ДОРИН арвы цӕфау фӕци. Йӕ цардӕмбал Уэслийыл цыди ӕрмӕст 54 азы, йӕ сӕры йын, тагъд чи апырх вӕййы, ахӕм рак куы ссардтой, уӕд *. Дохтыртӕ загътой, цалдӕр мӕйы йеддӕмӕ йын кӕй нал баззад. Дорин зӕгъы: «Сӕ ныхӕстӕ мӕ уырнгӕ дӕр нӕ кодтой. Цыма ӕндзыг бадӕн, афтӕ уыдтӕн цалдӕр къуырийы. Афтӕ мӕм касти, ӕмӕ ацы хабар махыл не ’рцыд, фӕлӕ ӕндӕр кӕуылдӕр. Ахӕм цӕмӕдӕр цӕттӕ нӕ уыдтӕн».

Дорин уыцы уавӕры куыд фӕци, уый диссаг нӕу. Мӕлӕтдзаг низӕй чифӕнды дӕр ӕмӕ кӕдфӕнды дӕр, гӕнӕн ис, ӕмӕ фӕрынчын уа. Ахӕм адӕймагмӕ зилынмӕ цӕттӕ чи у, уыдон раппӕлинаг сты. Фӕлӕ уӕддӕр рынчынмӕ кӕсын тынг зын у. Цымӕ бинонтӕн сӕ бон цы у аразын, цӕмӕй мӕлӕтдзаг рынчынӕн йӕ ныфсыл ныфс ӕфтауой ӕмӕ йӕм хуыздӕр зилой? Рынчынмӕ чи кӕсы, уыдонӕн сӕ бон куыд у уыцы уавӕры сӕхиуыл хӕцын ӕмӕ фидар лӕууын? Йӕ мӕлӕт куыд ӕввахсдӕр кӕна, афтӕ цӕмӕ хъуамӕ уой цӕттӕ? Фӕлӕ уал ӕркӕсӕм, мӕлӕтдзаг рынчынмӕ кӕсын абон уӕлдай зындӕр цӕмӕн у, уымӕ.

Медицинӕ размӕ кӕй ацыд, уый фӕзынд, адӕймаг цас цӕры, ууыл. Иу-сӕдӕ азы размӕ, суанг хъӕздыг бӕстӕты дӕр адӕм бирӕ нӕ цардысты. Хӕцгӕ низтӕй кӕнӕ-иу цавӕрдӕр бӕллӕхты аххосӕй адӕм тагъд амардысты. Рынчындӕттӕм-иу арӕх нӕ цыдысты, ӕмӕ рынчынтӕн сӕ фылдӕрмӕ сӕ бинонтӕ зылдысты, ӕмӕ-иу мӕлгӕ дӕр хӕдзары акодтой.

Абон медицинӕйӕн цы бантыст, уый фӕрцы дохтыртӕн сӕ бон у низтимӕ тох кӕнын, цӕмӕй адӕймаг фылдӕр фӕцӕра. Раздӕр-иу цавӕрдӕр низтӕй адӕймаг цыбыр рӕстӕгмӕ амард, ныр та уыцы низтимӕ, гӕнӕн ис, бирӕ азты дӕр цӕра. Фӕлӕ фылдӕр кӕй цӕрдзӕн, уый ууыл дзурӕг нӕу, ӕмӕ сдзӕбӕх уыдзӕн. Арӕх рынчынтӕ уӕззау низӕй кӕй фӕхъӕрзынц, уый тыххӕй сӕ бон нӕ вӕййы сӕхимӕ зилын. Ӕмӕ сӕм кӕсын тынг зын вӕййы, стӕй бирӕ хъарутӕ фӕхъӕуы.

 Уымӕ гӕсгӕ арӕхӕй-арӕхдӕр адӕм хӕдзары нӕ, фӕлӕ рынчындоны амӕлынц. Адӕймаг куыд фӕмӕлы, уый абон бирӕтӕ нӕ зонынц, фӕлӕ иуӕй-иутӕ уый сӕхи цӕстӕй федтой. Мӕлӕты тыххӕй кӕй ницы зонынц, уый сын, чи зоны, къуылымпыйы хос уа кӕнӕ сӕ бон ӕппындӕр мацы уа, рынчын адӕймагмӕ кӕсын куы бахъӕуа, уӕд. Ахӕм уавӕры сын цы баххуыс кӕндзӕн?

