Aru i mavurung megafu ta dara-daralan na totolay i davvun, kunne na gapa i pinaratu ira tatun. Segun ta eksperto ira ta environment, megafu ta annangngua ira na totolay, napakaru ngana i nadaral nga klase na pinaratu tapus mappeppeligro gapa nga mofu i karuan.

 Talaga kari nga interamente nga madaral na totolay i davvun? Onu duttal kari noka i tiempo nga makapattolay ira nga ari da ngana nga madaral i planeta?

 Aru nga eksperto i mangurug nga mawayya na totolay nga protektan i davvun anna mattolay nga ari madaral yatun. Kurugan gapa na researcher ira nga tapenu makasta i pattuppalan na appursigi na totolay, egga ira i dakal nga panguloli nga mawag tu kuan na ngamin nga totolay. Yaw ira i kasali tatun:

•   Mas paga nga tangngallan na totolay i davvun, vuku-vukig, dana-danum, anna i bebay ira.

•   Pangusa tu mas makasta ira nga technique ta pakkusetcha anna pangapan tu enerhiya.

•   Ulian i proseso na pamadday anna pangitaneg tu maka-makan tapenu maruddu nga maggafu ta mulu-mula i kanan na totolay anna ari kuruga kuman tu karne anna manango. Mapakarianan gapa i kanan na totolay anna mas mapabaddi i masayang nga maka-makan.

•   Mawag tu nonopan na totolay nga ari tu nakadepende i mas makasta nga pattolay ta kapeggan tu mas aru paga nga material nga gannug.

 Anni i makagim? Realistiko kari nga ekspektan tu makikoopera tatun ira nga panguli i ofisial ira na gobiernu, negosiante, anna i ngamin nga totolay? Onu imposible yatun megafu ta grabe i kaagum na karuan nga totolay, makasarili ira, anna awan tu pakialam da ta mesimmu ta mappange?—2 Timoteo 3:1-5.

 Ipasiguradu ta nittam na Biblia nga makasta i pappangetan na planeta tam. Ipakanawag natun nu ngatta ari tu makalanno i appursigi na totolay tapenu pagimmangan i kadaral na davvun, anna mabibbig gapa tatun i panguli ira nga mawag nga makua. Ikagi gapa natun nu kunnasi nga mesimmu danatun nga panguli.

 Nu ngatta ari tu makalanno i appursigi na totolay nga pagimmangan i kadaral na davvun. Si Jehova a nga Dios i namaratu ta davvun anna nipatangngal na yatun ta totolay. (Genesis 1:28; 2:15) Makua da yatun nga annungadda nu laman mappegiya ira ta Namaratu ta nira anna tuttuladda i ipakua na. (Proverbio 20:24) Ngem ari da nga sinuttul si Jehova anna nattolay lapa ira segun ta kayà da. (Eclesiastes 7:29) Ari talaga mawayya na totolay nga tangngallan i davvun nu ira laman i mangngua tatun anna maski anni paga i appursigi da, limitadu laman i makua da.​—Proverbio 21:30; Jeremias 10:23.

 I panguli nga mawag tu makua. Plano na Dios nga pagimmangan i panara-daral na totolay ta davvun. (Nepakannammu 11:18) Ari na ulian i gobiernu anna i organisasion na totolay nga manara-daral ta planeta, nu ari lagu, talianan na ira. (Nepakannammu 21:1) Megafu tatun, kagian ni Jehova: “Talibaguak-ku sangoye ngamin i ganna-gannug!”—Nepakannammu 21:5.

 Nu kunnasi nga mesimmu yatun nga panguli. Talianan saw ni Jehova i gobiernu na totolay tu gobiernu ta langi nga magalan tu Pappatulan na Dios. Yatun nga gobiernu nu sitaw si Jesu-Cristo i patul na i mammaguray saw ta interu davvun.​—Daniel 2:44; Mateo 6:10.

 Tudduan saw na Pappatulan na Dios i totolay nu kunnasi da nga matuttul i matunung ira nga estandarte na Dios. Nu alawatan na totolay nga egga i Namaratu ta nira anna tuttuladda i pangigiya na, makapattolay ira nga ari da nga madaral i davvun. (Isaias 11:9) Segun ta Biblia, i gobiernu na Dios i mangiyawa tu makakkasta nga pattolay nga ari nga makadaral ta planeta tam. Kuan na Pappatulan na Dios i tumunug ira:

•   Mangiyawa tu makan para ta ngamin.​—Salmo 72:16.

•   Itoli na i nawawan anna nadaral ira ta pallevu.​—Isaias 35:1, 2, 6, 7.

•   Siguraduan na nga tangngallan na totolay i aya-ayam anna ari nga takitan na aya-ayam i totolay.​—Isaias 11:6-8; Oseas 2:18.

•   Pawanan na i kalamidad ira.​—Marcos 4:37-41.

 Makasiguradu ka nga aranni ngana nga kuan yatun na Pappatulan na Dios. Para ta mas aru nga informasion, bibbigan i artikulo nga “Kanni nga Mammaguray ta Davvun i Pappatulan na Dios?”