1, 2. (a) Ke ka baka la’ng Hanna a be a se a thaba ge a be a lokišetša leeto? (b) Re ka ithuta’ng kanegelong ya Hanna?

HANNA o be a swaregile kudu ka go lokišetša leeto, a leka go se nagane ka mathata a gagwe. E be e swanetše go ba nako e thabišago; monna wa gagwe Elikana o be a tlwaetše go sepela le lapa la gagwe ka moka maetong a a ngwaga le ngwaga a go yo rapela taberenakeleng kua Shilo. Jehofa o be a rerile gore dinako tšeo e be tše di thabišago. (Bala Doiteronomio 16:15.) Le gona ga go pelaelo gore ga e sa le go tloga bjaneng Hanna a thabela menyanya yeo. Eupša nywageng e sa tšwago go feta maemo a ile a fetoga.

² O be a šegofaditšwe ka monna yo a mo ratago. Lega go le bjalo, Elikana o be a na le mosadi yo mongwe. Leina la gagwe e be e le Penina gomme go bonagala a be a ikemišeditše go šulafaletša Hanna bophelo. Penina o be a bile a hweditše tsela ya go dira gore dinako tše tša ngwaga le ngwaga di kweše Hanna bohloko kudu. Bjang? Sa bohlokwa kudu, tumelo ya Hanna go Jehofa e ile ya mo thuša bjang go lebeletšana le boemo bjo bjo thata? Ge e ba o lebeletšane le ditlhohlo tšeo di go amogago lethabo bophelong, o tla lemoga gore pego ya Hanna ke e kgothatšago kudu.

3, 4. Hanna o ile a lebeletšana le mathata afe a mabedi a magolo gomme ke ka baka la’ng bobedi bja ona e be e le tlhohlo?

³ Beibele e utolla mathata a mabedi a magolo bophelong bja Hanna. Bothata bja mathomo o be a ka bo lokiša eupša bja bobedi o be a ka se dire selo ka bjona. Bja mathomo, o be a le lenyalong la segadikane e bile a na le mogaditšong yo a mo hloilego. Bja bobedi, e be e le moopa. Boemo bjoo ke bjo thata go mosadi le ge e le ofe yo a nyakago go ba le bana; eupša mehleng ya Hanna le go ya ka setšo sa gabo, seo e be e le selo se se nyamišago kudu. Lapa le lengwe le le lengwe le be le ithekgile ka ditlogolwana gore di tšwetše pele leina la lapa. Boopa bo be bo bonagala e le thogako e kgolo le selo seo se lešago dihlong kudu.

⁴ Hanna o be a ka kgona go kgotlelela boemo bjo ge nkabe Penina a be a sa mo tshwenye. Lenyalo la segadikane e be e se boemo bjo bo kgahlišago. Le be le tletše diphadišano, ditshele le go kwešana  bohloko. Mokgwa wo o be o fapane kudu le tekanyetšo ya go nyalana le molekane o tee yeo Modimo a e hlomilego serapeng sa Edene. (Gen. 2:24) Ka go re’alo Beibele ga e thekge lenyalo la segadikane gomme boemo bja ka lapeng la Elikana ke mohlala o bontšhago gore lenyalo le bjalo le be le se botse.

5. Ke ka baka la’ng Penina a be a nyaka gore Hanna a tlaišege gona o ile a kweša Hanna bohloko bjang?

⁵ Elikana o be a rata Hanna kudu. Go ya ka histori ya Sejuda, go bonagala a nyetše Hanna pele gomme a nyala Penina nywaga ka morago. Go sa šetšwe gore boemo e be e le bofe, Penina yoo a bego a tloga a hufegela Hanna, o ile a hwetša ditsela tše dintši tša go tlaiša mogaditšong wa gagwe. Seo Penina a bego a phala Hanna ka sona ke gore yena e be e se moopa. Penina o ile a belega bana a sa tšo ba belega gomme go ikgantšha ga gagwe go be go gola ge bana ba dutše ba ata. Go e na le go kwela Hanna bohloko le go mo homotša ka ge e le moopa, Penina o ile a diriša boemo bjoo gampe. Beibele e re Penina o ile a tlaiša Hanna e le gore a ‘tlalelwe kudu.’ (1 Sam. 1:6) Penina o be a dira ka boomo. O be a nyaka go kweša Hanna bohloko gomme o ile a atlega.

