӕр кӕй кой уыд, уыцы ӕфсымӕр, Никола, хъуыды кодта Авраамы, Йесойы ӕмӕ Павелы цӕвиттонтыл. Уыдон сӕхи бирӕ цӕмӕйдӕрты фӕцух кодтой, цӕмӕй Хуыцауы фӕндон ӕххӕст кодтаиккой. Сӕ цӕвиттонтӕ йӕ бафидар кодтой ӕмӕ нал дызӕрдыг кодта, Йегъовӕ уымӕн дӕр кӕй баххуыс кӕндзӕн.  Ӕдзух Библи куы иртасай, уӕд дӕ ног уавӕртыл тагъддӕр сахуыр уыдзынӕ, стӕй-иу дзы ссардзынӕ бирӕ хӕзнатӕ ӕмӕ-иу сӕ дӕ бон уыдзӕн дӕ ног ӕмбырды хотӕ ӕмӕ ’фсымӕртӕн радзурын ӕмӕ сӕ бафидар кӕнын.

2. Дӕ раздӕры ӕмбырд дӕ ног ӕмбырдимӕ ма бар (Еккл. 7:10). Бени́нӕй иу ӕфсымӕр, Жюль, Иугонд Штаттӕм цӕрынмӕ куы ’рцыд, уӕд ын тынг зын уыд. Хъуыди йӕ ног культурӕйыл ахуыр кӕнын. Уый загъта: «Рафӕрс-бафӕрс-иу мӕ кодтой. Афтӕ мӕм каст, ӕмӕ се ’ппӕты дӕр фӕндыд базонын, чи дӕн, цы дӕн». Жюль ахӕм цӕуылдӕрты ахуыр нӕ уыд, ӕмӕ уый тыххӕй йӕ ног ӕмбырдӕй йӕхи дард ласын райдыдта. Фӕлӕ хоты ӕмӕ ’фсымӕрты хуыздӕр куы базыдта, уӕд йӕ хъуыды фӕивта. Уый зӕгъы: «Ныр ӕй ӕмбарын, адӕм кӕрӕдзийӕ тынг кӕй нӕ хицӕн кӕнынц, кӕмфӕнды ма цӕрой, уӕддӕр. Фӕлӕ иутӕ иухуызон февдисынц се ’нкъарӕнтӕ, иннӕтӕ та – ӕндӕрхуызон. Адӕм сӕ удыхъӕдӕй кӕй хицӕн кӕнынц, уым диссагӕй ницы ис». Уӕдӕ дӕ ног ӕмбырд дӕ раздӕры ӕмбырдимӕ ма бар. Хо А́ннӕ-Ли́зӕ лӕггад кӕны пионерӕй. Уый афтӕ загъта: «Ӕндӕр ранмӕ цӕрынмӕ куы ацыдтӕн, уӕд афтӕ нӕ хъуыды кодтон, ӕмӕ алцыдӕр, раздӕр куыд уыд, афтӕ уыдзӕн. Ӕндӕр ранмӕ дӕр уый тыххӕй ацыдтӕн, цӕмӕй царды ногӕй исты федтаин».

Хистӕр нӕлгоймӕгтӕ дӕр хъуамӕ сӕ ног ӕмбырд сӕ раздӕры ӕмбырдимӕ ма барой. Кӕд ног ӕмбырды ӕфсымӕртӕ цыдӕртӕ ӕндӕрхуызон аразынц, уӕд уый ууыл дзурӕг нӕу, ӕмӕ раст нӕ кӕнынц. Уӕдӕ дӕ цавӕрдӕр хъуыддаджы фӕдыл уынаффӕ раттын куы фӕнда, уӕд уал-иу фыццаг бынӕттон уавӕртӕ хуыздӕр базон (Еккл. 3:1, 7б). Ӕфсымӕртӕн фӕзминаг у ӕмӕ-иу дӕ хъуыдыйыл ма ныллӕуу (2 Кор. 1:24).

3. Дӕ ног ӕмбырдимӕ ӕмгуыст кӕн (Фил. 1:27). Ӕндӕр ранмӕ цӕрынмӕ ацӕуын ӕнцон нӕу. Фӕлӕ ахсджиаг у, цӕмӕй уайтагъддӕр ӕмбырдтӕм цӕуын райдайай. Хорз уаид ӕмбырдтӕм-иу видеоконференцийы фӕрцы куы нӕ баиу уаис, фӕлӕ-иу Паддзахады залмӕ куы ацӕуис. Дӕ ног ӕмбырды хотӕ ӕмӕ ’фсымӕртӕ дӕ куы никуы уыной кӕнӕ дӕ арӕх куы нӕ уыной, уӕд дын куыд баххуыс кӕндзысты? Хо Люси́ндӕ йӕ дыууӕ чызгимӕ цӕрынмӕ ацыд Хуссар-Африкаг Республикӕмӕ, иу стыр горӕтмӕ. Уый загъта: «Ме ’мбӕлттӕ мын загътой, цӕмӕй мӕ ног ӕмбырды хотӕ ӕмӕ ’фсымӕртимӕ балымӕн уыдаин, семӕ хъусын кодтаин ӕмӕ ӕмбырдты дзуаппытӕ лӕвӕрдтаин. Стӕй ӕфсымӕртӕн загътам, кӕй нӕ фӕнды, цӕмӕй уацамындон фембӕлдтӕ нӕ хӕдзары дӕр уадзой».

