Namoonni kan duʼan maaliifi? jedhanii gaafachuun waanuma jiru dha. Keessumaa immoo nama jaallannu yommuu duʼaan dhabnu. Kitaabni Qulqulluun, “Ilkeen duʼa geessisu cubbuu dha” jedha.—1 Qorontos 15:56.

Namoonni hundi cubbuu kan hojjetanii fi kan duʼan maaliifi?

 Namoonni jalqabaa Addaamii fi Hewaan jireenya isaanii kan dhaban Waaqayyo irratti cubbuu waan hojjetaniifi. (Uumama 3:17-19) Waaqayyo “madda jireenyaa” waan taʼeef isa irratti finciluun isaanii duʼa akka isaan irraan geessisu ifa dha.—Faarfannaa 36:9; Uumama 2:17.

  Addaam rakkina cubbuun fidu sanyii isaa hundumaatti dabarseera. Kitaabni Qulqulluun, “Cubbuun karaa nama tokkoo addunyaatti gale, duutis karaa cubbuu dhufe; kanaafuu, namoonni hundi cubbuu waan hojjetaniif, duuti namoota hundumaa waliin gaʼe” jedha. (Roomaa 5:12) Kanaafuu namoonni hundi kan duʼan cubbuu waan hojjetaniif.—Roomaa 3:23.

Duuti kan balleeffamu akkamitti?

 Waaqayyo yeroon ‘inni bara baraaf duʼa itti liqimsu’ akka dhufu waadaa galeera. (Isaayyaas 25:8) Duʼa hambisuuf cubbuu isa duʼaaf sababa taʼe balleessuu qaba. Waaqayyo kana karaa Yesuus Kiristoos ‘isa cubbuu addunyaa balleessuutiin’ raawwata.—Yohaannis 1:29; 1 Yohaannis 1:7.