Psalme 55:1-23
Ditaelo tšeo di yago go mohlahli: Diriša diletšo tša metato. Maskile.* Koša ya Dafida.
55 Theetša thapelo ya ka hle Modimo.O se ke wa ntlhokomologa ge ke go kgopela gore o nkwele bohloko.
2 Ke kgopela o ntheetše gomme o nkarabe.
Dilo tšeo di ntshwenyago di dira gore ke se dudišege,E bile ke ferekane
3 Ka baka la ge manaba a ka a ntšhošetšaLe ka baka la ge batho ba babe ba nkweša bohloko.
Ka gobane ba mpakela mathata a magolo,E bile ba ntshwere gampe ka gobane ba ntlhoile.
4 Pelo ya ka e kwa bohloko kudu,E bile ke tšhogile ka gobane ke tšhaba go hwa.
5 Ke a boifa e bile ke tšhogile,Gomme ke a thothomela.
6 Ke dula ke re: “Nkabe ke na le diphego tša go swana le tša leeba,
Ke be ke tla fofa gomme ka ya ka dula lefelong leo le šireletšegilego.
7 Ke be ke tla fofela kgole,
Gomme ka ya ka dula lešokeng. (Selah)
8 Ke be ke tla tšhabela lefelong leo le šireletšegilego,Ke tšhabela phefo e matla le ledimo.”
9 Dira gore batho ba babe ba gakanege hle Jehofa le gore maano a bona a se ke a atlega,Ka gobane ke bone batho ba elwa e bile ba dira dilo tše šoro motseng.
10 Ba dikologa maboto a motse woo bošego le mosegare.Motseng woo go dirwa dilo tše mpe le badudi ba moo ke ba babe.
11 Go tletše mathata feela.Mebarakeng go na le bofora e bile batho ba a gatelelwa.
12 Ge e ba lenaba le be le ka nkwera,Ke be ke tla kgotlelela.
Ge e ba lenaba le be le ka ntlhasela,Ke be ke tlo ikuta.
13 Eupša ke wena o ntshwerego ka tsela ye,Wena mogwera wa ka yoo ke mo tsebago gabotse.
14 Re be re le bagwera ba bagolo kudu.Re be re fela re sepela le lešaba re eya ntlong ya Modimo.
15 Anke manaba a ka a fedišwe!
Anke a bolokwe a sa phela,*Ka gobane a tlwaetše go dira dilo tše mpe e bile a dula a nagana ka tšona.
16 Ge e le nna ke tla bitša Modimo.Jehofa yena o tla mphološa.
17 Ke dula ke tshwenyegile e bile ke fegelwa go tloga mesong go fihlela le dikela,Ke moka Modimo yena o a nkwa ge ke mo rapela.
18 O tla mphološa a ba a ntamolela go bao ba lwago le nna,Ka gobane ba lwa le nna e le ba bantšhi.
19 Modimo yo a dutšego sedulong sa bogoši go tloga kgaleO tlo nkwa gomme a lwa le bona. (Selah)
Bao ba sa boifego Modimo,Ba tlo gana go fetoga.
20 Mogwera wa ka o hlanogetše bagwera ba gagwe,A se dire seo a ba tshepišitšego sona.
21 Mantšu a gagwe a boreledi go feta potoro,Eupša pelong ya gagwe o nyaka go itefeletša.
Mantšu a gagwe a boleta go feta makhura,Eupša a swana le tšhoša e bogale.
22 Lahlela maima* a gago go Jehofa,Gomme yena o tla go thekga.
Le ka mohla a ka se dumelele moloki gore a we.
23 Eupša wena Modimo, o tla lahlela batho ba babe moleteng wa go iša fasefase.
Bao ba nago le molato wa madi le bofora ba tlo hwa ka pela.
Eupša ge e le nna, ke tshepile wena.
Mengwalo ya tlase
^ Bona Tlhaloso ya Mantšu.
^ Phetolelo ya lentšu ka lentšu e re, “a theogele Lebitleng.” Bona Tlhaloso ya Mantšu.
^ Goba, “mathata.”
