1-3. ¿Toni ueyi tachiualis kiitak Pedro nejon tonal, uan toni ouijkayot kipanok nejon youak?

PEDRO kiuika ibarco ika miak chikaujkayot itech ueyiat tein poui Galilea uan tel tatayouayan. Ompa kiuejkaita se tanex. ¿Xe tanesitiya? At chikauak kiuiuiteki barco. Chikauak ejekat tein kitelixpipitsa kichiua maj at motelajkotatamota. Maski Pedro tel apachtik uan xojxokoltik, kisentoka mochikaua kiuikas barco.

² Maski iniuan moajsi oksekin imomachtijkauan Jesús itech barco, Jesús amo ompa yetok, porin mokauak atenoj. Nejon tonal, yejuan kiitakej keniuj ininTamachtijkauj kintamakak tel miakej taltikpakneminij ika sayoj seki pantsin uan seki amichimej. Yejua ika, taltikpakneminij kinekiaj kiixtaliskej kemej inintekiuaj. Sayoj ke yejua kiixtalij amo keman mokalakis itech inintaixyekanalis taltikpakneminij uan kinekia kinmachtis itatojtokakauan maj no ijkon kichiuakan. Yejua ika kincholuij uan kinnauatij itatitaniluan maj yakan itech barco uan maj ajsikan hasta oksekopa. Uan yejua iselti yaskia itech se tepet kichiuatiuj netataujtil (Mar. 6:35-45; xikonixtajtolti Juan 6:14-17).

³ Keman imomachtijkauan kisteujkej, metsti, tein chikaujtiyayaya, moajsia tatajko itech iluikak, sayoj ke axkan pankalaktokya kampa ika tonalkalakyampa. Maski tel uejkaujkejya, amo miak kilómetro kiuikakej barco. Amo ueli monojnotsaj porin mochikaujtokej kiuikaskej barco uan ejekat uan at tel chikauak kakistitok. Yejua ika Pedro xa tanemilijtok itech miak taman.

4. ¿Keyej Pedro techkauilia se tel kuali neskayot?

⁴ Panokya ome xiuit keman Pedro kiixmatik Jesús akin kayot Nazaret,  uan miak taman panokaya, yejua ika xa tanemilijtos itech nochi nejon. Maski miak taman kimatikya, moneki miak tamanok kimatis. Kineki mochiuas se tel kuali imomachtijkauj Cristo, uan yejua ika mochikaua amo omeyolouasok nion mouisok, uan ika nejon techkauilia tinochin se tel kuali neskayot. Maj tikitakan keniuj uelis techpaleuis.

5, 6. ¿Keniuj katka inemilis Pedro?

⁵ Pedro amo keman kielkauaskia tonal keman kiixmatik Jesús. Andrés, iikniuj, yejua akin kimatiltij nejin tel kuali tanauatil: “Tikajsikke ya ne Mesías”. Ika nejon tajtolmej, inemilis Pedro peuak mopata, uan amo keman yeskiaok kemej ipa (Juan 1:41).

⁶ Pedro nemia itech xolal Capernaum, tein moajsi kampa ika norte itech ueyiat tein poui Galilea. Nejin ueyiat kipia chipauakat. Pedro uan Andrés iniuan Santiago uan Juan, ikoneuan Zebedeo, kinkitskiayaj amichimej uan kinnamakayaj. Ichan Pedro uan inamik no nemiaj imonan uan Andrés. Amichkitskianij monekia yeskij chikaujkej, tel tekitinij uan monekia kuali kiixmatiskej nejon tekit uan ijkon ueliskia kintekipanoskej ininchankauan. Xa momattoyaj tatemojtoskej nochi youal, ika ome barco kitamotayaj uan kiajokuiaj matat uan ijkon kikixtiayaj amichimej tein kiajsiaj. Tekit kisentokaya hasta kualkan, porin ijkuak monekia kinpejpenaskej amichimej uan kinnamakaskej, uan no kichipauaskej matat uan kisajsaloskej.

7. ¿Toni kimatiltijkej Pedro, uan keyej katka tel kuali?

