Гъо, Йегови Ӕвдесӕнтӕ дохтиртӕмӕ фӕццӕунцӕ ӕма син ци хуастӕ рафинсунцӕ, уонӕй сӕхе исдзӕбӕх кӕнунцӕ. Кӕд не ’нӕнездзийнадӕмӕ нӕ гъос дарӕн, уӕддӕр нӕ еуӕй-еухатт багъӕуй дохтирти ӕнхус (Лукай 5:31). Удта абони дӕр, фиццаг ӕноси цӕрӕг киристон Лукай хузӕн, Йегови Ӕвдесӕнтӕй кадӕртӕ косунцӕ дохтиртӕй (Колоссӕгтӕмӕ 4:14).

 Еуӕй-еу хуастӕй пайда кӕнун ӕй, Библий уагӕвӕрдти нихмӕ цӕун, ӕма си уомӕ гӕсгӕ нӕхе хезӕн. Зӕгъӕн, тог бауадзунбӕл не ’сарази уӕн, уомӕн ӕма Библи зӕгъуй, зӕгъгӕ, уӕхе тогӕй хезетӕ (Гъуддӕгтӕ 15:20). Библи ма зӕгъуй, цӕмӕй дӕснифӕрсуни хӕццӕ баст ка ’й, уӕхӕн хуастӕй дӕр нӕхе хезӕн (Галатӕгтӕмӕ 5:19–21).

 Фал абони дохтиртӕ ци мадзӕлттӕй пайда кӕнунцӕ, уонӕн сӕ фулдӕр Библий уагӕвӕрдти нихмӕ нӕ ’нцӕ. Уомӕ гӕсгӕ алли адӕймагӕн дӕр ӕ бон ӕй равзарун, цӕхуӕн мадзалӕй испайда кӕндзӕй, уой. Еу Ӕвдесӕн исдзӕбӕх кӕнуни туххӕй ци хуасӕбӕл исарази уа, еци хуасӕбӕл ӕндӕр Ӕвдесӕн, ка ’й зонуй, не ’сарази уодзӕй (Галатӕгтӕмӕ 6:5).