သမ္မာကျမ်းစာက ဘဝပုံစံတွေကို ပြောင်းလဲပေးနိုင်
ကျွန်မ မသေချင်ဘူး
-
မွေးဖွားတဲ့နှစ် ၁၉၆၄
-
နေရင်းနိုင်ငံ အင်္ဂလန်
-
ဘဝနောက်ခံ ထင်ရာစိုင်းတဲ့ ဆယ်ကျော်သက်အရွယ် မိခင်
အတိတ်
အင်္ဂလန်နိုင်ငံ၊ လန်ဒန်မြို့ရဲ့ လူနေထူထပ်တဲ့ ပက်ဒင်းတန်မြို့နယ်မှာ ကျွန်မကို မွေးဖွားခဲ့တယ်။ အဲဒီမှာ အမေ၊ အစ်မသုံးယောက်နဲ့အတူ နေထိုင်တယ်။ အဖေကတော့ အရက်သမားဆိုတော့ ကျွန်မတို့နဲ့ အတူနေလိုက်၊ မနေလိုက်ပဲ။
ကျွန်မငယ်ငယ်တုန်းက ညတိုင်းဆုတောင်းတတ်အောင် အမေသင်ပေးတယ်။ ဆာလံကျမ်းတစ်ကျမ်းတည်းပါတဲ့ ကျမ်းစာအုပ်အသေးလေး ကျွန်မမှာရှိတယ်။ အဲဒီကျမ်းစာသားတွေကို သီဆိုလို့ရအောင် ကျွန်မ သံစဉ်ထည့်ထားတယ်။ ကျွန်မဖတ်ခဲ့တဲ့ စာအုပ်တစ်အုပ်ထဲက စာကြောင်းတစ်ကြောင်းကို စိတ်ထဲမှာစွဲနေတယ်။ “တစ်နေ့ကျရင် မနက်ဖြန်ဆိုတာ ရှိတော့မှာမဟုတ်ဘူး” တဲ့။ အဲဒီစကားတွေကြောင့် အိပ်မပျော်နိုင်ဘဲ အနာဂတ်အကြောင်း စဉ်းစားမိတယ်။ ‘ဘဝဟာ ဒီထက်ပိုပြီး အဓိပ္ပာယ်ရှိရမယ်။ မရှိရင် အသက်ရှင်နေတာ ဘာအတွက်လဲ’ လို့ တွေးမိတယ်။ ကျွန်မ မသေချင်ဘူး။
မှော်ပညာကို ကျွန်မသိပ်စိတ်ဝင်စားတယ်။ ဒါကြောင့် လူသေတွေနဲ့ စကားပြောဖို့ ကြိုးစားတယ်၊ ကျောင်းက သူငယ်ချင်းတွေနဲ့အတူ သင်္ချိုင်းကုန်းတွေဆီ သွားတယ်၊ သရဲကားတွေ ကြည့်တယ်။ အဲဒါတွေက စိတ်လှုပ်ရှားစရာကောင်းသလို ကြောက်စရာလည်း ကောင်းတယ်။
ကျွန်မဟာ အသက် ၁၀ နှစ်အရွယ်ကစပြီး ထင်ရာစိုင်းတော့တယ်။ ဆေးလိပ်စသောက်တတ်လာပြီး မကြာခင်မှာပဲ ဆေးလိပ်စွဲသွားတယ်။ နောက်ပိုင်းတော့ ဆေးခြောက်ပါ ရှူလာတယ်။ အသက် ၁၁ နှစ်မှာ အရက်သောက်တတ်နေပြီ။ အရက်ရဲ့ အရသာကို မကြိုက်ပေမဲ့ မူးယစ်ရီဝေနေရတာကိုတော့ ကြိုက်တယ်။ တေးဂီတနဲ့ အကကိုလည်း သိပ်ခုံမင်တယ်။ ဒါကြောင့် ပါတီပွဲတွေ၊ နိုက်ကလပ်တွေကို အမြဲလိုလို တက်ဖြစ်တယ်။ ညမှာ အိမ်အပြင်ခိုးထွက်ပြီး မိုးမလင်းခင် အရောက်ပြန်လာလေ့ရှိတယ်။ အဲဒီတော့ နောက်တစ်နေ့ဆို လူက ပင်ပန်းနေရော။ ဒါနဲ့ ကျောင်းပြေးတယ်။ ကျောင်းတက်ပြန်ရင်လည်း စာသင်ချိန် ခဏနားတဲ့အချိန်မှာ အရက်သောက်တယ်။