⁷ Biblia techiluia keniuj Pedro mochiuak itatojtokakauj Jesús. Kijtoua ke iikniuj Andrés katka imomachtijkauj Juan Taauijkej, yejua ika Pedro xa kikakia iikniuj ika miak pakilis keman ika kinojnotsaya Juan. Se tonal, Andrés kiitak keman Juan kinextij Jesús akin kayot Nazaret uan kijtoj nejin tajtolmej: “Xikitakan san, ne uitsa ya in tagatsin ten Dios kualtitanik ten tamati keme ichkatsin”. Nimantsin, Andrés mochiuak itatojtokakauj Jesús, uan kemej tel yolpaktoya, kitemoto Pedro uan kinauatito ke ejkokaya Mesías (Juan 1:35-41). Kemej naui mil xiujmej achto, keman mochiuak taixnamikilis itech xochital tein moajsia Edén, Jiova motenkaujka ke kititaniskia aksa akin kinmakixtiskia nochin taltikpakneminij (Gén. 3:15). Uan yejua nejin Temakixtijkej, Mesías akin moijtojka ualaskia, akin Andrés yekin kiixmatik. Keman Pedro kimatik, motaloj kiajsito.

8. ¿Toni kijtosneki tokayit tein Jesús kitalilij Pedro, uan keyej sekin kinemiliaj ke amo kinamikia ijkon motokaytis?

⁸ Hasta itech nejon tonal, Pedro sayoj kiixmatiaj kemej Simón. Sayoj ke, keman Jesús kiixmatik kiiluij: “Tejua ya ti Simón, de titekoneu de Jonás, pero nejua nimitstokaytia Cefas ten kijtosneki Pedro” (Juan 1:42). Tokayit “Cefas” kijtosneki “tet” oso “tepejxit” uan ika  nejin Jesús kinextijtoya tein satepan mochiuaskia. Xa kiitak ke Pedro yeskia kemej se tepejxit: se akin chikauak uan takuaujtamach akin tapaleuiskia itech nechikol maj chikauak inintakuaujtamatilis. Sayoj ke ¿no ijkon moitaya Pedro? Xa amo. Keman sekin kiixtajtoltiaj Evangelios, kijtouaj ke Pedro amo ijkon katka. Miakej hasta kinemiliaj ke katka se takat akin nochipa omeyolouaya uan kipapataya itanemilil.

9. ¿Keniuj techitaj Jiova uan Jesús, uan keyej moneki titakuaujtamatiskej kemej yejuan techitaj?

⁹ Kemaj, Jesús kuali kimatia tein Pedro ika tapolouaya. Sayoj ke, ijkon kemej Jiova, yejua nochipa kiitaya ininkualneskayouan taltikpakneminij. Yejua ika, kiitaya ke Pedro kipiaya miak kualneskayomej, uan kinekia kipaleuis maj okachi kuali kinextiani. Itech nejin tonalmej, Jiova uan Jesús no kiitaj tokualneskayouan. Sayoj ke ¿toni uelis tikchiuaskej komo tiknemiliaj ke amo keman uelis techitiliskej se kualneskayot? Komo ijkon, moneki titakuaujtamatiskej kemej yejuan techitaj uan maj timokauakan maj techmachtikan uan maj techixyekanakan kemej kichiuak Pedro (xikonixtajtolti 1 Juan 3:19, 20).

10. ¿Toni tachiualismej xa kiitak Pedro, sayoj ke toni tekit oksepa peuak kichiua?

¹⁰ Satepan ke kiixmatik Jesús, Pedro xa iuan nentinemikok seki tonalmej. Yejua ika, xa kiitak yekinika ueyi tachiualis tein kichiuak keman at kikepak vino itech se nenamiktilis itech xolal Caná. Uan tein okachi moneki, kikakik keman Jesús kiteixmatiltiaya iTekiuajyo Dios. Sayoj ke, satepan kikauak uan oksepa peuak kichiua tekit tein achto kipiaya: kinkitskiaya amichimej uan kinnamakaya. Seki metsti satepan, Pedro oksepa iuan moajsik Jesús, uan ijkuak kiyoleuak maj okachi tonalmej iuan tanojnotstinemi.

11, 12. 1) ¿Toni kipanok Pedro nejon youak keman kintemojtoya amichimej? 2) Keman kikaktoya Jesús, ¿toni xa motajtaniaya Pedro?