Дорины хабарӕй уынӕм, бирӕтӕн сӕ ныфс кӕй асӕтты, сӕ бинонтӕй кӕнӕ се ’мбӕлттӕй искӕмӕ мӕлӕтдзаг низ куы ссарынц, уӕд. Ахӕм уавӕры тынг куы тыхсай, куы тӕрсай ӕмӕ куы маст кӕнай, уӕд дын цы баххуыс кӕндзӕн, цӕмӕй цӕттӕ уай, фӕстӕдӕр цы ӕрцӕудзӕн, уымӕ? Иухатт Хуыцауы иузӕрдион лӕггадгӕнӕг куывта: «Сахуыр нӕ кӕн нӕ царды бонтӕн аргъ кӕнын, цӕмӕй суӕм зӕрдӕйӕ зондджын» (Псалом 90:12). Йегъовӕ Хуыцаумӕ зӕрдиагӕй кув, цӕмӕй дын равдиса, уӕ царды бонтӕн куыд «аргъ кӕнат», ӕмӕ рынчын адӕймагӕн цы рӕстӕг баззад, уый, хуыздӕр куыд уа, афтӕ арвитат.

Алцыдӕр хорз спълан кӕн. Кӕд рынчынӕн йӕ бон дзурын ӕмӕ цавӕрдӕр хъуыддӕгтӕ скъуыддзаг кӕнын у, уӕд хорз уаид, куы йӕ бафӕрсис, йӕхи бон куы нӕ уа, уӕд йӕ бӕсты уынаффӕтӕ чи хӕсдзӕн, уымӕй. Ӕргом аныхас кӕнут, мыййаг ӕй фӕнды, цӕмӕй аппараты фӕрцы фылдӕр фӕцӕра, рынчындоны уа кӕнӕ йын цавӕрдӕр мадзӕлттӕй хос кӕной. Уый фӕрцы йӕ бинонтӕ иуӕй-иу зындзинӕдтӕй хызт уыдзысты ӕмӕ сӕхимӕ ницы азым хӕсдзысты, йӕ бӕсты сӕ уынаффӕ хӕссын куы бахъӕуа, уӕд. Рагацау ӕргом куы аныхас кӕнат, уӕд бинонтӕн сӕ бон уыдзӕн сӕ хъарутӕ рынчынмӕ фӕкӕсынмӕ саразын. «Ӕргом ныхас кӕм нӕ уа, уым фӕндтӕ фехӕлдзысты»,– фыст ис Библийы (Ӕмбисӕндтӕ 15:22).

Рынчынмӕ чи фӕкӕсы, уымӕн йӕ сӕйрагдӕр хӕс вӕййы, цӕмӕй адӕймаджы мацы тыхсын кӕна. Мӕлӕтдзаг рынчын хъуамӕ ӕмбара, кӕй йӕ уарзынц ӕмӕ йӕ фарсмӕ чидӕр кӕй ис. Уый тыххӕй цы ис саразӕн? Уӕ бон у рынчынӕн кӕсын кӕнӕ зарын, чи йӕ бафидар кӕндзӕн ӕмӕ йын ӕхсызгон чи уыдзӕн, ахӕм литературӕ ӕмӕ зарджытӕ. Бирӕтӕн ӕнцондӕр вӕййы, йӕ бинонтӕй йын исчи йӕ къухыл куы фӕхӕцы ӕмӕ йемӕ фӕлмӕн ныхас куы фӕкӕны, уӕд.

Рынчынфӕрсӕг ӕм чи ӕрбацӕуа, уымӕн-иу йӕ ном зӕгъ. Иу ран фыст уыд: «Куыд дзурынц, афтӕмӕй, дам, адӕймаг, гӕнӕн ис, мауал уына, науӕд тӕф ӕмӕ ад мауал ӕмбара, фӕлӕ хъусгӕ уӕддӕр фӕкӕны. Афтӕ дӕм куы кӕса, ӕмӕ [рынчын] фынӕй у, уӕддӕр алцыдӕр хорз фӕхъусы, ӕмӕ йӕ цуры ахӕмӕй мацы зӕгъ, хъалӕй йын цы нӕ зӕгъис».

Кӕд гӕнӕн уа, уӕд-иу иумӕ кувут. Библийы фыст ис, иу хатт апостол Павел йе ’мбӕлттимӕ  бӕллӕхы кӕй бахауд ӕмӕ ма суанг сӕ цардӕн дӕр тӕссаг кӕй уыд. Фӕстӕдӕр Павел уыцы хабары кой куы кодта, уӕд йе ’мбӕлттӕн загъта, ахӕм уавӕрты сӕ бон цы уыд аразын, уый: «Сымахӕн дӕр уӕ бон у махӕн уӕ зӕрдиаг куывдтытӕй баххуыс кӕнын» (2 Коринфӕгтӕм 1:8–11). Адӕймаг зын уавӕры куы уа кӕнӕ уӕззау рынчын куы уа, уӕд зӕрдӕбын куывд стыр ӕххуыс уыдзӕн.

