ДОРИН уой ӕнгъӕл нӕ адтӕй. Ӕ цардӕмбал Уэслибӕл цудӕй ӕрмӕстдӕр 54 анзи, ӕ сӕри ин, тагъд ка рапурхӕ уй, уӕхӕн рак ку иссирдтонцӕ, уӕд *. Дохтиртӕ загътонцӕ, цалдӕр мӕйемӕй ӕндӕр ке нӕбал рахӕсдзӕй. Дорин зӕгъуй: «Ци дзурдтонцӕ, е ми не ’руагӕс кодта. Цалдӕр къуӕрей мӕхе кеми нӕ цудтӕн. Уотӕ мӕмӕ кастӕй, ӕма аци хабар махбӕл нӕ, фал ӕндӕр кӕбӕлдӕр ӕрцудӕй. Уӕхӕн цӕмӕдӕр цӕттӕ нӕ адтӕн».

Гъигагӕн, Доринбӕл ци хабар ӕрцудӕй, уӕхӕн хабар ма беретӕбӕл ӕрцӕуй. Лӕгъуз нези туххӕй кафӕндидӕр ку фегъосуй, уӕд ӕ зӕрдӕ бамӕгур уй. Лӕгъуз нез кӕмӕ иссирдтонцӕ, уӕхӕн адӕнмӕ ка кӕсуй, етӕ растауйнаг ӕнцӕ, уомӕн ӕма сӕйгӕмӕ кӕсун хъӕбӕр зин ӕй. Цума бийнонтӕн сӕ бон ци ӕй кӕнун, цӕмӕй уӕхӕн сӕйгӕн ӕ нифс федар кӕнонцӕ ӕма имӕ хуӕздӕр кӕсонцӕ? Сӕйгӕмӕ ка кӕсуй, уонӕн сӕ бон куд ӕй еци уавӕри сӕхебӕл хуӕцун ӕма федар лӕуун? Ӕ мӕлӕт куд хӕстӕгдӕр кӕна, уотӕ цӕмӕти гъӕуама уонцӕ цӕттӕ? Фал бал ӕркӕсӕн, лӕгъуз незӕй ка сӕйуй, уӕхӕн сӕйгӕмӕ кӕсун абони уӕлдай зиндӕр цӕмӕн ӕй, уомӕ.

Медицинӕ размӕ ке цӕуй, е рабӕрӕг ӕй, адӕймаг цӕйбӕрцӕ цӕруй, уобӕл. Еу сӕдӕ анзей размӕ, сауӕнгӕ гъӕздуг бӕстити дӕр адӕн берӕ нӕ цардӕнцӕ. Хуӕцгӕ незтӕй кенӕ цидӕр бӕллӕхи фудӕй адӕн тагъд мардӕнцӕ. Сӕйгӕдони дзӕбӕх кӕнунмӕ фадуат алкӕмӕн нӕ адтӕй, ӕма сӕйгитӕмӕ арӕхдӕр сӕ бийнонтӕ кастӕнцӕ, ӕма мӕлгӕ дӕр хӕдзари ракӕниуонцӕ.

Абони медицинӕн ци бантӕстӕй, уой фӕрци дохтиртӕн сӕ бон ӕй незти хӕццӕ ӕгас хъауритӕй тох кӕнун, цӕмӕй адӕймаг фулдӕр фӕццӕра. Раздӕр цӕхуӕндӕр незтӕй адӕймаг цубур рӕстӕгмӕ ӕрбамӕлидӕ, нур ба еци незти хӕццӕ, гӕнӕн ес, ӕма берӕ ӕнзти дӕр фӕццӕра. Фал фулдӕр ке цӕрдзӕй, е уобӕл дзорӕг нӕй, ӕма исдзӕбӕх уодзӕй. Арӕх сӕйгитӕ уӕззау незӕй ке фӕгъгъезӕмарӕ кӕнунцӕ, уой туххӕй сӕ бон нӕ фӕууй сӕхемӕ зелун. Уӕхӕн сӕйгитӕмӕ  кӕсун хъӕбӕр зин фӕууй ӕма берӕ хъауритӕ фӕгъгъӕуй.

Кӕд раздӕр адӕймаг хӕдзари рамӕлидӕ, уӕд нур ба арӕхдӕр сӕйгӕдони. Уомӕ гӕсгӕ адӕнӕн сӕ фулдӕр нӕ зонунцӕ, адӕймаг куд фӕммӕлуй, уой, сӕхе цӕстӕй ӕй ӕрмӕстдӕр еуӕй-еуетӕ фӕууинунцӕ. Мӕлӕти къахбӕл ка ӕй еци адӕймаг куд уодзӕй, уой туххӕй ке неци зонунцӕ, уомӕ гӕсгӕ, ка ’й зонуй, сӕ бон ӕппундӕр маци уа, сӕйгӕ адӕймагмӕ кӕсун ку багъӕуа, уӕд. Уӕхӕн уавӕри син ци банхус кӕндзӕй?

