Abaana bo bwe baba ab’okwagala Katonda balina okukakasa nti Katonda gyali era nti abaagala. Ate era kibeetaagisa okuyiga ebimukwatako. (1 Yokaana 4:8) Ng’ekyokulabirako, beetaaga okuyiga ebintu nga bino: Lwaki Katonda yatonda abantu? Lwaki Katonda aleseewo okubonaabona? Biki Katonda by’anaakolera abantu mu biseera eby’omu maaso?—Soma Abafiripi 1:9.

Okusobola okuyamba abaana bo okwagala Katonda, naawe kennyini olina okukiraga nti omwagala. Bwe banaakiraba nti oyagala Katonda, bajja kukukoppa.—Soma Ekyamateeka 6:5-7; Engero 22:6.

Ekigambo kya Katonda kya maanyi. (Abebbulaniya 4:12) N’olwekyo, yamba abaana bo okutegeera ebyo Bayibuli by’eyigiriza. Okusobola okuyigiriza obulungi abantu, Yesu yababuuzanga ebibuuzo, yabawulirizanga, era yabannyonnyolanga Ebyawandiikibwa. Naawe okusobola okuyigiriza obulungi abaana bo, osaanidde okukoppa Yesu.—Soma Lukka 24:15-19, 27, 32.

Ate era, ebyo ebiri mu Bayibuli ebikwata ku ngeri Katonda gye yakolaganangamu n’abantu bisobola okuyamba abaana okumanya Katonda n’okumwagala. Ebitabo ebisobola okukuyamba okuyigiriza abaana bo biri ku mukutu, www.pr418.com/lg.—Soma 2 Timoseewo 3:16.