6, 7. (a) Go sa šetšwe maiteko a Elikana a go homotša Hanna, ke ka baka la’ng Hanna a ka ba a ile a se mmotše ditaba ka moka? (b) Na boopa bja Hanna bo be bo bolela gore Jehofa o be a sa mo amogele? Hlalosa. (Bona mongwalo wa tlase.)

⁶ Go bonagala Penina a be a ikhola ka leeto la ngwaga le ngwaga la go ya Shilo. Elikana o be a nea “barwa le barwedi” ba bantši ba Penina dilo tša go direla Jehofa dihlabelo. Lega go le bjalo, Hanna yo a se nago bana o be a hwetša dilo tša gagwe feela tša go dira dihlabelo. Ka gona, Penina o ile a phagamela Hanna e bile a mo gopotša gore ke moopa moo mosadi yo a ilego a lla a ba a felelwa ke kganyogo ya go ja. Elikana o ile a lemoga gore Hanna wa gagwe yo a rategago o be a gateletšegile e bile a sa je, ka gona o ile a leka go mo homotša. O ile a mmotšiša a re: “Hanna o llela’ng, o reng o sa je, le gona o reng o nyamile? Na go wena ga ke phale barwa ba lesome?”​—1 Sam. 1:4-8.

⁷ Se se kgahlišago ke gore Elikana o ile a lemoga gore go gateletšega ga Hanna go be go sepedišana le gore ke moopa. Le gona, ga go pelaelo gore Hanna o ile a tšeela godimo kgonthišetšo ya gagwe ya gore o a mo rata. * Eupša Elikana ga se a ka a bolela selo ka lehloyo la Penina; le gona pego ya Beibele ga e bolele gore Hanna o ile a mmotša ka lona. Mohlomongwe o ile a bona gore go bolela seo Penina a se dirilego go be go tla mpefatša boemo. Na ruri Elikana o be a tla fetoša  dilo? Na Penina o be a ka se hloye Hanna le go feta, le gona na bana le bahlanka ba mosadi yoo yo a nago le lehloyo ba be ba ka se mo ekiše? Hanna o be a tlo no ikwa a sa amogelege le go feta ka lapeng la gagwe.

8. Ge o lebeletšane le go hloka botho goba go hloka toka, ke ka baka la’ng e le mo go homotšago go gopola gore Jehofa ke Modimo wa toka?

⁸ Go sa šetšwe gore Elikana o ile a bona goba a se bone lehloyo la Penina, Jehofa Modimo o ile a le bona. Lentšu la gagwe le bontšha gore o bone sohle seo se bego se direga, ka go re’alo le nea temošo e kwagalago go motho le ge e le ofe yo a nago le lehufa leo le bonagalago e le le lenyenyane goba ditiro tša lehloyo. Ka lehlakoreng le lengwe, batho bao ba se nago molato le bao ba nago le khutšo go swana le Hanna, ba ka homotšwa ke go tseba gore Modimo wa toka o lokiša ditaba ka moka ka nako ya gagwe le ka tsela ya gagwe. (Bala Doiteronomio 32:4.) Mohlomongwe Hanna o be a tseba seo, ka gobane o ile a tsoma thušo go Jehofa.

9. Re ka ithuta thuto efe boikemišetšong bja Hanna bja go tšea leeto la go ya Shilo le ge a be a tseba gore mogaditšong wa gagwe o tla itshwara bjang?

⁹ Mesong ke ge lapa le šetše le swaregile. Yo mongwe le yo mongwe o be a itokišeletša leeto, go akaretša le bana. Leeto la go ya Shilo le be le tla dira gore lapa le le legolo le sepele dikhilomithara tše fetago tše 30 nageng ya meboto ya Efuraimi. * Ge ba sepela ka dinao, leeto leo le be tla tšea letšatši goba a mabedi. Hanna o be a tseba gore mogaditšong wa gagwe o be a tlo itshwara bjang. Lega go le bjalo, Hanna ga se a ka a šala gae. Ka go re’alo, o beetše barapedi ba Modimo mohlala o mobotse go fihla le lehono. Le ka mohla ga go bohlale go dumelela go hloka boitshwaro ga batho ba bangwe go šitišana le borapedi bja rena go Modimo. Ge re ka dira bjalo, re ka se hwetše ditšhegofatšo tšeo di re matlafaletšago go kgotlelela.

