Tiyaku 1:1-27
1 Miyaano Tiyaku, kapuro a Muluku ni a Apwiya Yesu Kristu. Kinnoorepelaani nyuwo mahimo khumi napiili, mmwalamwalenle wa maloko:
Mooni!
2 Asinnaka, mooneke okhala echu yoohakalalihaxa, vaavaa munahoolelaanyu soohooxa soohiyanahiyana,
3 woona wi munnasuwela wi weehiwa wa nroromelo nanyu, onnaruuha ovilela.
4 Nyenya muhiye wi ovilela waakhwanihe muteko aya, wi mukhale awaakhwanela ni aweela mmikhalelo soothene, ehikhanlevo echu enoohalelaani.
5 Mwawiihiiha, mukina a nyuwo athoiwa miruku, atitelele omveka Muluku, owo onarwa avahiwa. Woona wi Muluku onnavaha ni murima woothene, ahikhalenle nrima.*
6 Nto atitelele oveka ni nroromelo, ahikhwaaka minikwa, ntakhara yoole onakhwa minikwa onalikana ni ncumuxa na mphareya, nenlo nnakuxiwa ti echeku nikerihiwaka wu ni wu.
7 Chiryene, muchu ntoko yoowo ahiweherye waakhela echu yoorweela wa Yehova;
8 owo muchu a mirima miili, oohilipalipa mu iphiro sawe soothene.
9 Nyenya munna awiiyeviha ahakalaleke* nthowa na ocicimihiwa wawe ni Muluku,
10 nave muchu a muhakhu ahakalaleke* nthowa na oyevihiwa wawe; woona wi onarwa anyaala ntoko ethutu ya mutakhwani.
11 Hiiha ntoko nsuwa nnoopaaya nruuhaka oviha, nnyaalihaka munyepu, nave ithutu saya simora ni ophwaneliwa waya orimeela, hiihaa tho muchu a muhakhu onarwa arimeela mu waavya wawe muhakhu.
12 Oohakalala muchu yoowo onatitelela ovilela mu saweeha, woona wi akhumelela phaama, onarwa amwaakhela korowa a okumi, yoowo Yehova aaroromelinheiye yaale anatitelela omusivela Yoowo.
13 Vaavaa muchu oneehiweiye, ahiloce ariki: “Kineehiwa ti Muluku.” Ntakhara Muluku hanawerya weehiwa ni ichu soonanara, naari mano owo hanamweeha muchu.
14 Nyenya muchu ti muchu oneehiwa moorweela wa ohuwelihiwa ni owokiwa* ni soochunachuna* sawe.
15 Hiihaa, soochunachuna* sinnuwa, sinnaruuha yoocheka* nave yoocheka yeeriwano, ennaruuha okhwa.
16 Annaka oosiveliwa, muhihuwelihiwe.
17 Yamahala yoothene yaphaama ni yoovaha yoothene yoophaameya enarwa wirimu, enakhuruwa wa Atiithi a mithiko soomwaleela, yaawo ahinatorokeya ntoko muuruxi.*
18 Yaari yoolakelela awe oniyara mwa masu eeparipari, wi nikhale ntoko yawiima ya mulepulo* wa soopatuxiwa sawe.
19 Annaka oosiveliwa, suwelani ela: Muchu ti muchu onaphwanela okhala awaakuvela owiriyana, nyenya oohaakuvela oloca, ni oohaakuvela onanariwa,
20 woona wi onanariwa wa muchu honaruuha wookololowa wa Muluku.
21 Mwawiihiiha, murihe soonanara ni sootakhala soothene* nave mweemererye mwawiiyeviha masu aaliwe mwa nyuwo, yaawo anawerya woovuluxaani.*
22 Nyenya mukhaleke aweerano masu, tahi awiiwaru ni wiiwoka aneene meekhiinyu ni muupuwelo watheru.
23 Tiwi, yoowo oniiwa masu, nto ahineerano, onalikana ni muchu onoona ethoi awe* va espeelyu.*
24 Ntakhara onniivarerya mukhateiye, nave apwahavo, onnacuwala mwawaakuveya okhala wawe.
25 Nto muchu yoowo onavarerya malamulo awaakhwanela, yaawo anataphula nave atitelela ochariha, onakhala muchu aweerano, nto ohiya wiiwa ni ocuwala mwawaakuveya; ola onarwa ahakalala mu soothene oneereiye.
26 Wakhala wi muchu onniiseera wi onnamulapa Muluku* nto ahinahiiha* nlumi nawe, oniiwoka mukhateiye mmurimani mwawe, nave omulapa wawe Muluku ti wa siiyo.
27 Omulapa Muluku* ori waweela ni waphaama vamiithoni va Muluku, Atiithi ahu ti wu: okhaviherya ikwaasuni ni anaamukhwele mu sookacamiha saya, ni otitelela ohikhalano nthepa na elapo.
Inoota
^ Naari: “ahinlihaka murima.”
^ Mu Ekriki, “iirumiheke.”
^ Mu Ekriki, “iirumiheke.”
^ Naari: “oheiwa vamuraakhoni.”
^ Naari: “minkhela.”
^ Naari: “minkhela.”
^ Mu Ekriki, “soochunachuna sarupala, sinnayara yoocheka.”
^ Naari: “wa yaawo hiwaamo muuruxi wa marukunuwelo.”
^ Naari: “yoopacerya.”
^ Naari akhweya: “ni waaca wa sootakhala.”
^ Naari: “ovuluxa okumi anyu.”
^ Naari: “owanoni wawe.”
^ Naari: “eweheryo.”
^ Naari: “onnavekela.”
^ Naari: “ahinamaka.”
^ Naari: “Malapelo.”