Дӕ ног ӕмбырды хотӕ ӕмӕ ’фсымӕртимӕ «фӕрсӕй-фӕрстӕм» лӕггад кӕн. Афтӕмӕй дӕхӕдӕг дӕр бафидар уыдзынӕ, стӕй уыдоны ныфсыл дӕр ныфс ӕфтдзӕн. Гыццыл раздӕр кӕй кой уыд, уыцы хо Аннӕ-Лизӕйӕн хистӕр нӕлгоймӕгтӕ загътой, цӕмӕй ӕмбырды алкӕимӕ дӕр ацыдаид уацамынды. Ӕмӕ йын цы бантыст? Аннӕ-Лизӕ загъта: «Уайтагъддӕр ӕй бамбӕрстон, уый ӕнӕмӕнг кӕй у, цӕмӕй ног ӕмбырдыл сахуыр уай». Стӕй Паддзахады зал ӕфснайынӕн ӕмӕ йӕ цалцӕг кӕнынӕн ӕххуыс кӕн. Афтӕмӕй хотӕ  ӕмӕ ’фсымӕртӕ фендзысты, дӕ ног ӕмбырд ныр дӕхи ӕмбырдыл кӕй нымайыс. Хотӕ ӕмӕ ’фсымӕртимӕ Хуыцауы хъуыддӕгты цас фылдӕр архайай, уыйас дыл тагъддӕр сахуыр уыдзысты, ӕмӕ дӕуӕн дӕр суыдзысты хи бинонты хуызӕн.

4. Ног ӕмбӕлттӕ ссар (2 Кор. 6:11–13). Ӕмбырды размӕ ӕмӕ-иу ӕмбырды фӕстӕ хотӕ ӕмӕ ’фсымӕртимӕ аныхӕстӕ кӕн, истӕмӕйты-иу сӕ афӕрс. Уӕд сӕ хуыздӕр базондзынӕ ӕмӕ дӕ бон уыдзӕн ног ӕмбӕлттӕ ссарын. Сӕ нӕмттӕ-иу сын бахъуыды кӕн. Адӕймагӕн ӕхсызгон вӕййы, йӕ номӕй йӕм куы фӕдзурынц, уӕд. Хӕларзӕрдӕ куы уай ӕмӕ иннӕтӕн демӕ ӕнцон куы уа, уӕд сӕ фӕнддзӕн демӕ лымӕн кӕнын, ӕмӕ хорз ӕмбӕлттӕ суыдзыстут.

Иннӕты зӕрдӕмӕ фӕцӕуыныл ма архай, фӕлӕ, ӕцӕгӕй цавӕр дӕ, ахӕм у. Уый та дын ӕнцондӕр уыдзӕн, хотӕ ӕмӕ ’фсымӕртимӕ ӕнӕуи рӕстӕг куы ’рвитай, уӕд. Хо Люсиндӕ афтӕ зӕгъы: «Хоты ӕмӕ-иу ’фсымӕрты хӕдзармӕ фӕхуыдтам. Уый фӕрцы нын хорз ӕмбӕлттӕ фӕзынд».

«КӔРӔДЗИЙЫЛ... УЗӔЛУТ»

Кӕмӕндӕрты зын вӕййы Паддзахады залмӕ ӕнӕзонгӕ адӕмы ’хсӕнмӕ ӕрбацӕуын. Дӕ бон куыд у, уе ’мбырдмӕ чи рахызт, уыдонӕн баххуыс кӕнын? Апостол Павел загъта: «Чырысти сымахыл куыд баузӕлыд, сымах дӕр уӕ кӕрӕдзийыл афтӕ узӕлут» (Ром. 15:7). Хистӕр нӕлгоймӕгтӕн сӕ бон у Йесойы фӕзмын ӕмӕ ногтӕн ӕххуыс кӕнын, цӕмӕй ног ӕмбырдыл тагъддӕр сахуыр уой. (Кӕс рамкӕ « Ног ӕмбырдмӕ рахизын дӕ куы фӕнда».) Фӕлӕ ӕмбырды алкӕмӕн дӕр у йӕ бон уыцы хотӕ ӕмӕ ’фсымӕртӕн ӕххуыс кӕнын, уыимӕ сывӕллӕттӕн дӕр.