10, 11. (a) Ke ka baka la’ng Hanna a ile a ya taberenakeleng gateetee ge go tšwelela sebaka? (b) Hanna o ile a ntšhetša bjang Tatagwe wa legodimong sa mafahleng ka thapelo?

¹⁰ Ka morago ga go sepela letšatši le letelele ditseleng tša manyokenyoke tša dithabeng, lapa le le legolo mafelelong le be le le kgauswi le go fihla Shilo. E be e bonagala mola godimo ga mmotwana wo o dikologilwego ke meboto e megolo. Ge ba dutše ba batamela, Hanna o swanetše go ba a ile a nagana kudu ka seo a tlago go se bolela thapelong ya gagwe go Jehofa. Ge ba fihlile, lapa le ile la thabela dijo le le gotee. Hanna o ile a tloga moo sehlopheng gateetee ge go tšwelela sebaka gomme a leba taberenakeleng ya Jehofa. Moperisita yo a phagamego Eli o be a le moo, a dutše kgauswi le mojako. Eupša Hanna o be a tshwenyegile ka Modimo wa gagwe. Ge a le taberenakeleng, o be a ikwa a kgodišegile gore o tla kwewa. Ge e ba go se na motho yo a bego a ka kwešiša  boemo bja gagwe bjo bo gateletšago, Tatagwe wa legodimong o be a tla bo kwešiša. O ile a tlalelana ka manyami gomme a thoma go lla.

¹¹ Ge mmele wa gagwe o thothomela ka baka la go lla gabohloko, Hanna o ile a bolela le Jehofa ka pelong. Melomo ya gagwe e be e emaema ge a dutše a hlalosa bohloko bja gagwe ka pelong. Le gona o ile a rapela nako e telele, a ntšhetša Tatagwe sa mafahleng. Lega go le bjalo, ga se a fo kgopela Modimo go phethagatša kganyogo ya gagwe ya go ba le bana. Eupša Hanna o be a nyaka le go fa Modimo sohle seo a ka se kgonago go e na le go fo amogela ditšhegofatšo tša Gagwe. Ka gona o ile a ena ka gore ge a ka ba le morwa, o tla mo neela gore a hlankele Jehofa bophelo bja gagwe ka moka.—1 Sam. 1:9-11.

12. Ka ge go bontšhitšwe mohlaleng wa Hanna, ke’ng seo re swanetšego go se gopola ge re rapela?

¹² Ka gona Hanna o beetše bahlanka ba Modimo ka moka mohlala ge go tliwa tabeng ya thapelo. Jehofa o laletša bahlanka ba gagwe ka botho gore ba bolele le yena ka bolokologi ntle le go dikadika, ba mmotše dilo tšeo ba tshwenyegilego ka tšona go swana le ngwana yo a botago motswadi wa gagwe yo lerato. (Bala Psalme 62:8; 1 Bathesalonika 5:17.) Moapostola Petro o ile a budulelwa go ngwala mantšu a a homotšago mabapi le go rapela Jehofa, a re: “[Lahlelang] dipelaelo tša lena ka moka go yena, gobane o a le hlokomela.”​—1 Pet. 5:7.

13, 14. (a) Eli o ile a kitimela go dira phetho efe e fošagetšego ka Hanna? (b) Tsela yeo Hanna a ilego a araba Eli e re beetše mohlala ofe o mobotse kudu wa tumelo?

¹³ Lega go le bjalo, batho ga ba na kwešišo le kwelobohloko tšeo di lekanago le tša Jehofa. Ge Hanna a be a lla e bile a rapela, o ile a makatšwa ke go kwa lentšu. E be e le Eli, moperisita yo a phagamego yoo a bego a mo šeditše. O ile a re: “O tla dula o tagilwe go fihla neng? Tlogela go nwa beine.” Eli o be a bone melomo ya Hanna ge e emaema, ge a lla gotee le go bonagala ga gagwe a nyamile. Go e na le go botšiša gore molato ke eng, o ile a kitimela go dira phetho ya gore o be a tagilwe.​—1 Sam. 1:12-14.