Дорини хабарӕй уинӕн, беретӕн сӕ нифс ке басӕттуй, сӕ бийнонтӕй кенӕ се ’мбӕлттӕй ескӕмӕ лӕгъуз нез ку иссерунцӕ, уӕд. Уӕхӕн уавӕри хъӕбӕр ку тухсай, ку тӕрсай ӕма ку маст кӕнай, уӕд дин ци банхус кӕндзӕй, цӕмӕй цӕттӕ уай, фӕстӕдӕр ци ӕрцӕудзӕй, уомӕ? Еухатт Хуцауи еузӕрдон лӕггадгӕнӕг кувта: «Исахур нӕ кӕнӕ нӕ царди бӕнттӕн аргъ кӕнун, цӕмӕй исуӕн зӕрдӕй зундгин» (Псалом 90:12). Йеговӕ Хуцаумӕ зӕрдиагӕй ковӕ, цӕмӕй дин бавдеса, уӕ царди бӕнттӕн куд «аргъ кӕнайтӕ», ӕма сӕйгӕ адӕймагӕн ци рӕстӕг байзадӕй, уой хуӕздӕр куд уа, уотӕ рарветайтӕ.

Алцидӕр дзӕбӕх испълан кӕнӕ. Кӕд сӕйгӕн ӕ бон дзорун ӕма цидӕр унаффитӕ хӕссун ӕй, уӕд хуарз уайдӕ, ку ӕй бафӕрсисӕ, ӕхе бон ку нӕ уа, уӕд ӕ бӕсти унаффитӕ ка хӕсдзӕй, уобӕл. Ӕргом радзоретӕ, ка ’й зонуй ӕй фӕндуй, цӕмӕй аппарати фӕрци фулдӕр фӕццӕра, сӕйгӕдони уа кенӕ ’й цӕхуӕндӕр мадзӕлттӕй дзӕбӕх кӕнонцӕ. Уой фӕрци ӕ бийнонтӕ еуӕй-еу зиндзийнӕдтӕй хизт уодзӕнцӕ ӕма сӕхемӕ неци фудгин кӕсдзӕнцӕ, ӕ бӕсти сӕ унаффӕ хӕссун ку багъӕуа, уӕд. Рагацау ӕргом ку радзубанди кӕнайтӕ, уӕд бийнонтӕн сӕ бон уодзӕй сӕ хъауритӕ сӕйгӕмӕ кӕсунмӕ исаразун. «Ӕргом дзурд кӕми нӕ уа, уоми фӕндтӕ фехӕлдзӕнцӕ»,– финст ӕй Библий (Ӕмбесӕндтӕ 15:22).

Сӕйгӕмӕ ка фӕккӕсуй, уомӕн, арӕхдӕр, ӕ сӕйрагдӕр ихӕс фӕууй, цӕмӕй адӕймаги маци тухсун кӕна. Лӕгъуз незӕй сӕйгӕ адӕймаг ӕй гъӕуама лӕдӕра, ке ’й уарзунцӕ ӕма ӕ фарсмӕ кадӕр ке ес. Уой туххӕй ци ес бакӕнӕн? Уӕ бон ӕй сӕйгӕн кӕсун кенӕ зарун, ка ’й бафедар кӕндзӕй ӕма ин ӕхцӕуӕн ка уодзӕй, уӕхӕн литературӕ ӕма зартӕ. Беретӕн ӕнцондӕр фӕууй, ӕ бийнонтӕй ин еске ӕ къохбӕл ку фӕххуӕцуй ӕма ӕ хӕццӕ фӕлмӕн дзурд ку фӕккӕнуй, уӕд.

Сӕйгӕфӕрсӕг имӕ ка ӕрбацӕуа, уомӕн ӕ ном зӕгъӕ. Еу медицинон статьяй финст адтӕй: «Адӕймаг, гӕнӕн ес, цӕстӕй мабал уина, кенӕ смаг ӕма адӕ мабал лӕдӕра, фал игъосгӕ уӕддӕр фӕккӕнуй. Уотӕ дӕмӕ ку кӕса, ӕма [сӕйгӕ] фунӕй ӕй, уӕддӕр алцидӕр хуарз фегъосуй, ӕма ӕ рази, игъалӕй ин ци нӕ загътайсӕ, уой ма дзорӕ».

 Кӕд гӕнӕн уа, уӕд еумӕ коветӕ. Библий финст ес, еухатт апостол Павел е ’мбӕлтти хӕццӕ бӕллӕхи ке бахаудтӕй ӕма ма сӕ цардӕн дӕр тӕссаг ке адтӕй. Цума ӕнхус кӕми агурдтонцӕ? Павел е ’мбӕлттӕн лигъстӕ кодта: «Сумахӕн дӕр уӕ бон ӕй махӕн уӕ зӕрдиаг кувдтитӕй банхус кӕнун» (2 Коринфӕгтӕмӕ 1:8–11). Адӕймаг зин уавӕри ку уа кенӕ уӕззау сӕйгӕ ку уа, уӕд ин зӕрдиаг кувд устур ӕнхус уодзӕй.

