Gyɛnɛsese 7:1-24
7 Ɛhye anzi, Gyihova zele Nowa kɛ: “Kɔ ɛlɛne ne anu, ɛ nee wɔ sua nu amra amuala ɔluakɛ menwu kɛ ɛdawɔ a ɛle tenlenenli wɔ me nye zo wɔ awolɛndoazo ɛhye anu a.+
2 Fa nane biala mɔɔ anwo te la nsuu,*+ nyinli nee belɛ; na fa nane biala mɔɔ anwo ɛnde la nwiɔ ala, nyinli nee belɛ;
3 yɛɛ abɔdeɛ biala mɔɔ tu dua anwomanyunlu la nsuu,* nyinli nee belɛ, amaa bɛanyia ngoane na bɛawo bɛamaa bɛ nwo azo wɔ azɛlɛ ne azo amuala.+
4 Ɔluakɛ yeha kenle nsuu ala, mebamaa ezule adɔ+ azɛlɛ ye azo alehyenlɛ nee aledwolɛ kenle 40,+ na mebazɛkye debie biala mɔɔ ngoane wɔ ye nu mɔɔ meyɛ la meavi azɛlɛ ne azo.”+
5 Na Nowa yɛle debie biala mɔɔ Gyihova hanle hilele ye la.
6 Nowa lile ɛvolɛ 600 la yɛɛ azuyilɛ ne rale azɛlɛ ne azo a.+
7 Yemɔti Nowa nee ɔ mra mrenyia ne mɔ, ɔ ye yɛɛ ɔ mra mrenyia ne mɔ aye mɔ hɔle ɛlɛne ne anu kolaa na ezule ne abɔ ɔ bo adɔ.+
8 Na nane biala mɔɔ anwo te nee nane biala mɔɔ anwo ɛnde, yɛɛ abɔdeɛ biala mɔɔ tu nee debie biala mɔɔ duolua azɛlɛ ne azo la,+
9 luale ye nwiɔ nwiɔ, nyinli nee belɛ, hɔle Nowa anwo ɛkɛ wɔ ɛlɛne ne anu, kɛ mɔɔ Nyamenle hanle hilele Nowa la.
10 Na kenle nsuu anzi, azuyilɛ ne rale azɛlɛ ne azo.
11 Nowa lile ɛvolɛ 600 la, ye siane ne mɔɔ tɔ zolɛ nwiɔ na ye kenle 17 ne azo, kenle zɔhane, anwomanyunlu azule kpole ne dukuele yɛɛ anwuma nzule nlenkɛ ne mɔ kɔsɔɔti bukebukele.+
12 Na ezule ne dɔle azɛlɛ ne azo alehyenlɛ nee aledwolɛ kenle 40.
13 Kenle ko zɔhane ala, Nowa nee ɔ mra mrenyia ne mɔ, Hyɛm, Ham yɛɛ Gyeefɛte,+ nee ɔ ye yɛɛ ɔ mra mrenyia ne mɔ aye mɔ nsa ne hɔle ɛlɛne ne anu.+
14 Bɛ nee ɛbɔ nu nane biala kɛ mɔɔ ye ɛsaso de la, sua zo ayɛmoa biala kɛ mɔɔ ye ɛsaso de la, nane biala mɔɔ twenle ɔ nwo aze* wɔ azɛlɛ ne azo la kɛ mɔɔ ye ɛsaso de la yɛɛ abɔdeɛ biala mɔɔ tu, ɛhye kile aloma biala yɛɛ abɔdeɛ biala mɔɔ lɛ ndɛbalɛ la, kɛ mɔɔ bɛ ɛsaso de la hɔle ɛlɛne ne anu.
15 Nwonane biala mɔɔ ngoane ɛnwomenle* wɔ ye nu la luale ye nwiɔ nwiɔ hɔle Nowa anwo ɛkɛ wɔ ɛlɛne ne anu.
16 Yemɔti anyewɔzo abɔdeɛ biala nyinli nee belɛ hɔle ɛlɛne ne anu kɛ mɔɔ Nyamenle hanle hilele ye la. Ɛhye anzi, Gyihova dole anlenkɛ ne anu.
17 Ezule ne dɔle azɛlɛ ne azo too kenle 40, nzule ne yile kpole na ɔmaanle ɛlɛne ne zo, na ɛlɛne ne tulule nzule ne anye.
18 Nzule ne yile kpole na ɔbule ɔvale azɛlɛ ne azo, noko ɛlɛne ne tulule nzule ne anye.
19 Nzule ne yile kpole kpalɛ wɔ azɛlɛ ne azo na ɔhedale awoka ndendenle kɔsɔɔti mɔɔ wɔ ewiade ye la azo.+
20 Nzule ne hedale awoka ne mɔ azo na ɔhɔle anwuma kubit 15.*
21 Yemɔti anyewɔzo abɔdeɛ* mɔɔ duolua azɛlɛ ne azo la kɔsɔɔti wule+—abɔdeɛ mɔɔ tu, sua zo nyɛmoa, ɛbɔ nu nane, abɔdeɛ ngyikyi dɔɔnwo* nee menli kɔsɔɔti.+
22 Debie biala mɔɔ wɔ azɛlɛ resee zo mɔɔ die ngoane* ɛnwomenle wɔ ɔ bonyi nu la wule.+
23 Yemɔti ɔzɛkyele debie biala mɔɔ ngoane wɔ ye nu, mɔɔ sonla, nane, nane mɔɔ twenle bɛ nwo aze yɛɛ abɔdeɛ mɔɔ tu dua anwomanyunlu boka nwo la ɔvile azɛlɛ ne azo. Bɛzɛkyele bɛ muala bɛvile azɛlɛ ne azo;+ Nowa nee menli mɔɔ boka ɔ nwo wɔ ɛlɛne ne anu la angomekye a nyianle ngoane a.+
24 Na nzule ne yile vale azɛlɛ ne azo too kenle 150.+
Ɔbodwɛkɛ
^ Anzɛɛ ɔkola ɔkile, “nane biala mɔɔ anwo te la nyinli nsuu nee mbelɛ nsuu.”
^ Anzɛɛ ɔkola ɔkile, “abɔdeɛ mɔɔ tu dua anwomanyunlu la nyinli nsuu nee mbelɛ nsuu.”
^ Anzɛɛ “ngoane sunsum.”
^ Hibulu aneɛ nu, “nwonane.”
^ Anzɛɛ “mɔɔ die ngoane sunsum.”