¹⁴ Le ge Hanna a be a šetše a nyamile, o swanetše go ba a ile a nyamišwa kudu ke go latofatšwa ntle le lebaka​—e bile a latofatšwa ke monna yo a lego boemong bjo bo hlomphegago ka tsela ye! Lega go le bjalo, le lebakeng le o ile a bea mohlala o mobotse kudu wa tumelo. Ga se a ka a dumelela go se phethagale ga monna yo go šitišana le borapedi bja gagwe go Jehofa. O ile a araba Eli ka tlhompho gomme a mo hlalosetša boemo bja gagwe. Mohlomongwe ka go lemoga gore o be a fošitše, Eli o ile a araba ka segalo se bonolo, a re: “Sepela ka khutšo, eka Modimo wa Isiraele a ka go nea seo o mo kgopetšego sona.”​—1 Sam. 1:15-17.

15, 16. (a) Hanna o ile a kgongwa bjang ke go ntšhetša Jehofa sa mafahleng le go mo rapela a le taberenakeleng? (b) Re ka ekiša mohlala wa Hanna bjang ge re imelwa ke maikwelo a fošagetšego?

¹⁵ Hanna o ile a kgomega bjang ge a be a ntšhetša Jehofa sa mafahleng le go mo rapela a le moo taberenakeleng ya gagwe? Pego e balega  ka gore: “Ka morago a sepela a yo ja, a se hlwe a bonagala a tshwenyegile.” (1 Sam. 1:18) The Jerusalem Bible e balega ka gore: “Sefahlego sa gagwe se ile sa se sa bontšha go nyama.” Hanna o ile a ikwa a imologile. Ka tsela e itšego, o ile a lahlela morwalo wa gagwe o boima go motho yo mongwe yo a bego a le matla kudu go mo feta, e lego Tatagwe wa legodimong Jehofa. (Bala Psalme 55:22.) Na go na le bothata bjoo bo ka Mo imelago? Aowa, le ka mohla Jehofa ga a palelwe ke selo!

¹⁶ Ge re ikwa re imelwa ke manyami, go kaone gore re latele mohlala wa Hanna gomme re bolele ka bolokologi le Yoo Beibele e mmitšago “Mokwi wa thapelo.” (Ps. 65:2) Ge e ba re dira bjalo ka tumelo, le rena re ka lemoga gore manyami a rena a tšeelwa legato ke “khutšo ya Modimo yeo e fetago kwešišo yohle ya batho.”​—Bafil. 4:6, 7.

17, 18. (a) Elikana o ile a bontšha bjang gore o be a thekga keno ya Hanna? (b) Penina o ile a felelwa ke maano afe a go hlohla Hanna?

¹⁷ Mesong e latelago, Hanna o ile a boela taberenakeleng le Elikana. O swanetše go ba a be a boditše monna wa gagwe ka kgopelo ya gagwe le keno ya gagwe, ka gobane Molao wa Moshe o re monna o be a na le tshwanelo ya go fediša keno yeo mosadi wa gagwe a e dirilego ntle le tumelelo ya gagwe. (Num. 30:10-15) Eupša monna yoo yo a botegago ga se a ka a fediša keno yeo. Go e na le moo, yena le Hanna ba ile ba rapela Jehofa ba le gotee taberenakeleng pele ba ka boela gae.

¹⁸ Penina o ile a lemoga neng gore o be a feletšwe ke maano a go hlohla Hanna? Pego ga e bolele selo ka taba yeo, eupša polelwana e rego, “a se hlwe a bonagala a tshwenyegile” e šišinya gore moya wa Hanna o ile wa kaonefala ga e sa le go tloga ka nako yeo go ya pele. Go sa šetšwe gore boemo e be e le bofe, go se go ye kae Penina o ile a lemoga gore boitshwaro bja gagwe bjo bobe bo be bo sa hole selo. Beibele ga se ya ka ya bolela ka leina la gagwe gape.

19. Hanna o ile a šegofatšwa bjang gomme o ile a bontšha bjang gore o be a tseba moo tšhegofatšo yeo e tšwago gona?

¹⁹ Ge dikgwedi di dutše di feta, khutšo ya Hanna ya monagano e ile ya feleletša ka go mo tlišetša lethabo le legolo kudu. O be a imile! Le ge a be a thabile, Hanna le ka mohla ga se a ka a lebala moo tšhegofatšo yeo e tšwago gona. Ge ngwana wa gagwe wa mošemanyana a belegwe, o ile a kgetha go mo reela leina la Samuele, leo le bolelago gore “Leina la Modimo,” e bile go molaleng gore le šupa taba ya go bitša leina la Modimo, bjalo ka ge Hanna a ile a dira. Ngwageng woo, ga se a ya le Elikana gotee le lapa ka moka Shilo. O ile a dula gae nywaga e meraro le ngwana wa gagwe go fihlela a tshwele. Ke moka o ile a itokišeletša letšatši leo ka lona a bego a tla kgaogana le morwa wa gagwe yo a rategago.