¹¹ Se youal achto ke oksepa iuan moajsiskia Jesús, Pedro amo kinajsik amichimej. Yejua uan itekitikaikniuan miakpa kitamotkej matat aijtik uan keman kiajokuiaj amo teyi kipiaya. ¿Kani yetoyaj amichimej? Kemej Pedro tel kuali kiixmatia nejon tekit, xa miakkan kikajkauak matat. Kemej panoua keman se amichkitskijkej amo teyi kiajsi, xa kinekia tachias tatampa itech nejon at tein moyaujtoya uan ijkon kinajsis miak amichimej, uan xa hasta kinekia kichiuas maj kalakikan itech matat. Komo sayoj yejua nejon kinemilijtoskia xa okachi amo kuali momachiliskia. Pedro amo sayoj kintemouaya amichimej porin ika moixpetaniaya, ta porin ika kinixpanoltiaya ichankauan. Satepan, kemej amo teyi kiajsik, mokepak atenoj uan peuak kichipaua imatauj. Uan yejua nejon kichiujtoya keman ejkok Jesús.

¹² Iuan Jesús ualayaj miakej taltikpakneminij akin kinekiaj kikakiskej  itamachtilisuan. Kemej tel miakej katkaj, tejkok itech ibarco Pedro uan kiiluij maj youi tepitsin itech at. Ompa kuali mokakiskia itajtol porin at tapaleuiskia. Ijkon kemej akin yetoyaj atenoj, Pedro kikakia ika miak pakilis. Ueliskia panos miak hora kikaktos Jesús tajtojtok ika iTekiuajyo Dios, tein nochipa ika tanojnotsaya. Xa kinemiliaya ke yeskia se ueyi tatiochiualis noyampa kiteixmatiltis nejin kuali tanauatilmej iuan Cristo. Sayoj ke ¿yeskia taixejekol maj kinemili ke ueliskia kipaleuis Cristo itech tanojnotsalis? ¿Keniuj kinixpanoltiskia ichankauan? Xa kielnamikia ke amo teyi kiajsik se youak achto (Luc. 5:1-3).

13, 14. ¿Toni mouiskatekit kichiuak Jesús tein ika kipaleuij Pedro, uan keniuj tanankilij Pedro?

¹³ Keman Jesús tamitajtoj, kiiluij Pedro: “[Xikuika] nijin mobarco nepa kampa kachi auejkatan. Uan ompa xikintamotakan namoatarrayas para ijkon nankinkitskiske in pescados”. Maski Pedro omeyolouaya, kinankilij: “Tamachtijke, tejuan titekititokke nochi youal ya, uan ayamo timinajxiliaj pescados. Pero tejua motanauatil, kuali uelis tiktamotaske toatarrayas”. Tein melauj, xa amo kinemiliaya oksepa kitamotas matat porin yekin kichipaujka, uan no nejon hora amo onkayajok amichimej. Maski ijkon, kitakamatik uan xa kiniluij takamej akin moajsiaj itech okse barco maj kitojtokakan (Luc. 5:4, 5).

¹⁴ Keman peuak kiajokuij matat, Pedro uan okseki takamej kimachilijkej ke etiak. Amo ueliaj kineltokayaj nejon. Ompa kitilankej ika okachi chikaualis uan kiitakej ke kinajsikaj tel miak amichimej. Nimantsin, kinnotskej okseki amichkitskianij akin moajsiaj itech okse barco maj kinpaleuikan. Katkaj tel miak amichimej uan amo akiaj itech ome barco uan kemej tel etik katka hasta pankalakisnekiaj. Pedro amo uelia kineltokaya, porin maski miakpaya kiitaka ichikaualis Cristo, nejin tein mochiuak kipaleuij yejua uan ichankauan. ¡Moajsia iixpan se takat akin uelia kichiuaya maj amichimej kalakikan itech matat! Kemej Pedro peuak momoujtia, motankuaketsak iixpan Jesús uan kiiluij: “Notekotsin, ximosekokaua de nejua, porin nejua nitajtakole”. Moyekita ke Pedro kimachiliaya ke amo kinamikia yetos iuan Mesías, akin Dios kimakaka tanauatil maj kitekitilti ichikaualis (xikonixtajtolti Lucas 5:6-9).

15. ¿Keniuj Jesús kimachtij Pedro maj amo omeyoloua uan maj amo moui?