Дӕ зӕрдӕйӕн зынаргъ адӕймаг кӕй амӕлдзӕн, ууыл ӕрмӕст хъуыды куы акӕнай, уӕддӕр ныфс асӕтты. Ӕмӕ уый диссаг нӕу, уымӕн ӕмӕ Хуыцау адӕймаджы афтӕ не сфӕлдыста, цӕмӕй мӕла. Ӕмӕ нӕ бон нӕу мӕлӕтмӕ куыдфӕндыйы цӕстӕй кӕсын (Ромӕгтӕм 5:12). Хуыцауы Ныхас мӕлӕт хоны «знаг» (1 Коринфӕгтӕм 15:26). Уӕдӕ бирӕ кӕй уарзыс, уыцы адӕймаг кӕй нал уыдзӕн, ууыл дӕ хъуыды кӕнын дӕр кӕй нӕ фӕнды, уый зын бамбарӕн нӕу ӕмӕ дзы худинагӕй дӕр ницы ис.

Фӕлӕ уӕддӕр бинонтӕ куы ’мбарой, уыцы хабар кӕй ӕрцӕудзӕн, уӕд къаддӕр тыхсдзысты ӕмӕ тынгдӕр архайдзысты, цӕмӕй рынчынӕн йӕ уавӕр фӕрогдӕр кӕной. Иуӕй-иу хъуыддӕгты тыххӕй фыст ис рамкӕйы « Фӕстаг къуыритӕ». Кӕй зӕгъын ӕй хъӕуы, уым цӕй кой цӕуы, уыдӕттӕ алы рынчын нӕ бавзары ӕмӕ сӕ рамкӕйы куыд ранымадтой, афтӕ фӕд-фӕдыл не ’рцӕуынц. Фӕлӕ рынчынтӕн сӕ фылдӕр уыцы ивындзинӕдтӕй кӕцыдӕртӕ уӕддӕр бавзарынц.

Адӕймаг куы фӕзиан уа, уӕд хорз уаид, рагацау кӕимӕ баныхас кодтай, ӕмӕ дын йе ’ххуысӕй зӕрдӕ чи бавӕрдта, уыцы ӕмбалимӕ куы аныхас кӕнис. Бинонты ӕмӕ, рынчынмӕ чи касти, уыдоны, чи зоны, бафидар кӕнын хъӕуа, зӕгъгӕ, чи амард, уый йӕ уӕззау фӕлварӕнӕй фервӕзт ӕмӕ нал хъизӕмар кӕны. Не Сфӕлдисӕг нын зӕрдӕ ӕвӕры, «мӕрдтӕ... ӕппындӕр ницы зонынц», зӕгъгӕ (Екклесиаст 9:5).

Бинонтӕ хъуамӕ Хуыцауыл сӕ ныфс дарой, адӕймаг уӕззау низӕй куы хъизӕмар кӕна, ӕрмӕст уыцы рӕстӕг нӕ, фӕлӕ куы фӕзиан уа, уый фӕстӕ дӕр. Хуыцау дын баххуыс кӕндзӕн иннӕты уылты – уыдон дӕ сӕ ныхӕстӕй бафидар кӕндзысты ӕмӕ дӕм хъуыддагӕй фӕкӕсдзысты. Дорин загъта: «Ӕз сахуыр дӕн, цӕмӕй-иу иннӕты ӕххуысыл сразы уон. Иннӕтӕ нын цы стыр ӕххуыс фесты, уый нӕ дисы бафтыдта. Мӕ сӕрыхицау дӕр ӕмӕ мӕхӕдӕг дӕр ӕмбӕрстам, Йегъовӕ нын ахӕм хуызы афтӕ кӕй зӕгъы, зӕгъгӕ, ӕз дӕ фарсмӕ дӕн, цӕмӕй дын ацы уавӕр сфӕразынӕн баххуыс кӕнон. Уый мӕ никуы ферох уыдзӕн».

Йегъовӕ Хуыцау у ӕппӕты хуыздӕр Ӕххуысгӕнӕг. Не Сфӕлдисӕг кӕй у, уымӕ гӕсгӕ нын нӕ рыст ӕмӕ нӕ хъыг ӕмбары. Йӕ бон у ӕмӕ йӕ фӕндгӕ дӕр кӕны, цӕмӕй нын баххуыс кӕна ӕмӕ нӕ бафидар кӕна, цӕмӕй нӕ зындзинӕдтӕ сфӕразӕм. Фӕлӕ уымӕй хуыздӕр та уый у, ӕмӕ нын зӕрдӕ ӕвӕры, тагъд рӕстӕджы мӕлӕтӕн кӕрон кӕй скӕндзӕн ӕмӕ йӕ хъуыдыйы чи ис, уыцы милуангай адӕмы кӕй райгас кӕндзӕн (Иоанны 5:28, 29; Раргомад 21:3, 4). Ӕмӕ уӕд алкӕмӕндӕр йӕ бон уыдзӕн зӕгъын, апостол Павел цы ныхӕстӕ загъта, уыдон: «Мӕлӕт, кӕм ис дӕ уӕлахиз? Мӕлӕт, кӕм ис дӕ маргджын фат?» (1 Коринфӕгтӕм 15:55).