Edwɛkɛ, “bɛwo ye fofolɛ” kile abusuabɔlɛ fofolɛ mɔɔ la Nyamenle nee ahenle mɔɔ bɛwo ye fofolɛ avinli la. (Dwɔn 3:​3, 7) Nyamenle die menli mɔɔ bɛwo bɛ fofolɛ la ka ɔ mra. (Wulomuma 8:​15, 16; Galeehyeama 4:5; 1 Dwɔn 3:1) Bɛle kɛ menli mɔɔ bɛde bɛ wɔ mɛla adenle azo la, ɔwɔ kɛ bɛfa nzenzaleɛ bie anu amaa bɛaraboka Nyamenle abusua ne anwo.​—2 Kɔlentema 6:​18.

Duzu ati a bɛwo awie fofolɛ a?

 Gyisɛse hanle kɛ: “Awie biala ɛnrɛnwu Nyamenle Belemgbunlililɛ ne kyesɛ bɛwo ye fofolɛ.” (Dwɔn 3:3) Ɛhye ati saa bɛwo awie fofolɛ a, ɔsiezie ahenle ne kɛ ɔ nee Kelaese bali tumi wɔ Nyamenle Belemgbunlililɛ ne anu. Belemgbunlililɛ ɛhye tumililɛ ne vi anwuma, ɔti Baebolo ne kilehile ‘awolɛ fofolɛ’ ne anu kɛ agyadeɛ mɔɔ bɛva ‘bɛzie anwuma.’ (1 Pita 1:​3, 4) Bɛmaa menli mɔɔ bɛwo bɛ fofolɛ la ɛnyia anwodozo kɛ bɛ nee Kelaese “bali belemgbunli”.​—2 Temɔte 2:​12; 2 Kɔlentema 1:​21, 22.

Kɛzi bɛwo awie fofolɛ ɛ?

 Mekɛ mɔɔ ɛnee Gyisɛse ɛlɛka ɛhye anwo edwɛkɛ la, ɔhanle kɛ bɛbava “nzule nee Sunsum Nwuanzanwuanza ne” a bɛazɔne menli mɔɔ bɛwo bɛ fofolɛ la a. (Dwɔn 3:5) Edwɛkɛ ɛhye kile kɛ bɛbazɔne awie wɔ nzule nu na eza bɛava sunsum nwuanzanwuanza ne bɛazɔne ye.​—Gyima ne 1:5; 2:​1-4.

 Gyisɛse a le awie mɔɔ limoa mɔɔ bɛwole ye fofolɛ a. Bɛzɔnenle ye wɔ Azule Dwɔdan ne anu, yemɔ anzi Nyamenle vale ye sunsum nwuanzanwuanza ne kpokpale (anzɛɛ zɔnenle) ye. Ɔlua ɛhye azo bɛwole Gyisɛse bieko kɛ Nyamenle sunsum nu ralɛ mɔɔ ɔbahola yeazia yeahɔ anwuma. (Maake 1:​9-​11) Nyamenle maanle anyelazo ɛhye rale nu wɔ mekɛ mɔɔ ɔdwazole Gyisɛse kɛ sunsum nu abɔdeɛ la.​—Gyima ne 13:33.

 Bɛsɔne menli mɔɔ bɛwo bɛ fofolɛ la noko wɔ nzule nu kolaa na bɛanyia sunsum nwuanzanwuanza ne. * (Gyima ne 2:​38, 41) Akee bɛnyia anyelazo bɔkɔɔ kɛ bɛbahɔ anwuma, na Nyamenle bamaa yeara nu ɔlua ewudwazo ne azo.​—1 Kɔlentema 15:42-​49.

Adalɛ edwɛkɛ mɔɔ fale awolɛ fofolɛ nwo

 Adalɛ edwɛkɛ: Awie bahola akpa kɛ bɛwo ye fofolɛ.

 Nɔhalɛ edwɛkɛ: Nwolɛ adenle ɛbuke ɛmaa awie biala kɛ ɔ nee Nyamenle banyia agɔnwolɛvalɛ na yeanyia ngoane. (1 Temɔte 2:​3, 4; Gyemise 4:8) Noko akee, Nyamenle a kpa menli mɔɔ bɛbawo bɛ fofolɛ, anzɛɛ bɛbava sunsum nwuanzanwuanza ne bɛakpokpa bɛ la a. Kɛ mɔɔ Baebolo ne kile la, awie mɔɔ bɛwo ye fofolɛ la “ɛngyi mɔɔ sonla kpondɛ la, anzɛɛ mɔɔ ɔkɛyele ɔ nwo kɛ ɔyɛ la azo,” emomu ɔgyi Nyamenle anwo zo. (Wulomuma 9:​16) Bɛbahola bɛahile edwɛkɛkpɔkɛ ‘awolɛ fofolɛ’ abo kɛ “awolɛ mɔɔ vi anwuma,” ɛhye kile kɛ ahenle mɔɔ kpa menli mɔɔ bɛbawo bɛ fofolɛ la “vi anwuma” anzɛɛ Nyamenle.​—Dwɔn 3:3.