Salmu 19:1-14
Wa muhooleli a macipo. Salmu a Tavite.
19 Sa wirimu sinnalaleya ncicimiho na Muluku,Iho sinnalaleya* muteko wa matata anyu.
2 Nihiku ti nihiku masu aya annayeeheya ntoko maahi;Nave ohiyu ti ohiyu sinnuupulula masuwelelo.
3 Iho hasinaloca, nave hiyaavo masu;Nsu naya hinniiweya.
4 Nto oruma waaya* woophiya veelaponi yoothene yavathi;Nave michaka saya, soophiya weiwo elapo ekotenlaayawo,Owo oomaka musakala ntakhara nsuwa wirimu.
5 Nenlo nri ntoko mulipa oothela onakhuma mu empa awe;Nave ninnahakalala ntoko mulopwana akuru onachimaka mu ephiro awe.
6 Ninnakhuma orweela weiwo erimu ekotenlaayawo,Nave ninnarukurerya ophiyerya makupa makina weiwo erimu ekotenlaayawo;Nave hiyaavo echu emoharu mano ehinaphwanyiwa ni oviha waya.
7 Nlamulo na Yehova ti noophaameya, ninnakookiherya ikuru;Sawuupuxerya sa Yehova ti soororomeleya, sinnamweeriha muchu oohisuwela okhala amiruku.
8 Malamulo a Yehova tawookololowa, annahakalaliha murima.
Malamulo a Yehova taweela, annamwaleela miitho.
9 Omoova Yehova ti waweela, onniikhalelaru okhala wookhala.
Mathorihelo a Yehova teeparipari, awookololowa mmikhalelo soothene.
10 Tasisapoxa ompwaha ooru,Ompwaha ooru awaaca oorehereryiwa phaama;Nave toosivaxa opwaha enuwi,* enuwi enaconya mmahavuni.
11 Moorweela wa yaawo, mulapeli anyu onnalopoliwa;Nookhalavo nchuwelo ntokweene mu okhapelela yaawo.
12 Taani onawerya osuwela soohesa sa yoowo mwaneene?
Mukeere oohikhalano nthowa wa soocheka seiho kinapakaaka moohisuwela.
13 Mukihiihe weerano ichu mwawiirumiha;Muheemererye wi iho sikivoothe.
Vano nto kinamukhala awookololowa,Ni oohikhalano nthowa wa soocheka itokotoko.*
14 Masu a mwaano mwaka ni wuupuwelela wa murima akaSoohakalalihekeeni nyuwo, khwoo Yehova, Mwala aka ni Moopoli aka.
Inoota
^ Naari: “Mannuwelo annalaleya.”
^ Naari akhweya: “mukoi aya woophimano.”
^ Naari: “oravo; eseera.”
^ Naari: “soocheka sawaaca.”