¹⁵ Sayoj ke Jesús kiyemankailuij: “Amo [ximoyolmoujti] porin nikan para taixpan nimitsnextiliti de keniu tikintemojtinemis tagayot para ma nechtakamatikan” (Luc. 5:10). Itech nejon hora amo  monekia omeyolouas oso mouis, porin Jesús kiyoleujtoya maj tapaleui itech se tekit tein kinpaleuiskia tel miakej taltikpakneminij. Pedro amo monekia tatanemilijtos keniuj kinixpanoltiskia ichankauan. Amo no monekia motekipachojtos itech toni amo uelia kichiuaya oso tein ika tapolouaya. Uelia takuaujtamatia ke Dios akin Jesús kitekitiliaya, kinextia “ueyi netapojpoluilis” (Is. 55:7). Uan no uelia kiyekmatia ke Jiova kipaleuiskia maj kinixpanolti ichankauan uan maj tanojnotsa (Mat. 6:33).

16. ¿Toni kichiujkej Pedro, Santiago uan Juan keman Jesús kinyoleuak maj kitojtokakan, uan keyej tikijtouaj ke kichiujkej tein okachi kuali?

¹⁶ Pedro niman kitakamatik Jesús uan no ijkon kichiujkej Santiago uan Juan. Biblia kijtoua ke “kikauteuke ninbarcos uan yajke kitoktilijke Jesús” (Luc. 5:11). Moyekita ke Pedro kichiuak tein okachi kuali:  takuaujtamatis iuan Jesús uan iuan Dios akin kiualtitanik. Itech nejin tonalmej, tokniuan kinextiaj nejon takuaujtamatilis keman amo omeyolouaj nion mouij porin kitemouaj okachi kitekitiliskej Jiova. Yejuan no ueli takuaujtamatij ke yejuatsin nochipa kinyekpias (Sal. 22:4, 5).

17. ¿Toni kiitaka Pedro itech ome xiuit tein panokaya ijkuak kiixmatik Jesús?

¹⁷ Maj oksepa ika titajtokan tein tikitakej itech ipeujyan nejin tamachtilis. Panokya ome xiuit keman Pedro kiixmatik Jesús. Yejua uan okseki tatitanilmej ika miak chikaualis kiuikatokej barco itech ueyiat tein poui Galilea; tayouayan uan mochiujtok se tetsauit. Amo ueli tikmatij toni kinemilijtok Pedro, sayoj ke miak taman uelis kielnamikis. Kiitakya miak mouiskatekimej tein Jesús kichiuak. Kemej neskayot, keman imonan kokolispeuak, kiitak keniuj Jesús kipajtij. No kikakik itamachtilisuan, kemej tein kitemakak itech se tepet. Ika nochi nejin, Pedro ueli takuaujtamati ke Jesús yejua Mesías, akin Jiova kiixpejpenak. Ijkon kemej panouayaj tonalmej, Pedro kimatik keniuj amo omeyolouasok nion mouisok. Yejua ika, Jesús kiixpejpenak maj mochiua semej 12 itatitaniluan. Sayoj ke, kemej tikitaskej satepan, yejua kimatiskia ke kisentokaya mouia uan omeyolouaya.

18, 19. 1) ¿Toni kiitak Pedro itech ueyiat tein poui Galilea? 2) ¿Toni kichiuak Jesús keman Pedro kitajtanij maj no nejnemi aixko?

¹⁸ Panouaya eyi hora kualkan sayoj ke ayamo tanesi. Pedro kiuejkaita ke se teisa moolinia aixko. Kemej kineki kimatis toni, momaseuia uan moketsa. ¿Xe monextijtok metsti itech at tein moajkotamottok? Amo, ta moita se teisa tein kisentoka nejnemi. Keman kuali kiixajsi amo ueli kineltoka tein kiitstok: ¡se takat ualajtok aixko uan panoti kampa ika yejuan yetokej! Tatitanilmej momoujtiaj uan kinemiliaj ke kiitstokej se ejekat. Sayoj ke takat kiniluia: “Ximoyolchikauakan porin Nejuatsin ya ni Jesús, amo ximomoutikan” (Mat. 14:25-28).

