Muluku eeparipari ti mPatuxa a ichu soothesene. Owo haanono mapacereryo nave harwa akhalano makuchuwelo. (Salmo 90:2) Owo Ehime ya michaka yaphaama enaphwanyeya mPiipiliyani. (1 Timoteo 1:11) Vawoona wi Muluku tonivanhe okumi hiyaano nnaphwanela omulapela yoowo pahiru.​—Mwaalakhanye Yawupulula 4:11.

Haavo muchu omoonne Muluku nthowa nawi owo ti Munepa, ela enataphulela wi owo orino okumi otokotoko opwaha okumi wa soopatuxiwa sa mwiili wanama sinakhala veelaponi ya vathi. (Yohane 1:18; 4:24) Naamwi eri hiihaa, hiyaano nnanwerya osuwela mikhalelo sa Muluku moorweela wa ichu opankeiye. Ntoko yawooniherya, sawiima ni ithutu soohiyanahiyana sinnooniherya osivela ni miruku sawe. Winnuwa wa elapo onnooniherya ikuru sawe.​—Mwaalakhanye aRoma 1:20.

Hiyaano poti ohuserya ichu sincipale vooloca sa mikhalelo sa Muluku moorweela wa omwaalakhanya Piipiliya. Owo onnanleela tiheeni Muluku onachuneiye ni yeeyo ohinachuneiye, moota wa waahoolela achu, ni saweera sawe mmakhalelo oohiyanahiyana.​—Mwaalakhanye Salmo 103:7-10.

Yesu aarie: “Atithihu a wirimu, nsina nanyu nélihiwe.” (Mateyu 6:9) Naamwi Muluku arino masina a ncicimiho mancipale, owo orino nsina nimoharu. Mu elocelo eri yoothene, moota wa oromola nsina nlo ti woohiyana. Mu eLomwe nla nnaromoliwa “Yehova.” Nyenya achu akina anaromola “Yave.”​—Mwaalakhanye Salmo 83:18.

Mu aPiipiliya ancipale nsina na Muluku noovihiwamo nave nraceelihiwa ni masina a ncicimiho Muluku nari Apwiya. Nyenya  vaava Piipiliya aarempweiye, nsina na Muluku naanaphwanyeyamo ikwaha sawaacamela 7,000. Yesu aahisuweliha nsina na Muluku vaava aahusinheiye achu vooloca sa Muluku.​—Mwaalakhanye Yohane 17:26.

Moone exilema Apwanne Muluku Ookhalano Nsina?

Waacereryeya wa makacamiho onataphulela wi Yehova Muluku hananithokororya? Achu akina analoca wi owo onnanihooxa wi aneehe, nyenya ela tahi eparipari.​—Mwaalakhanye Yakobo 1:13.

Muluku omvaha muchu ekari ya othanla woochuna. Hiyaano ninnasivela okhala ootaphuwa othanla omurumeela Muluku. (Yosuwa 24:15) Nyenya achu ancipale anathanla oweerela akina ichu soonanara, nave achu ancipale annahooxeya. Yehova onnathanana woona meerelo yaawo oonanara.​—Mwaalakhanye Mapacereryo 6:5, 6.

Yehova Muluku onnanipwacha. Owo onchuna wi hiyaano nihakalale muukumini. Moohilekela, owo onahaala omaliha makacamiho ni yaale aneeriha. Vanonto, owo ookhalano nthowa naphaama na weemererya makacamiho mu elukuluku ya vakhaani. Va Yoohuserya 8, nnahaala ohuserya nthowa nenno.​—Mwaalakhanye 2 Petro 2:9; 3:7, 13.

Yehova onnaniveka wi nimwaacamele moorweela wa oloca ni yoowo mu nivekelo. Owo onnampwacha khata muchu a hiyo. (Salmo 65:2; 145:18) Owo ti oolevelela. Owo onnasuwela wiilipixerya wahu wi nimuhakalalihe, naamwi ilukuluku sikina nimuchekelaka. Hiihaa, naamwi nri achu oohiphaameya, hiyaano nnanwerya okhalano onthamwene waphaama ni Muluku.​—Mwaalakhanye Salmo 103:12-14; Yakobo 4:8.

Okhala wi Yehova tonivanhe okumi, nnaphwanela omusivela owo ompwaha muchu ori oothene. (Marko 12:30) Vaava munooniheryaanyu omusivela wanyu Muluku moorweela wa ohuserya ichu sincipale vooloca sa yoowo ni weera yeeyo owo onakhweleiye, nyuwo munahaala omwaacamela owo phaama.​—Mwaalakhanye 1 Timoteo 2:4; 1 Yohane 5:3.