20. Hanna le Elikana ba ile ba phetha bjang seo ba bego ba se holofeditše Jehofa?

²⁰ Go kgaogana le morwa wa gagwe go swanetše go ba go be go se  bonolo. Ke therešo gore Hanna o be a tseba gore Samuele o be a tlo hlokomelwa gabotse kua Shilo, mohlomongwe a hlokomelwa ke ba bangwe ba basadi bao ba bego ba hlankela taberenakeleng. Le ge a be a tla hlokomelwa, e be e sa le yo monyenyane gore mmagwe a ka mo tlogela. Go dutše go le bjalo, Hanna le Elikana ba ile ba tliša mošemanyana yoo ba sa gapeletšwe eupša ba thabile. Ba ile ba neela dihlabelo ngwakong wa Modimo gomme ba tšea Samuele ba mo nea Eli, ba mo gopotša keno yeo Hanna a e dirilego moo nywaga pejana.

21. Thapelo ya Hanna go Jehofa e ile ya utolla bjang gore o na le tumelo e matla? (Bona le lepokisi leo le rego: “Dithapelo tše Pedi tše di Kgahlišago.”)

²¹ Ke moka Hanna o ile a rapela thapelo yeo Modimo a ilego a bona go le bohlokwa gore e ngwalwe ka Lentšung la gagwe le le buduletšwego. Ge o dutše o bala mantšu a gagwe ao a begilwego go 1 Samuele 2:1-10, o tla lemoga gore lentšu le lengwe le le lengwe le bontšha gore o na le tumelo e matla. O ile a reta Jehofa ka ge a dirišitše matla a gagwe ka tsela e kgahlišago​—ka bokgoni bja gagwe bjo bo sa bapišwego bja go kokobetša baikgogomoši, bja go šegofatša bao ba gateletšwego le bja go fediša bophelo goba gaešita le go bo phološa lehung. O ile a reta Tatagwe ka bokgethwa bja gagwe bja moswananoši, toka le potego ya gagwe. Hanna o be a na le lebaka leo le kwagalago la go bolela gore: “Ga go leswika leo le etšago Modimo wa rena.” Jehofa ke yo a ka botwago e le ka kgonthe, ga a fetoge le gona ke setšhabelo sa bohle bao ba gateletšwego bao ba tsomago thušo go yena.

22, 23. (a) Re ka kgodišega bjang gore Samuele o gotše a tseba gore batswadi ba gagwe ba a mo rata? (b) Jehofa o ile a tšwela pele a šegofatša Hanna bjang?

²² Ka ntle le pelaelo Samuele yo monyenyane o be a na le tokelo ya go ba le mma yo a nago le tumelo go Jehofa. Gaešita le ge a ile a mo hlologela ge a be a dutše a gola, ga se a ka a ikwa a lebetšwe. Ngwaga le ngwaga, Hanna o be a eya Shilo, a mo tlišetša seaparo sa  go hloka matsogo sa go hlankela taberenakeleng. Moroko o mongwe le o mongwe wa sona o be o bonagatša gore o rata morwa wa gagwe e bile o a mo hlokomela. (Bala 1 Samuele 2:19.) Re ka akanya a apeša mošemanyana yoo seaparo sa gagwe se sefsa gomme a mo lebelela ka lerato ge a dutše a bolela mantšu a botho le a kgothatšago. Samuele o be a šegofaditšwe ka go ba le mma yo bjalo gomme o ile a gola a ba tšhegofatšo go batswadi ba gagwe le go Baisiraele ka moka.

²³ Ge e le Hanna, le yena ga se a ka a lebalwa. Jehofa o ile a mo šegofatša ka bana ba bangwe gomme a belegela Elikana bana ba bangwe ba bahlano. (1 Sam. 2:21) Lega go le bjalo, mohlomongwe tšhegofatšo e kgolo ya Hanna e be e le tswalano ya magareng ga gagwe le Tatagwe Jehofa, yeo e ilego ya matlafala kudu ge nywaga e dutše e eya. Eka le wena o ka diragalelwa ke se se swanago ge o dutše o ekiša tumelo ya Hanna.