Нӕ бон куыд у, не ’мбырдмӕ чи рахызт, уыдоныл «узӕлын»? Зӕгъӕм, ис сӕ уазӕгуаты фӕхонӕн кӕнӕ та сын истӕмӕй баххуыс кӕнӕн. Зӕгъӕм, иу хо ӕндӕр ранмӕ цӕрынмӕ куы ацыд, уӕд ын иу бынӕттон хо горӕт равдыста, стӕй йын бацамыдта, транспортыл цӕуын куыд хъӕуы, уый. Уыцы хо дзы тынг фӕбузныг. Уый фӕрцы ног раныл тагъддӕр сахуыр.

 НОГ ӔМБЫРДЫ ДӔР ДӔ БОН У ДӔ УЫРНЫНДЗИНАД ФИДАР КӔНЫН

Цӕмӕй мӕтыхӕн йӕ базыртӕ сфидар уой ӕмӕ йӕ бон тӕхын уа, уый тыххӕй уал хъуамӕ цалдӕр хатты йӕ царм аппара. Ӕндӕр ӕмбырдмӕ чи ахызт, уыдонӕн ацы цӕвиттон куыд баххуыс кӕндзӕн? Уыдон дӕр хъуамӕ, цы сӕ хъыгдары, уыдӕттӕ аппарой, сӕ базыртӕ айтындзой ӕмӕ Йегъовӕйӕн ӕппӕт тыхтӕй лӕггад кӕной. Никола ӕмӕ Селинӕ загътой: «Адӕймаг ӕндӕр ранмӕ цӕрынмӕ куы ацӕуы, уӕд ын уый фӕпайда вӕййы. Цӕмӕй ӕндӕр адӕмыл ӕмӕ ӕндӕр бынатыл сахуыр уыдаиккам, уый тыххӕй нӕ хъуыди нӕ удыхъӕды ног миниуджытӕ фидар кӕнын». Ӕфсымӕр Жан-Шарль та загъта: «Ног ӕмбырды нӕ сывӕллӕттӕ дидинӕг ракалдтой. Цалдӕр мӕйы йеддӕмӕ нӕ рацыд, афтӕ нӕ чызгӕн ӕмбырды хӕслӕвӕрдтӕ дӕттын райдыдтой, нӕ лӕппу та сси ӕнӕаргъуыд хъусынгӕнӕг».

Чи зоны дӕ фӕнды, хъусынгӕнджытӕ кӕм нӕ фаг кӕны, ахӕм ранмӕ цӕрынмӕ ацӕуын, фӕлӕ дӕ уавӕртӕ нӕ амонынц. Уӕд, ацы статьяйы цы уынаффӕтӕ ис, уыдонӕй дӕхи ӕмбырды спайда кӕн. Уый дӕ ног хъарутӕ бауадздзӕн! Дӕ ныфс Йегъовӕйыл дар ӕмӕ ӕмбырды фылдӕр араз. Хотӕ ӕмӕ ’фсымӕртимӕ хъусын кӕн, ног ӕмбӕлттӕ ссар ӕмӕ дын чи ис, уыцы ӕмбӕлтты дӕр ма рох кӕн, стӕй ӕмбырды ногтӕн ӕмӕ, ӕххуысхъуаг чи у, уыдонӕн ӕххуыс кӕн. Нӕ хоты ӕмӕ не ’фсымӕрты куы уарзӕм, уӕд Йегъовӕмӕ баввахсдӕр уыдзыстӕм, ӕмӕ нӕ райгонд уыдзӕн (Иоан. 13:35). «Ахӕм нывӕндтӕ Хуыцауӕн ӕхсызгон сты» (Дзут. 13:16).

Ӕндӕр ӕмбырдмӕ ахизын ӕнцон нӕу. Фӕлӕ бирӕ чырыстӕттӕ уыцы къахдзӕф сарӕзтой ӕмӕ сты амондджын. Ӕмӕ дӕуӕн дӕр алцыдӕр рауайдзӕн! Хо Аннӕ-Лизӕ загъта: «Ӕндӕр ӕмбырдмӕ кӕй рахызтӕн, уый фӕрцы мӕ зӕрдӕ уӕрӕх байгом кодтон, ӕмӕ мын бирӕ ног ӕмбӕлттӕ фӕзынд». Хо Кадзуми та загъта: «Адӕймаг ӕндӕр ӕмбырдмӕ куы рахизы, уӕд Йегъовӕйы ӕххуыс ноджы тынгдӕр банкъары». Мӕнӕ цы зӕгъы ӕфсымӕр Жюль та: «Ног ӕмбырды мын ӕмбӕлттӕ кӕй фӕзынд, уый фӕрцы мӕхи уазӕгыл нал нымайын. Ныр мын ме ’мбырд афтӕ адджын у, ӕмӕ мын тынг зын уаид ӕндӕр ӕмбырдмӕ ахизын».