Mɔɔ Limoa Kɔmaa Kɔlentema 16:1-24
16 Akee mɔɔ fale ndoboa mɔɔ bɛdielie bɛmaa nwuanzanwuanzama ne anwo la,+ bɛli adehilelɛ mɔɔ menvale memaanle Galeehyea asafo ne mɔ la azo.
2 Dapɛne biala anu kenle mɔɔ limoa la, ɔwɔ kɛ bɛ nuhua ko biala ye mɔɔ yenyia ye la bie to ahane, amaa saa meba a bɛanlielie ndoboa.
3 Na saa meba a, mrenyia mɔɔ bɛhɛlɛle kɛlata kɛ bɛlie bɛ bɛdo nu la, mebazoa bɛ+ meamaa bɛava bɛ ahyɛlɛdeɛ ne mɔɔ vi bɛ ɛhulolɛ nu la bɛahɔ Gyɛlusalɛm.
4 Na saa ɔfɛta kɛ mekɔ bie noko a, ɛnee bɛ nee me ahɔ.
5 Noko saa mekɔfa Masidonea a, mebara bɛ nwo lɔ, ɔluakɛ mebava Masidonea;+
6 na bie a mebali mekɛ ekyi anzɛɛ fɔsɛlɛ ne bɔbɔ wɔ bɛ nwo ɛkɛ, amaa bɛahɔzɔho me ekyii na meahɔ ɛleka mɔɔ mekɔ la.
7 Ɔluakɛ mengulo kɛ menwu bɛ ala a ɛnee me gyakɛ gyi adenle zo, saa Gyihova* maa adenle a, me nye la kɛ me nee bɛ badɛnla ahyɛ ekyii.+
8 Noko mebadɛnla Ɛfɛsɛse+ ɛke kɔkpula kɛ Pɛntekɔso Ɛvoyia ne kɛdwu,
9 ɔluakɛ bɛbuke anlenkɛ kpole bie mɔɔ bamaa meayɛ gyima dɔɔnwo la bɛmaa me,+ noko dwazotiama dɔɔnwo wɔ ɛkɛ.
10 Na saa Timote+ ba a, bɛnlea na ye ahonle andu wɔ mekɛ mɔɔ ɔwɔ bɛ nwo lɔ la, ɔluakɛ ɔlɛyɛ Gyihova* gyima ne+ kɛ mɔɔ melɛyɛ ye ala la.
11 Ɔti awie biala mmafa ɔ nyunlu kyikyi aze. Bɛboa ye bɛmaa ɔzɔ ye adendulɛ ne azo wɔ anzodwolɛ nu amaa yeara me nwo ɛke, ɔluakɛ me nee mediema ne mɔ ɛlɛkendɛ ye.
12 Akee mɔɔ fale yɛ diema Apɔlɔso+ anwo la, menzɛlɛle ye ɛsesebɛ kɛ ɔ nee mediema ne mɔ ɛrɛla bɛ nwo lɔ. Ɔtɛyɛle ye adwenle kɛ ɔba kɛkala, noko saa ɔnyia adenle a ɔbara.
13 Bɛzinza,+ bɛgyinla kpundii wɔ diedi ne anu,+ bɛnyia akɛnrasesebɛ,+ bɛmaa bɛ nwo ɛyɛ se.+
14 Bɛva ɛlɔlɛ bɛyɛ debie biala mɔɔ bɛyɛ la.+
15 Mediema, akee metu bɛ folɛ: Bɛze kɛ Setɛfanase sua nu amra a le ɛdoavolɛma mɔɔ limoa wɔ Akaya a, na bɛdu bɛ nwo bɛmaa kɛ bɛkɛzonle nwuanzanwuanzama ne.
16 Bɛdabɛ noko bɛbɛlɛ bɛ nwo aze bɛmaa menli mɔɔ le zɛhae nee bɛdabɛ kɔsɔɔti mɔɔ bɛ nee bɛ ɛyɛ ko na bɛyɛ gyima ɛsesebɛ la.+
17 Noko me nye ɛlie Setɛfanase+ nee Fɔtunatɛse nee Akeeyaekɛse ɛralɛ ne anwo, ɔluakɛ bɛnle ɛke la bɛgyinla bɛ gyakɛ anu bɛboa me kpalɛ.
18 Na bɛmaa me sunsum ne nee bɛ ɛdeɛ ne mɔ anye ɛlie. Yemɔti bɛli menli zɛhae mɔ eni.*
19 Asafo ne mɔ mɔɔ wɔ Ehyea la biza bɛ. Akoyela nee Peleseka* nee asafo ne mɔɔ yia nu wɔ bɛ sua nu ɛkɛ la+ biza bɛ kpalɛ kpalɛ wɔ Awulae anu.
20 Mediema ne mɔ amuala biza bɛ. Bɛva bɛ nloa anwo ɛvolɛ nwuanzanwuanza bɛbizebiza bɛ nwo ahye.
21 Medame Pɔɔlo, mebiza bɛ, me sa anloa ɛne.
22 Saa awie ɛnlɛ ɛlɔlɛ ɛmmaa Awulae a, munzule ɛha ye. O yɛ Awulae, bɛla!
23 Awulae Gyisɛse ɛlolɛ kpole ne nee bɛ ɛdɛnla.
24 Me ɛlɔlɛ nee bɛ muala mɔɔ bɛle Kelaese Gyisɛse ɛdoavolɛma la ɛdɛnla.
