Mpatuxa ahu ti amirukuxa onipwaha hiyaano. Sintoko Tiithi oosivela, owo onnanthokororya hiyo. Owo tho hatonko ochuna wi hiyaano nikhale awiilamulela meekhihu. (Yeremiya 10:23) Hiihaa, ntoko mwaana mukhaani onachuna ohooleliwa ni asitiithi awe, oothene hiyo ninnachuna ohooleliwa ti Muluku. (Yesaya 48:17, 18) Malakiheryo a Piipiliya ti ohoolela ori yamahala enarweela wa Muluku.​—Mwaalakhanye 2 Timoteo 3:16.

Malamulo ni malakiheryo a Yehova annanihusiha mukhalelo wa okumi waphaama hiihaano nave annooniherya moota wa ophwanya mareeliho oohimala muhoolo. Woona wi Muluku tonipatunxe, ori woophwanelela ochariha ohoolela wawe.​—Mwaalakhanye Salmo 19:7, 11; Yawupulula 4:11.

Malakiheryo a Piipiliya ti mathipelo a iparipari. Nyenya, malamulo poti opakiwa nthowa na soophacuwa. (Malamulo 22:8) Hiyaano nnaphwanela opharihela muteko muupuwelo ahu wi niiwexexe ti mwawiihai nlakiheryo nnavarihanaaya ni mwaha woophacuwa. (Masiposipo 2:10-12) Ntoko yawooniherya, Piipiliya onahusiha wi okumi ti yamahala enarweela wa Muluku. Nlakiheryo nla, poti onihoolela omutekoni, owaani, ni mmukwahani. Nla ninnanikhaviherya okhala phoole phoole ni okumi ahu.​—Mwaalakhanye Saweriwa Tarummwa 17:28.

Yesu aaloca sa malakiheryo meeli matokotoko. Noopacerya ninnuupulula yookhwela ya okumi wa achu​—omusuwela Muluku, omusivela yoowo, ni  omurumeela yoowo moororomeleya. Nlakiheryo noopacerya nla nnaphwanela ophariheliwa muteko mu soothanla sahu soothene. (Masiposipo 3:6) Yaawo anakhala mwawiiwanana ni nlakiheryo nla aakhalano onthamwene ni Muluku, ohakalala weeparipari ni okumi woohimala.​—Mwaalakhanye Mateyu 22:36-38.

Nlakiheryo nanawiili poti onihoolela okhalano waataana wa murecele ni akina. (1 aKorinto 13:4-7) Ochariha nlakiheryo nanawiili nla onakhweleya otakiherya moota wa Muluku onaweereleiye achu.​—Mwaalakhanye Mateyu 7:12; 22:39, 40.

Malakiheryo a Piipiliya annahusiha imusi moota wa okhala awiiwanana moorweela wa osivela. (aKolose 3:12-14) Masu a Muluku annakhapelela tho imusi moorweela wa ohusiha nlakiheryo nikina​—othela onaphwanela okhala wawiikhalelaru.​—Mwaalakhanye Mapacereryo 2:24.

Moorweela wa ochara mahusiheryo a Piipiliya ennanikhaviherya okhala phaama mmwiilini ni mmuupuweloni. Ntoko yawooniherya, apatarau wiiliwiili anaakhwela anamalapa anakhala mwawiiwanana ni malakiheryo a Piipiliya a ororomeleya ni olapa moolipiherya. (Masiposipo 10:4, 26; aHebri 13:18) Masu a Muluku tho annanihusiha okhala oohakalala ni ichu sookhweleya ni ocicimiherya onthamwene ni Muluku opwaha ichu soomwiilini.​—Mwaalakhanye Mateyu 6:24, 25, 33; 1 Timoteo 6:8-10.

Ochariha malakiheryo a Piipiliya poti okhapelela okumi ahu. (Masiposipo 14:30; 22:24, 25) Ntoko yawooniherya, wiiwelela nlamulo na Muluku vooloca sa ohapaliwa ennanikhaviherya osepa ireca sawiipha ni ophoreya. (Masiposipo 23:20) Yehova onneemererya owurya soohapala nyenya mwa mphimo. (Salmo 104:15; 1 aKorinto 6:10) Malakiheryo a Muluku ennanikhaviherya moorweela wa onihusiha okhala ni ephoole ohiya mu saweera sahu pahiru nyenya tho mawuupuwelo ahu. (Salmo 119:97-100) Nyenya aKiristu eeparipari haniiwelela malamulo a Muluku nthowa na wiiphwanyerya mukhataaya pahiru. Awo aneerano mwawihiihaa wi emucicimihe Yehova.​—Mwaalakhanye Mateyu 5:14-16.