Baibo ikamakamba za Aramagedo sinena kuti ni nkhondo imene idzakhudza dela locepa cabe, koma imati ni nkhondo ya padziko lonse. Imeneyi idzakhala nkhondo ya pakati pa maboma onse a anthu na Mulungu.

•   “Mauthenga ouzilidwa ndi ziwanda. . . akupita kwa mafumu a dziko lonse lapansi kumene kuli anthu, kuti awasonkhanitse pamodzi kunkhondo ya tsiku lalikulu la Mulungu Wamphamvuyonse. . . . Anawasonkhanitsa pamodzi, kumalo amene mʼCiheberi amachulidwa kuti Aramagedo.”—Chivumbulutso 16:14, 16.

 Liwu lakuti “Aramagedo” licokela ku mawu a Ciheberi akuti Har Meghid·dohnʹ, amene atanthauza “Phili la Megido.” Megido unali mzinda wakale ku Israel. Pa cifukwa cimeneci, anthu ambili amakhulupilila kuti Aramagedo idzacitikila ku Israel. Komabe, malo a ku Megido kapena malo ena alionse ku Middle East ni ocepa kwambili. Conco “mafumu a dziko lonse lapansi kumene kuli anthu” na magulu awo ankhondo sangakwane kusonkhana kumeneko.

 Buku la Chivumbulutso linalembedwa “pogwilitsa nchito zizindikilo,” kapena kuti pogwilitsa nchito mawu ophiphilitsa. (Chivumbulutso 1:1) Motelo Aramagedo si malo enieni, koma ni nthawi pamene mitundu yonse padziko lonse idzasonkhana kuti iukile ulamulilo wa Mulungu kothela.—Chivumbulutso 19:11-16, 19-21.