ကျောင်းနောက်ဆုံးနှစ်မှာ ကျွန်မရဲ့ရမှတ်တွေက အောက်ဆုံးအဆင့်ကို ရောက်သွားတယ်။ ကျွန်မ ထင်ရာစိုင်းနေတာကို အစပိုင်း အမေသတိမထားမိပေမဲ့ အဲဒီရမှတ်တွေကြောင့် သိသွားပြီး ကျွန်မကို စိတ်လည်းဆိုး၊ ဒေါသလည်း ထွက်တယ်။ အမေနဲ့ စကားများတော့ ကျွန်မလည်း အိမ်ကနေ ဆင်းလာပြီး ရည်းစားဖြစ်သူ တိုနီနဲ့အတူနေတယ်။ သူက ပြစ်မှုငယ်တွေ ကျူးလွန်တယ်၊ မူးယစ်ဆေး ရောင်းတယ်၊ ကမ်းကုန်အောင် ကြမ်းတမ်းရမ်းကားသူလို့ နာမည်ကြီးတယ်။ ကျွန်မအသက် ၁၆ နှစ်မှာ ကိုယ်ဝန်ရှိပြီး သားလေးကို မွေးခဲ့တယ်။
သမ္မာကျမ်းစာက ကျွန်မဘဝကို ပြောင်းလဲပေးခဲ့ပုံ
လက်မထပ်ရသေးတဲ့ မိခင်တွေနဲ့ သူတို့ရဲ့ကလေးတွေအတွက် ဖွင့်ထားတဲ့ ဂေဟာမှာ ကျွန်မနေနေတဲ့အချိန်မှာ ယေဟောဝါသက်သေတွေနဲ့ ဦးဆုံးအကြိမ် တွေ့ခဲ့တယ်။
အစိုးရခွင့်ပြုချက်နဲ့ ဂေဟာမှာ နေစရာအခန်းတစ်ခန်း ကျွန်မရထားတယ်။ သက်သေခံအမျိုးသမီးနှစ်ယောက်က တခြားမိခင်တွေဆီ ပုံမှန်လာလည်လေ့ရှိတယ်။ တစ်နေ့တော့ ကျွန်မလည်း သူတို့ရဲ့ ဆွေးနွေးခန်းထဲ ဝင်ပါဖြစ်တယ်။ သက်သေခံတွေ မှားတယ်ဆိုတာကို ထောက်ပြဖို့ ရည်ရွယ်ချက်နဲ့ပေါ့။ ဒါပေမဲ့ သူတို့က ကျွန်မမေးသမျှကို ကျမ်းစာထဲကနေ ရှင်းရှင်းလင်းလင်း၊ တည်တည်ငြိမ်ငြိမ် အဖြေပေးတယ်။ သူတို့ရဲ့ ကြင်နာမှု၊ နူးညံ့သိမ်မွေ့မှုကို ကျွန်မသိပ်သဘောကျသွားတယ်။ ဒါနဲ့ ကျမ်းစာလေ့လာဖို့ သဘောတူလိုက်တယ်။မကြာခင်မှာပဲ ကျွန်မဘဝကို ပြောင်းလဲသွားစေမယ့် အရာတချို့ကို ကျမ်းစာကနေ သိခဲ့ရတယ်။ ငယ်ငယ်ကတည်းက သေရမှာကို ကြောက်ခဲ့ပေမဲ့ အခုတော့ ရှင်ပြန်ထမြောက်ခြင်းနဲ့ပတ်သက်တဲ့ ယေရှုရဲ့ သွန်သင်ချက်ကို သိလာတယ်။ (ယောဟန် ၅:၂၈၊ ၂၉) ဘုရားက ကျွန်မကို ဂရုစိုက်မှန်းလည်း သိလိုက်ရတယ်။ (၁ ပေတရု ၅:၇) အထူးသဖြင့် ဒီစကားတွေကို ကျွန်မ အကြိုက်ဆုံးပဲ။ ‘ယေဟောဝါ ပြောတာက– “မင်းတို့နဲ့ပတ်သက်ပြီး ငါဘာတွေ တွေးနေမှန်း ငါသိတာပေါ့။ မင်းတို့ကို ငြိမ်သက်အေးချမ်းစေချင်တယ်။ ဘေးဆိုး မကြုံစေချင်ဘူး။ မင်းတို့မျှော်လင့်တဲ့ အနာဂတ်မျိုး ပေးချင်တယ်။”’ (ယေရမိ ၂၉:၁၁၊ ကဘ) ဒီကမ္ဘာမြေပေါ် သာယာလှပတဲ့အခြေအနေမှာ ထာဝစဉ်အသက်ရှင်ခွင့် မျှော်လင့်ချက်ကို ပိုင်ဆိုင်နိုင်မှန်း ကျွန်မယုံကြည်လာတယ်။—ဆာလံ ၃၇:၂၉။