Зӕрдӕн хъазар адӕймаг ке рамӕлдзӕй, уобӕл айдагъ расагъӕс кӕнгӕй дӕр адӕймагӕн ӕ нифс басӕттуй. Ӕма е дессаг дӕр нӕй, уомӕн ӕма Хуцау адӕймаги уотӕ не сфӕлдиста, цӕмӕй мӕлгӕ кӕна. Ӕма нӕ бон нӕй мӕлӕтмӕ цийфӕнди цӕстӕй кӕсун (Ромӕгтӕмӕ 5:12). Хуцауи Дзурд мӕлӕт хонуй «знаг» (1 Коринфӕгтӕмӕ 15:26). Мадта берӕ ке уарзис, еци адӕймаг ке нӕбал уодзӕй, уобӕл дӕ сагъӕс кӕнун дӕр ке нӕ фӕндуй, е зин балӕдӕрӕн нӕй ӕма си дессагӕй неци ес.

Фал уӕддӕр бийнонтӕ ку лӕдӕронцӕ, еци хабар ке ӕрцӕудзӕй, уӕд минкъийдӕр тухсдзӕнцӕ ӕма хъӕбӕрдӕр архайдзӕнцӕ, цӕмӕй сӕйгӕн ӕ уавӕр фенцондӕр кӕнонцӕ. Цӕттӕ цӕмӕ гъӕуама уонцӕ, уонӕй еуӕй-еу гъуддӕгтӕ финст ӕнцӕ рамки « Фӕстаг къуӕретӕ». Ке зӕгъун ӕй гъӕуй, уоми цӕй туххӕй финст ес, уой алли сӕйгӕ нӕ бавзаруй ӕма си рамки куд ранимадтонцӕ, уотӕ фӕд-фӕди не ’рцӕунцӕ. Фал сӕйгитӕн сӕ фулдӕр еци симптомтӕй кӕцидӕртӕ уӕддӕр бавзарунцӕ.

Адӕймаг ку фӕззиан уа, уӕд хуарз уайдӕ, рагацау ке хӕццӕ бадзубанди кодтай, ӕма дин е ’нхусӕй зӕрдӕ ка байвардта, еци ӕмбалмӕ бадзорун. Ка ’й зонуй, бийнонтӕн ӕма сӕйгӕмӕ ка кастӕй, уони гъӕудзӕй бафедар кӕнун ӕма син зӕгъун, ка рамардӕй, е ӕ уӕззау фӕлварӕнӕй ке фӕййервазтӕй ӕма ке нӕбал гъезӕмарӕ кӕнуй. Не Сфӕлдесӕг нин зӕгъуй: «Мӕрдтӕ... ӕппундӕр неци зонунцӕ» (Екклесиаст 9:5).

Бийнонтӕ гъӕуама Хуцаубӕл сӕ нифс даронцӕ, адӕймаг уӕззау незӕй ку гъезӕмарӕ кӕна, айдагъ еци рӕстӕг нӕ, фал ку фӕззиан уа, уой фӕсте дӕр. Хуцау дин иннети фӕрци банхус кӕндзӕй – етӕ дӕ сӕ дзурдтӕй бафедар кӕндзӕнцӕ ӕма дӕмӕ гъуддагӕй фӕккӕсдзӕнцӕ. Дорин загъта: «Ӕз исахур дӕн иннети ӕнхусбӕл арази кӕнун. Иннетӕ нин куд ӕнхус кодтонцӕ, е нӕ деси бафтудта. Мӕ сӕрихецау дӕр ӕма мӕхуӕдӕг дӕр лӕдӕрдтан, Йеговӕ нин уотемӕй уотӕ ке зӕгъуй, ӕз дӕ фарсмӕ дӕн, цӕмӕй дин аци уавӕр исфӕразунмӕ банхус кӕнон, зӕгъгӕ. Е ми некӕд феронх уодзӕй».

Йеговӕ Хуцау ӕй тӕккӕ хуӕздӕр Ӕнхусгӕнӕг. Не Сфӕлдесӕг ке ӕй, уомӕ гӕсгӕ нин нӕ рист ӕма нӕ маст лӕдӕруй. Ӕ бон ӕй ӕма ӕй фӕндгӕ дӕр кӕнуй, цӕмӕй нӕ зиндзийнӕдтӕ исфӕразӕн. Фал уомӕй хуӕздӕр ба е ӕй, ӕма нин зӕрдӕ ӕвӕруй, тагъд рӕстӕги мӕлӕтӕн кӕрон ке искӕндзӕй ӕма ӕ гъудий ка ’нцӕ, еци милиуангай адӕни ке райгас кӕндзӕй (Иоанни 5:28, 29; Раргомадӕ 21:3, 4). Ӕма уӕд алке бон дӕр уодзӕй зӕгъун, апостол Павел ци дзурдтӕ загъта, уони: «Мӕлӕт, кӕми ӕй дӕ уӕлахез? Мӕлӕт, кӕми ӕй дӕ маргӕй гъӕстӕ фат?» (1 Коринфӕгтӕмӕ 15:55).