¹⁹ Pedro tanankilia: “Totekotsin, komo melau Tejuatsin, xikchiua ke ma no niueli ninejnemi aixko para nimitsajsitiu”. Ika miak yolchikaualis uan yolpakilis porin kiita nejon ueyi tachiualis, no kineki nejnemis aixko uan ijkon okachi kichikauas itakuaujtamatilis. Jesús ika miak pakilis kiiluia maj kiajsiti. Pedro amo ojpa kinemilia, pantemoua uan peua tajtaksa itech at tein mauiltijtok. ¿Ueli tikonnemilia tein kimachilia keman kiita ke amo pankalaki? Xa kitelmoujkaita uan peua tajtaksa kiajsiti Jesús. Sayoj ke niman kitekipachoua se taman (xikonixtajtolti Mateo 14:29).

20. 1) ¿Toni ika tapoloj Pedro, uan toni kipanok? 2) ¿Toni tajtolmej Jesús kiiluij Pedro?

²⁰ Keman kiita ke ueyi itakuaujtamatilis Pedro, Jesús kitekitiltia ichikaualis Jiova uan kipaleuia maj nejnemi itech at tein  moajkotamottok. Pedro moneki tachixtiyas itech Jesús; sayoj ke itech nejin hora, kichiua okse taman. Biblia kijtoua ke keman kiitak keniuj “chikaukaejekaya, ijkuakon peuak momoutia”. Keman Pedro kiita ke ueyiat ixmoyauak uan at kiuiuiteki barco, motelmoujtia. Xa kinemilia ke pankalakiti uan moaeltsimiti. Keman momoujtia, poliui itakuaujtamatilis, uan Pedro, akin Jesús kitokaytijka “tepejxit” porin kiitaya ke chikauak yeskia, amo kinextia nejon. Maski tel kuali ajkui, kimachilia ke amo uelis momakixtis iselti uan peua motsajtsilia: “Notekotsin, xinechpaleui uan xinechmakixti”. Nimantsin Jesús kimakitskia uan kipankixtia. Keman ijkatokejya aixko, kiiluia nejin tajtolmej: “Tejua tagatsin, semi tepitsin san tikpia motakuautamatilis. ¿Keye amo tiyektakuautamati[k] nouan?” (Mat. 14:30, 31).

21. ¿Keyej semi tamouilil maj tiomeyolouakan, uan toni uelis tikchiuaskej?

²¹ ¡Tel kuali tein techmachtia nejin tajtolmej! Semi tamouilil maj tiomeyolouakan, porin nejin uelis techijtakos. Komo tiksentokaj tiomeyolouaj amo semi titakuaujtamatiskej uan ejkos tonal keman senkis tikpoloskej totakuaujtamatilis. Yejua ika moneki tikixtaliskej amo tiomeyolouaskej nion timouiskej. ¿Keniuj tikchiuaskej? Maj titanemilikan kemej moneki. Okachi tiomeyolouaskej komo titanemiliaj itech tein uelis techmoujtis, tein techkuilis toyolpakilis oso tein kichiuas maj amo tiktojtokakan Jiova uan Jesucristo. Sayoj ke komo titanemiliaj itech Dios uan iKonetsin, itech nochi tein kichiujkejya, tein kichiujtokej uan tein kichiuaskej ininka akin kintasojtaj, okachi amo tiomeyolouaskejok.

22. ¿Keyej Pedro techkauilia se tel kuali neskayot?

²² Pedro kitojtoka Jesús keman youi tejkoti itech barco. Keman tejko, kiita ke tetsauit tamikya. Ueyiat tein poui Galilea oksepa tamatiak. Pedro uan okseki tatitanilmej kimoujkaitaj uan kijtouaj: “Yek melau Tejuatsin tion Tekonetsin de Dios” (Mat. 14:33). Keman okachi tanesi, Pedro xa moteltasojkamati. Nejon youak kimatik keniuj amo omeyolouasok nion mouisok uan takuaujtamatis okachi iuan Jiova uan Jesús. Sayoj ke kipolouaya kimatisok miak taman uan ijkon yeskia nejon tapaleuijkej tein Jesús achto kijtojka. Maski ijkon, kiixtalij kisentokas mochikaujtos. Uan tejuan, ¿no ijkon tikixtalijtokej tikchiuaskej? ¡Se tel kuali neskayot ika takuaujtamatilis techkauilij Pedro!