ယေဟောဝါသက်သေတွေက ကျွန်မကို စစ်မှန်တဲ့မေတ္တာပြကြတယ်။ သူတို့ရဲ့အစည်းအဝေးတစ်ခုကို ဦးဆုံးအကြိမ် တက်တုန်းက နွေးထွေးဖော်ရွေလိုက်ကြတာ။ (ယောဟန် ၁၃:၃၄၊ ၃၅) ချာ့ခ်ျမှာ ဆက်ဆံခံရပုံနဲ့များ ဆီနဲ့ရေလိုကွာတယ်။ သက်သေခံတွေက ကျွန်မရဲ့ အခြေအနေကိုသိလျက်နဲ့ လှိုက်လှိုက်လှဲလှဲကြိုဆိုကြတယ်။ ကျွန်မကို အချိန်ပေးပြီး ဂရုစိုက်တဲ့အပြင် တကယ်လိုအပ်တဲ့ အကူအညီတွေလည်း ပေးကြတယ်။ မေတ္တာပြည့်ဝတဲ့ မိသားစုကြီးမှာ မိသားစုဝင်တစ်ယောက်လို ခံစားရတယ်။
ဘုရားရဲ့ မြင့်မားတဲ့ ကိုယ်ကျင့်တရားစံနှုန်းတွေနဲ့ ကိုက်ညီဖို့ဆိုရင် ဘဝကို ပြုပြင်ပြောင်းလဲရမယ်ဆိုတာ ကျမ်းစာလေ့လာရင်း သိလာတယ်။ ဒါပေမဲ့ ဆေးလိပ်ဖြတ်ဖို့က တော်တော်လေးခက်တယ်။ တေးသီချင်းတချို့က ဆေးခြောက်ရှူချင်တဲ့ ဆန္ဒကို ပိုပြင်းပြစေမှန်းလည်း သိလာတယ်။ ဒါကြောင့် နားထောင်နေတဲ့ တေးသီချင်းတချို့ကို ပြောင်းပစ်လိုက်တယ်။ အရက်မမူးဘဲနေချင်တာမို့ အရက်သောက်ဖို့ သွေးဆောင်မှုဖြစ်စေနိုင်တဲ့ ပါတီပွဲတွေ၊ နိုက်ကလပ်တွေ တက်တာကို ရပ်ပစ်လိုက်တယ်။ ဘဝပုံစံအသစ်နဲ့ နေထိုင်နိုင်အောင် ကူညီပေးနိုင်မယ့်သူတွေ၊ ကောင်းတဲ့ဩဇာလွှမ်းမိုးနိုင်မယ့် သူငယ်ချင်းအသစ်တွေကိုလည်း ရှာဖွေခဲ့တယ်။—သုတ္တံ ၁၃:၂၀။
အဲဒီအချိန်အတောအတွင်း တိုနီလည်း ယေဟောဝါသက်သေတွေနဲ့ ကျမ်းစာလေ့လာတယ်။ သက်သေခံတွေက သူမေးသမျှကို ကျမ်းစာထဲကနေ အဖြေပေးတာမို့ ဒါဟာ အမှန်တရားပဲလို့ သူလည်းယုံကြည်လာတယ်။ ဒါနဲ့ သူ့ဘဝကို အကြီးအကျယ် ပြောင်းလဲလိုက်တယ်။ ကြမ်းတမ်းရမ်းကားတဲ့ သူငယ်ချင်းဟောင်းတွေနဲ့ အဆက်အသွယ်ဖြတ်တယ်၊ ပြစ်မှုငယ်တွေ မကျူးလွန်တော့ဘူး၊ ဆေးခြောက်ရှူတဲ့ အကျင့်ကိုလည်း ဖြတ်တယ်။ ယေဟောဝါဘုရားရဲ့စိတ်တော်နဲ့ အပြည့်အဝတွေ့နိုင်ဖို့ဆိုရင် အကျင့်ပျက်ဘဝပုံစံကို ပြုပြင်ပြောင်းလဲဖို့ လိုအပ်မှန်း၊ သားလေးအတွက် တည်ငြိမ်အေးချမ်းတဲ့ အသိုင်းအဝိုင်းကို တည်ဆောက်ပေးဖို့ လိုအပ်မှန်း ကျွန်မတို့ နှစ်ယောက်စလုံးသိလာတယ်။ ဒါကြောင့် ၁၉၈၂ ခုနှစ်မှာ လက်ထပ်လိုက်ကြတယ်။
“အနာဂတ်အကြောင်း၊ သေခြင်းအကြောင်း တွေးပူပြီး အိပ်မပျော်တာမျိုး လုံးဝမရှိတော့ဘူး”
ကျွန်မပြောင်းလဲချင်တဲ့အတိုင်း ဘဝပုံစံကို အောင်မြင်စွာပြောင်းလဲခဲ့သူတွေရဲ့ အတ္ထုပ္ပတ္တိတွေကို ကင်းမျှော်စင် နဲ့ နိုးလော့ * မှာရှာဖတ်ခဲ့တာ မှတ်မိသေးတယ်။ သူတို့ရဲ့ စံနမူနာကြောင့် တကယ့်ကို အားရှိသွားတယ်။ ဆက်ကြိုးစားပြုပြင်ဖို့၊ အၡုံးမပေးဖို့ လိုအပ်တဲ့ခွန်အားတွေ ရလာတယ်။ ကျွန်မကို စိတ်မပျက်သွားဖို့ ယေဟောဝါဘုရားဆီ အမြဲဆုတောင်းတယ်။ ဒီလိုနဲ့ ၁၉၈၂ ခုနှစ်၊ ဇူလိုင်လမှာ ကျွန်မတို့ဇနီးမောင်နှံ နှစ်ခြင်းခံခဲ့တယ်။
အကျိုးကျေးဇူးရရှိခဲ့ပုံ
ယေဟောဝါဘုရားနဲ့ ရင်းနှီးသိကျွမ်းလာတာက ကျွန်မရဲ့ဘဝကို ကယ်တင်ပေးလိုက်တာပဲ။ ကျွန်မတို့ ဇနီးမောင်နှံဟာ အခက်ခဲဆုံးအချိန်တွေမှာ ယေဟောဝါဘုရားရဲ့ ထောက်မမှုကို ခံစားခဲ့ရတယ်။ ဘုရားကို ယုံကြည်ကိုးစားတတ်ဖို့ ဒီအခက်အခဲတွေကနေ သင်ယူခဲ့ရတယ်။ ကျွန်မတို့မိသားစုကို ကိုယ်တော် အမြဲကူညီဖေးမပေးမှန်းလည်း သိရှိခဲ့ရတယ်။—ဆာလံ ၅၅:၂၂။
ယေဟောဝါဘုရားကို ကျွန်မသိကျွမ်းသလို သားနဲ့သမီးလည်း သိကျွမ်းလာအောင် သွန်သင်ပေးခွင့်ရတာ သိပ်ပျော်တယ်။ အခုဆိုရင် သူတို့ရဲ့ ကလေးတွေလည်း ဘုရားကို သိကျွမ်းပြီး တိုးတက်နေတာကိုမြင်ရလို့ ကြည်နူးလိုက်တာ။
အနာဂတ်အကြောင်း၊ သေခြင်းအကြောင်း တွေးပူပြီး အိပ်မပျော်တာမျိုး လုံးဝမရှိတော့ဘူး။ ကျွန်မတို့ ဇနီးမောင်နှံဟာ ယေဟောဝါသက်သေတွေရဲ့ အသင်းတော်တွေဆီ တစ်ပတ်ပြီးတစ်ပတ် လည်ပတ်အားပေးခွင့် ရထားတယ်။ ယေရှုကို ယုံကြည်မယ်ဆိုရင် ထာဝရအသက်ရနိုင်မယ့်အကြောင်း တခြားသူတွေကို သွန်သင်ပေးတဲ့လုပ်ငန်းမှာ ကျွန်မတို့နှစ်ယောက် ပါဝင်နေပါတယ်။
^ စာပိုဒ်၊ 18 ယေဟောဝါသက်သေတွေ ထုတ်ဝေတယ်။